រាជធានីភ្នំពេញ ៖ ទីបំផុត សេចក្តីព្រាងច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកចំនួន១២ជំពូក និង៦៧មាត្រា និងជាសេចក្តីព្រាងច្បាប់ដ៏សំខាន់មួយ ត្រូវបានសមាជិករដ្ឋសភា១០៨រូបអនុម័តជាស្ថាពរហើយ ។សេចក្តីព្រាងច្បាប់នេះ ត្រូវបានសមាជិករដ្ឋសភាចំនួន១០៨រូប លើកយកមកពិភាក្សា និងអនុម័តក្នុងសម័យប្រជុំពេញអង្គរដ្ឋសភាលើកទី៣ នីតិកាលទី៦ នាព្រឹកថ្ងៃទី៨ ខែតុលា ក្រោមអធិបតីភាពសម្តេចពញាចក្រី ហេង សំរិនប្រធានរដ្ឋសភា ។
សេចក្តីព្រាងច្បាប់នេះ ត្រូវបានរដ្ឋសភាអនុម័តមួយជំពូកម្តងៗ ។ លើកឡើងក្នុងអង្គប្រជុំ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មថ្លែងថា សេចក្តីព្រាងច្បាប់ស្តីពីពាណិជ្ជកម្ម តាមប្រព័ន្ធអេឡិចត្រូនិក នឹងផ្តល់វិធានជាមូលដ្ឋានដ៏សំខាន់ ក្នុងការជំរុញពាណិជ្ជកម្មតាមប្រព័ន្ធ អេឡិចត្រូនិកក្នុងនិងក្រៅប្រទេស ប្រកបដោយទំនុកចិត្ត តាមរយៈការទទួលស្គាល់សុពលភាពអានុភាព ភាពអាចអនុវត្តបាន និងភាពអាចទទួលយកបាននៃទំនាក់ទំនងអេឡិចត្រូនិកកំណត់ត្រាអេឡិចត្រូនិក និងកិច្ចសន្យាតាមប្រព័ន្ធអេឡិចត្រូនិក ព្រមទាំងមានការទទួលស្គាល់យថាភូតភាពនៃកំណត់ត្រាអេឡិចត្រូនិក និងហត្ថលេខាអេឡិចត្រូនិកដែលកំណត់ដោយបច្ចេកវិទ្យា និងគ្រប់គ្រងដោយស្ថាប័នរដ្ឋ ។
លោករដ្ឋមន្ត្រីបន្តថា សេចក្តីព្រាងច្បាប់នេះនឹងរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ចឌីជីថលនៅកម្ពុជា ដោយហេតុថា ក្របខ័ណ្ឌច្បាប់និងបទដ្ឋានគតិយុត្តនានា ដែលគាំទ្រដល់សកម្មភាពនិងប្រតិបត្តិការតាមប្រព័ន្ធអេឡិចត្រូនិកនិងឌីជីថល ចាំបាច់ត្រូវរៀបចំនិងធ្វើបច្ចុប្បន្នភាព ដើម្បីអាចបង្កើតសេដ្ឋកិច្ចឌីជីថលរឹងមាំមួយ ព្រមទាំងត្រៀមទទួលយកនូវការឈានមកដល់នៃបដិវត្តន៍ឧស្សាហកម្មទី៤ ។
ជាងនេះទៀត សេចក្តីព្រាងច្បាប់នេះនឹងផ្តល់លទ្ធភាពឱ្យសហគ្រាសធុនតូចនិងមធ្យម (SMEs)នៅកម្ពុជា អាចភ្ជាប់ខ្លួនទៅនឹងខ្សែសង្វាក់ផលិតកម្មនិងទីផ្សារក្នុងស្រុកនិងអន្តរជាតិ ក៏ដូចជាជំរុញឱ្យមានការច្នៃប្រឌិត និងការបង្កើតទំនិញ និងសេវាថ្មីៗបន្ថែមទៀតផងដែរ ។សូមជម្រាបថា សេចក្តីព្រាងច្បាប់ស្តីពីពា
