ខេត្តកំពង់ចាម ៖ កម្លាំងសមត្ថកិច្ចបានបើកកិច្ចប្រតិបត្តិការបង្ក្រាបបទល្មើសនេសាទនៅតាមបណ្តាស្រុកចំនួន០៣ ក្នុងនោះមាន ស្រីសន្ធរ កងមាស កោះសូទិន ដោយបានធ្វើពេញ១ថ្ងៃនៅថ្ងៃទី០៨ តុលានេះ រឹបអូសបានស្បៃមុងរាប់ពាន់ម៉ែត្រ និងចាក់លែងកូនត្រីចំរុះរាប់រយគីឡូក្រាម ចូលទៅក្នុងបឹងធម្មជាតិ និងបានដុតបំផ្លាញចោលស្បៃមុងផងដែរ។
លោកឧត្តមសេនីយ៍ ទោឯម កុសល ស្នងការនគរបាលខេត្តបានឲ្យដឹងថា អនុវត្តន៍តាមការណែនាំរបស់លោកអភិបាលខេត្តក៏ដូចជា អគ្គស្នងការនគរបាលជាតិឲ្យយកចិត្តទុកដាក់ក្នុងការបង្ក្រាបបទល្មើសនេសាទមិនថា រដូវណានោះទេ ជាក់ស្តែងនៅព្រឹកថ្ងៃខាងលើកម្លាំងនគរបាលការិយាល័យប្រឆាំងបទល្មើសសេដ្ឋកិច្ចខេត្តចុះបង្ក្រាបបទល្មើសនេសាទត្រង់ភូមិសាស្ត្រទន្លេខ្ពប ឃុំព្រែកដំបូក ស្រុកស្រីសន្ធរ ដោយរឹបអូសបានលូស្បៃមុងចំនួន១១មាត់ របាំងលូស្បៃមុង ប្រវែង១.៧០០ម៉ែត្រ បង្គោលចម្រឹងឫស្សីចំនួន៥០០បង្គោល ចាក់លែងកូនត្រីចំរុះនៅក្នុងទន្លេវិញចំនួន៣៥០គីឡូក្រាម ។
លោកឧត្តមសេនីយ៍ទោស្នងការបានបន្តថា សកម្មភាពបង្ក្រាបបទល្មើសនេសាទលើកទី២ ដោយមានកម្លាំងរបស់ខេត្តបានសហការជានគរបាលស្រុកកងមាស អាវុធហត្ថ និងអាជ្ញាធរមូលដ្ឋាននៅត្រងចំនុចបឹងបេ៦ នៅឃុំខ្មៅ ស្រុកកងមាស លទ្ធផលទទួលបាន ស្បៃមុង១៩៣មាត់ បង្គោលចំនួន១.៥៤៤ដើម ចាក់លែងកូនត្រី ទៅក្នុងបឹងធម្មជាតិវិញចំនួន៧៣៣គីឡូក្រាម ។
ករណីទី៣ នៅចំនុចចុងព្រែករកាកោងអ្នកតារាំជ្រុំ (អតីតឡូត៍នេសាទលេខ៩) កម្លាំងនគរបាលបានសហការបើកការបង្ក្រាបជាមួយនឹងអាជ្ញាធរមូលដ្ឋានបាន ស្បៃមុង ចំនួន២៧មាត់ របាំងលូស្បៃមុងប្រវែង៩១០ម៉ែត្រ បង្គោលចម្រឹងឫស្សីចំនួន៦៧៥ដើម ចាក់លែងកូនត្រីទៅក្នុងបឹងធម្មជាតិវិញចំនួន៣៥គីឡូក្រាម ។
លោកស្នងការនគរបាលខេត្តបញ្ជាក់ថា ចំពោះសម្ភារៈដែលរឹបអូសបានដោយមានការឯកភាពពីលោកហួត វុទ្ធី ព្រះរាជអាជ្ញាអមសាលាដំបូងខេត្ត វត្ថុតាងចំនួន៣ករណី ត្រូវបានដុតបំផ្លាញចោលជាមួយនោះ រូបលោកក៏បានឲ្យកម្លាំងនគរបាលនៅក្រោមឪវាទត្រូវបន្តសកម្មភាពបង្ក្រាបបទល្មើសក្នុងអតីតឡូត៍នេសាទនៅជាប់ និងដងទន្លេមេគង្គ និងកន្លែងផ្សេងទៀតឲ្យបានដូចភ្លៀងរលឹម ៕ កែសម្រួលដោយ ៖ សុឃាក់
ចែករំលែកព័តមាននេះ