ខេត្តស្វាយរៀង ៖ ជនដៃដល់ជាឃាតករក្នុងករណីបាញ់សម្លាប់២នាក់ប្ដីប្រពន្ធនៅស្រុកកោះញែក ខេត្តមណ្ឌលគិរី កាលពី១ខែមុននោះ ឥឡូវត្រូវកម្លាំងនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិចាប់ខ្លួនបានហើយនៅក្រុងបាវិត កាលពីល្ងាចថ្ងៃទី៧ តុលា ។
យោងតាមសមត្ថកិច្ចបានឱ្យដឹងថា ប្រតិបត្តិការតាមប្រមាញ់ឃាតកររូបនេះត្រូវបានធ្វើឡើងក្រោមបញ្ជាផ្ទាល់ពីលោកនាយឧត្តមសេនីយ៍ សន្ដិបណ្ឌិតនេត សាវឿន អគ្គស្នងការនគរបាលជាតិ អគ្គស្នងការរងទទួលផែននគរបាលយុត្តិធម៌ និងចង្អុលបង្ហាញពីលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌដោយចាត់ឲ្យលោកវរសេនីយ៍ឯក ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ បើកការស្រាវជ្រាវតាមចាប់ឃាតករដែលក្រោយធ្វើសកម្មភាពយ៉ាងឃោរឃៅនោះក៏រត់គេចខ្លួនរហូតមកដល់ថ្ងៃទី៧ តុលា ទើបកម្លាំងសមត្ថកិច្ចយើងចាប់បាន ។
លោកវរសេនីយ៍ឯក ជាវ វិបុល បានប្រាប់ឲ្យដឹងថា ក្រោមបទបញ្ជានិងការចង្អុលបង្ហាញពីថ្នាក់ដឹកនាំ លោកបានដឹកនាំកម្លាំងនាយកដ្ឋានសហការជាមួយកម្លាំងនគរបាលខេត្តស្វាយរៀងនិងកំណត់អត្ដសញ្ញាណជនដៃដល់ទើបឈានដល់ការចាប់ខ្លួនបាននៅវេលាម៉ោង៤រសៀលថ្ងៃទី៧ តុលា នៅចំណុចការដ្ឋានសំណង់មួយកន្លែងស្ថិតក្នុងក្រុងបាវិត ។
លោកវរសេនីយ៍ឯកបានបញ្ជាក់ទៀតថា ជនដៃដល់ដែលកម្លាំងជំនាញចាប់ខ្លួនបាននោះឈ្មោះ សុខ ចំរើន ភេទប្រុស អាយុ៤៩ឆ្នាំ មានទីលំនៅភូមិអូគគីរ ឃុំអូតាយ៉ ស្រុកកោះញែក ខេត្តមណ្ឌលគីរី បានរត់គេចមកធ្វើកម្មករសំណង់ក្នុងការដ្ឋានមួយកន្លែង ដែលស្ថិតនៅក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។ បច្ចុប្បន្នជនសង្ស័យកំពុងបញ្ជូនមកនាយកដ្ឋាននគរបាលព្រហ្មទណ្ឌ ដើម្បីធ្វើការសួរនាំនិងបញ្ជូនបន្ដទៅស្នងការដ្ឋាននគរបាលខេត្តមណ្ឌលគិរីវិញ ដែលជាម្ចាស់ករណី ។
សូមរំលឹកផងដែរថា កាលពីល្ងាចថ្ងៃទី៧ កញ្ញា ពោលគឺមួយខែមុន ករណីបាញ់សម្លាប់២នាក់ប្ដីប្រពន្ធនេះបានកើតឡើងនៅចំណុចថ្មដារស្ថិតនៅឃុំរយ៉ ស្រុកកោះញែក ខេត្តមណ្ឌលគិរី ។ ជនរងគ្រោះជាប្ដីឈ្មោះ រ៉ា ហៅ ម៉ៅ អាយុ៣៧ឆ្នាំ ជាកសិករ និងប្រពន្ធឈ្មោះ អាន អុល អាយុ៣៤ឆ្នាំ ជាកសិករ ។ ដើមចមដែលនាំឲ្យមានអំពើឃាតកម្មនេះសមត្ថកិច្ចបង្ហើបថា ផ្ដើមចេញពីរឿងទំនាស់ដីធ្លីនៅតំបន់ព្រៃខៀវ ហើយជនដៃដល់ជាឃាតករបានបាញ់ទៅលើគូទម្នាស់ស្លាប់តែម្តង និងចាប់ខ្លួនបាន២ថ្ងៃក្រោយមកគឺស្ត្រីជាប្រពន្ធ ។