ណិជ្ជកម្មតាមប្រព័ន្ធអេឡិចត្រូនិក ត្រូវបានគណៈ រដ្ឋមន្ត្រីអនុម័តក្នុងសម័យប្រជុំពេញអង្គគណៈរដ្ឋមន្ត្រី នាថ្ងៃទី១២ ខែកក្កដា ឆ្នាំ២០១៩ ដើម្បីដាក់ជូនសភា ។សេចក្តីព្រាងច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក រួមមាន១២ជំពូក និង៦៧មាត្រា ដូចខាងក្រោម៖
ជំពូកទី១ បទប្បញ្ញត្តិទូទៅមាន៤មាត្រា(មាត្រា១ដល់មាត្រា៤) ។ ជំពូកទី១នេះ ចែងអំពីគោលបំណង គោលដៅ វិសាលភាព និងនិយមន័យ នៃវាក្យសព្ទសំខាន់ៗដែលប្រើក្នុងច្បាប់នេះ ។
ជំពូកទី២ សុពលភាពនៃទំនាក់ទំនងអេឡិចត្រូនិកមាន១០មាត្រា(មាត្រា៥ដល់មាត្រា១៤) ។ ជំពូកទី២នេះ ចែងអំពីការទទួលស្គាល់ទំនាក់ទំនងអេឡិចត្រូនិក លក្ខខណ្ឌតម្រូវជាលាយលក្ខណ៍អក្សរ លក្ខខណ្ឌតម្រូវចំពោះហត្ថលេខា លក្ខខណ្ឌតម្រូវសម្រាប់រក្សាព័ត៌មានក្នុងទម្រង់ដើម ទម្រង់បែបបទដែលកំណត់ លក្ខខណ្ឌតម្រូវលើការរក្សាទុកកំណត់ត្រា លក្ខខណ្ឌតម្រូវស្តីពីភ័ស្តុតាង ការបង្កើត និងសុពលភាពកិច្ច សន្យា អានុភាពរវាងគូភាគី និងការអនុវត្តដោយឡែកតាមការព្រមព្រៀងរបស់គូភាគី ។
ជំពូកទី៣ ដំណើរការនៃទំនាក់ទំនងអេឡិចត្រូនិកមាន៤មាត្រា(មាត្រា១៥ដល់មាត្រា១៨)។ជំពូកទី៣នេះ ចែងអំពីពេលវេលា និងទីកន្លែងនៃការបញ្ជូនចេញ និងការទទួលព័ត៌មានក្នុងទំនាក់ទំនងអេឡិចត្រូនិក សំណើបង្កើតកិច្ចសន្យា ការប្រើប្រាស់ប្រព័ន្ធស្វ័យប្រវត្តិ សម្រាប់បង្កើតកិច្ចសន្យា និងកំហុសឆ្គងនៃការបញ្ចូលព័ត៌មានក្នុងទំនាក់ទំនងអេឡិចត្រូនិក ។
ជំពូកទី៤ កំណត់ត្រាអេឡិចត្រូនិកនិងហត្ថលេ ខាអេឡិចត្រូនិកដែលមានសុវត្ថិភាព មាន៥មាត្រា(មាត្រា១៩ ដល់មាត្រា២៣) ។ ជំពូកទី៤នេះ ចែងអំពីកំណត់ត្រាអេឡិចត្រូនិកដែលមានសុវត្ថិភាព ហត្ថលេខាអេឡិចត្រូនិកដែលមានសុវត្ថិភាព ការសន្មតទាក់ទងនឹងកំណត់ត្រា និងហត្ថលេខាអេឡិចត្រូនិក ដែលមានសុវត្ថិភាព ការលួចប្រើប្រាស់អត្តសញ្ញាណ និងស្ថាប័នមានសមត្ថកិច្ច គ្រប់គ្រងនីតិវិធីសុវត្ថិភាព ។
ជំពូកទី៥ អន្តរការីនិងបុគ្គលផ្តល់សេវាពាណិជ្ជកម្មតាមប្រព័ន្ធអេឡិចត្រូនិក មាន៥មាត្រា(មាត្រា២៤ដល់មាត្រា២៨) ។ ជំពូកទី៥នេះ ចែងអំពីការទទួលខុសត្រូវរបស់អន្តរការី និងបុគ្គលផ្តល់សេវាពាណិជ្ជកម្មតាមប្រព័ន្ធអេឡិចត្រូនិក ការទទួលខុសត្រូវផ្នែកព័ត៌មាន ឬហេតុការណ៍ ការផ្តល់លិខិតអនុញ្ញាតឬអាជ្ញាប័ណ្ណ ក្រមសីលធម៌វិជ្ជាជីវៈ និងបទប្បញ្ញត្តិសម្រាប់អន្តរការី និងបុគ្គលផ្តល់សេវាពាណិជ្ជកម្មតាមប្រព័ន្ធអេឡិចត្រូនិក និងកាតព្វកិច្ចពន្ធ ការលើកទឹកចិត្ត និងការអនុគ្រោះ ។
