«គីវី» ជាផ្លែឈើមួយប្រភេទដែលមានរសជាតិជូរអែម ហើយមានផ្ទុកសម្បូរទៅដោយសារធាតុចិញ្ចឹមចាំបាច់សម្រាប់រក្សាសុខភាពរាងកាយល្អប្រសើរ។បើទោះជាភាគច្រើននៃពួកយើងស្គាល់ និងធ្លាប់ទទួលទានផ្លែនេះ ប៉ុន្តែប្រហែលជាមិនបាច់ចាប់អារម្មណ៍ពីអត្ថប្រយោជន៍នៃផ្លែគីវីចំពោះសុខភាពជួយទប់ស្កាត់ជំងឺផ្សេងៗឡើយ។ ខាងក្រោមវេបសាយសុខភាព Health.com.kh
នឹងបង្ហាញឱ្យដឹងពីមូលហេតុដែលអ្នកគួរទទួលទានផ្លែគីវីជាប្រចាំ ៖
១. មានផ្ទុកសម្បូរទៅដោយវីតាមីន C ៖ តើអ្នកធ្លាប់ដឹងទេថាគីវីមានផ្ទុកវីតាមីន C ខ្ពស់ជាងក្រូចផ្សេងៗនិងក្រូចឆ្មារស្ទើតែពីរដងឯណោះ? វីតាមីន C ជាសារធាតុប្រឆាំងអុកស៊ីតកម្មដ៏មានឥទ្ធិពលក្នុងការកម្ចាត់រ៉ាឌីកាល់សេរីដែលបង្កការរលាកក្នុងរាងកាយ ឬជំងឺមហារីក។ វាក៏ជួយពង្រឹងប្រព័ន្ធភាពស៊ាំប្រឆាំងនឹងភ្នាក់ងារបង្ករោគគ្រោះថ្នាក់ផងដែរ។
២. សុខភាពភ្នែក ៖ ផ្លែគីវីក៏មានផ្ទុកសម្បូរទៅដោយសារធាតុ phytochemical lutein ដែលជួយទប់ស្កាត់បញ្ហាងងឹតភ្នែកទាក់ទងនឹងកត្តាអាយុ។ វាក៏ជួយការពារភ្នែកមិនឱ្យទទួលរងការបំផ្លាញពីសំណាក់រ៉ាឌីកាល់សេរីបានយ៉ាងប្រសើរផងដែរ។
៣. បញ្ចុះសម្ពាធឈាម ៖ គីវី ជាប្រសើរបំផុតមួយនៃជាតិប៉ូតាស្យូមដែលជួយកាត់បន្ថយឥទ្ធិពលនៃជាតិសូដ្យូមក្នុងរាងកាយទប់ស្កាត់ហានិភ័យនៃបញ្ហាសម្ពាធឈាមឡើងខ្ពស់។ ហើយសម្ពាធឈាមប្រក្រតីនឹងធ្វើឱ្យអ្នកជៀសផុតពីបញ្ហានៃជំងឺបេះដូង, ជំងឺដាច់សសៃឈាមខួរក្បាល ព្រមទាំងជំងឺលើសឈាម។
៤. សុខភាពបេះដូង ៖ ក្រៅពីជាតិប៉ូតាស្យូម ផ្លែគីវីក៏មានផ្ទុកសម្បូរទៅដោយជាតិសសៃដែលជួយរក្សាពង្រឹងសុខភាពបេះដូងតាមរយៈការកាត់បន្ថយកម្រិតកូឡេស្តេរ៉ូល និងសម្ពាធឈាម។ ដូច្នេះប្រសិនបើអ្នកចង់ជៀសផុតពីបញ្ហាផ្សេងៗទាក់ទងនឹងបេះដូង ចូរព្យាយាមទទួលទានផ្លែគីវីឱ្យបានទៀងទាត់។
៥. ល្អសម្រាប់ស្ត្រីមានផ្ទៃពោះ ៖ នោះក៏ព្រោះតែគីវីជាប្រភពដ៏ប្រសើរនៃសារធាតុ folate ដែលជួយរក្សាគភ៌អោយមានសុខភាពល្អ។សារធាតុ folate ក៏ចាំបាច់សម្រាប់ស្ត្រីមានផ្ទៃពោះក្នុងការរក្សាបាននូវកម្រិតអេម៉ូក្លូប៊ីនត្រឹមត្រូវផងដែរ។
៦. ទប់ស្កាត់អាការៈទល់លាមក ៖ ផ្លែគីវីមិនត្រឹមតែមានផ្ទុកសម្បូរទៅដោយជាតិសរសៃប៉ុណ្ណោះទេ ប៉ុន្តែក៏ជាប្រភពដ៏ប្រសើរនៃ អង់ស៊ីមមួយឈ្មោះថា Actinidain ដែលជួយផ្តល់ភាពវិជ្ជមានដល់ចលនាពោះវៀន និងទម្លាប់នៃការបន្ទោរបង់ទៀងទាត់ ព្រមទាំងបង្កើនភាពជ្រាយនៃលាមកគួរឱ្យកត់សម្គាល់។
៧. ទប់ស្កាត់ជំងឺហឺត ៖ បរិមាណខ្ពស់នៃវីតាមីន C ក្នុងផ្លែគីវីក៏មានប្រសិទ្ធិភាពសម្រួលដល់ផ្លូវដង្ហើមដែលប្រសើរសម្រាប់អ្នកជំងឺហឺតដែលពិបាកដកដង្ហើមផងដែរ។
៨. បញ្ចុះជាតិស្ករក្នុងឈាម ៖ មិនត្រឹមតែឆ្ងាញ់ប៉ុណ្ណោះទេ ប៉ុន្តែគីវីក៏ជាប្រភពដ៏ល្អបំផុតមួយនៃជាតិសសៃ dietary ប៉ូតាស្យូម និងវីតាមីន C ដែលមានប្រសិទ្ធិភាពខ្ពស់ជួយបញ្ចុះកម្រិតនៃជាតិស្ករក្នុងឈាម។ នេះហើយជាមូលហេតុធ្វើឱ្យវាក្លាយជាជម្រើសនៃផ្លែឈើដ៏ល្អសម្រាប់អ្នកជំងឺទឹកនោមផ្អែម (ប្រភពពី៖ Health.com.kh) ៕ (កែសម្រួលដោយ ៖ បុប្ផា)
ចែករំលែកព័តមាននេះ