ប្រភពបានឲ្យដឹងថា បន្ទាប់ពីកើតហេតុនៅល្ងាចនោះ លុះដល់ព្រឹកថ្ងៃទី៨ កញ្ញា សពប្ដីប្រពន្ធ ២នាក់ ត្រូវបានកម្លាំងកងរាជអាវុធហត្ថ និងកម្លាំងនគរបាលអធិការដ្ឋានស្រុកកូនមុំ ដឹកយកទៅតំកល់ នៅវត្តអូរភ្លង ស្រុកកូនមុំ ខេត្តរតនគិរី ក្រោយពីកើតហេតុការណ៍ បាញ់ប្រហារ ដោយខ្មាន់កាំភ្លើង២នាក់ ប្ដីប្រពន្ធ កាលពីវេលាម៉ោង៧និង៣០នាទីយប់ថ្ងៃទី៧ កញ្ញា ឆ្នាំ២០១៩ នៅតំបន់អនាធិបតេយ្យព្រៃខៀវ ឃុំរយ៉ ស្រុកកោះញែក ខេត្តមណ្ឌលគិរី ។ អ្វីដែលគួរឱ្យខ្លោចចិត្ត សពប្តីប្រពន្ធទាំង២នាក់ ទើបមកពីខេត្តកំពង់ធំ ធ្វើចំការ នៅចំណុចខាងលើបាន៩ខែ មានកូនតូចៗ៣នាក់ កូនប្រុសច្បងអាយុ៧ឆ្នាំ កូនទី២ ភេទស្រី អាយុ៥ឆ្នាំ និងប្អូនទី៣ ភេទស្រី អាយុ៤ឆ្នាំ ។
ពេលនេះ មេបញ្ជាការអាវុធហត្ថស្រុកកូនមុំ លោក រស់ វណ្ណា បានឲ្យដឹងថា បើតាមការឲ្យដឹងពីអ្នកជិតខាង ក្រុមគ្រួសារទាំងពីរ មានទំនាស់គ្នាជាច្រើនលើកច្រើនសាមកហើយព្រោះរឿងដី ដែលជនដៃដល់បានឲ្យទៅជនរងគ្រោះ ។ ក្រោយមកក្រុមគ្រួសារអ្នកទាំងពីរមានទំនាស់នឹងគ្នា ប្តីប្រពន្ធជនដៃដល់ទាមទារយកដីមកវិញ តែខាងជនរងគ្រោះមិនព្រមឲ្យ ។ ក្រុមគ្រួសារទាំងពីរនេះ តែងតែឈ្លោះប្រកែកគ្នាជារឿយៗ ។
ដល់ថ្ងៃកើតហេតុ ជនរងគ្រោះរួមទាំងអ្នកជិតខាងបានចាក់ធុងបាស ផឹកស្រាមានគ្នា៥ទៅ ៦នាក់ តាំងពីម៉ោងប្រមាណជាង៣រសៀល រហូតដល់ម៉ោង៧យប់ទើបឈប់ ។ នៅពេលក្រុមជនរងគ្រោះបំបែគគ្នាឈប់ផឹកវិលត្រឡប់ទៅផ្ទះវិញនោះ ជនដៃដល់ក៏បានមកស្ទាក់តាមផ្លូវរករឿងឈ្លោះប្រកែកគ្នារឿងចាក់ធុងបាស់ ហើយជនរងគ្រោះឮដូច្នោះ ក៏បានចេញពីផ្ទះទាំងពីរនាក់ប្ដីប្រពន្ធទៅសួរនាំ ក៏ត្រូវបានខ្មាន់កាំភ្លើងទាំងពីរនាក់ប្ដីប្រពន្ធជិតខាងនោះបាញ់ប្រហារទៅលើប្ដីប្រពន្ធជនរងគ្រោះ បណ្ដាលឲ្យស្លាប់ភ្លាមៗនៅនឹងកន្លែង ។ ប្រភពបានបញ្ជាក់ថា ខ្មាន់កាំភ្លើងបាញ់ប្រហារត្រូវសមត្ថកិច្ចស្រុកកោះញែក ខេត្តមណ្ឌលគិរីចាប់ខ្លួនបានស្ត្រីជាប្រពន្ធ ចំណែកប្ដីសមត្ថកិច្ចតាមចាប់ខ្លួន ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