ជំពូកទី៦ កិច្ចការពារអ្នកប្រើប្រាស់មាន៥មាត្រា(មាត្រា២៩ដល់មាត្រា៣៣) ។ ជំពូកទី៦នេះ ចែងអំពីព័ត៌មានអប្បបរមាក្នុងពាណិជ្ជកម្មតាមប្រព័ន្ធអេឡិចត្រូនិក ទំនាក់ទំនងពាណិជ្ជកម្ម ដែលមិនបានស្នើសុំការបង្កើតប្រព័ន្ធអេឡិចត្រូនិកក្លែងបន្លំ និងកូដព្យាបាទ ការការពារទិន្នន័យ និងការអនុវត្តបទប្បញ្ញត្តិទាក់ទងនឹងកិច្ចការពារអ្នកប្រើប្រាស់ ។
ជំពូកទី៧ សកម្មភាពនិងប្រតិបត្តិការរបស់រដ្ឋ តាមប្រព័ន្ធអេឡិចត្រូនិកមាន១មាត្រា(មាត្រា៣៤) ។ ជំពូកទី៧នេះ ចែងអំពីការទទួលស្គាល់ទំនាក់ទំនងអេឡិចត្រូនិកដោយស្ថាប័នរដ្ឋ។
ជំពូកទី៨ ភ័ស្តុតាងអេឡិចត្រូនិកមាន១១មាត្រា(មាត្រា៣៥ដល់មាត្រា៤៥) ។ ជំពូកទី៨នេះ ចែងអំពីការទទួលយកជាទូទៅនៃភ័ស្តុតាងអេឡិចត្រូនិក សុក្រឹតភាពនៃប្រព័ន្ធអេឡិចត្រូនិក សុក្រឹតភាពនៃព័ត៌មាន ឯកសារដែលបានបោះពុម្ពចេញ បន្ទុកក្នុងការបង្ហាញអំពីយថាភូតភាពនៃភ័ស្តុតាងអេឡិចត្រូនិក បទដ្ឋាននៃការកត់ត្រាឬការរក្សាទុកកំណត់ត្រាអេឡិចត្រូនិក ការចេញលិខិតបញ្ជាក់យថាភូតភាព នីតិវិធីផ្សេងទៀតក្នុងការបង្កើតភ័ស្តុតាងអេឡិចត្រូនិក ការបំពានលើកូដនីយកម្ម ការទទួលយកកំណត់ត្រាអេឡិចត្រូនិកពីបរទេស និងការទទួលយកព័ត៌មានអេឡិចត្រូនិកមកពីបរទេស ។
ជំពូកទី៩ ការទូទាត់ និង/ឬការផ្ទេរប្រាក់តាមអេឡិចត្រូនិកមាន៣មាត្រា(មាត្រា៤៦ដល់មាត្រា៤៨) ។ ជំពូកទី៩នេះ ចែងអំពីប្រតិបត្តិ ការទូទាត់តាមប្រព័ន្ធអេឡិចត្រូនិក ការទទួលខុសត្រូវរបស់បុគ្គលផ្តល់សេវាទូទាត់ និងការទទួលខុសត្រូវរបស់អតិថិជន ។
ជំពូកទី១០ សមត្ថកិច្ច ការប្តឹងតវ៉ា និងនីតិវិធីនៃការផាកពិន័យមាន៣មាត្រា(មាត្រា៤៩ដល់
មាត្រា៥១) ។ ជំពូកទី១០នេះ ចែងអំពីសមត្ថកិច្ចនីតិវិធីនៃការប្តឹងតវ៉ា និងនីតិវិធីនៃការផាកពិន័យ ។
ជំពូកទី១១ ទោសប្បញ្ញត្តិមាន១៤មាត្រា(មាត្រា៥២ដល់មាត្រា៦៥) ។ ជំពូកទី១១នេះ ចែង
អំពីទណ្ឌកម្ម និងការផាកពិន័យ ។
ជំពូកទី១២ អវសានប្បញ្ញត្តិ មាន២មាត្រា(មាត្រា៦៦ដល់មាត្រា៦៧) ។ ជំពូកទី១២នេះចែងអំពីការនិរាករណ៍ច្បាប់ និងបទប្បញ្ញត្តិទាំងឡាយដែលផ្ទុយនឹងច្បាប់នេះ និងការអនុវត្តច្បាប់នេះ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