ខេត្តពោធិ៍សាត់ ៖ សេចក្តីរាយការណ៍បឋមបានឲ្យដឹងថា បុរសម្នាក់បានដើរជាន់គ្រាប់មីន បណ្ដាលឲ្យផ្ទុះដាច់ជើងម្ខាង ខណៈពេលទៅមើលស្រូវនៅចំការត្រង់ចំណុច៨៥ ស្ថិតក្នុងភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់…
ខេត្តពោធិ៍សាត់ ៖ សេចក្តីរាយការណ៍បឋមបានឲ្យដឹងថា បុរសម្នាក់បានដើរជាន់គ្រាប់មីន បណ្ដាលឲ្យផ្ទុះដាច់ជើងម្ខាង ខណៈពេលទៅមើលស្រូវនៅចំការត្រង់ចំណុច៨៥ ស្ថិតក្នុងភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់ កាលពីវេលាម៉ោង០៨និង៣០នាទីព្រឹក ថ្ងៃទី០៨ ខែតុលា ឆ្នាំ២០១៩ ។
សេចក្តីរាយការណ៍បានបន្ត សមត្ថកិច្ចមូលដ្ឋានឲ្យដឹងថា ជនរងគ្រោះឈ្មោះ ឈន វីរៈ ភេទប្រុស អាយុ២៩ឆ្នាំ រស់នៅភូមិឃុំកើតហេតុខាងលើ ។ ទាក់ទិននឹងករណីនេះ សមត្ថកិច្ចបញ្ជាក់ថា នៅព្រឹកនោះជនរងគ្រោះបានដើរទៅមើលដំណាំស្រូវ ដែលដាំនៅក្នុងចំការត្រង់ចំណុច៨៥ ។ ខណៈពេលកំពុងដើរលើដីទាបខ្ពស់ៗដោយមានស្មៅ និងព្រៃដុះប៉ប្រះៗផងនោះចៃដន្យក៏ជាន់ចំគ្រាប់មីនបណ្ដាលឲ្យផ្ទុះដាច់ជើងស្ដាំតែម្ដង ។
ជនរងគ្រោះត្រូវបានក្រុមគ្រួសារបញ្ជូនទៅសង្គ្រោះនៅឯមន្ទីរពេទ្យខេត្តត្រាតប្រទេសថៃ ដោយសារឃុំថ្មដាមានចំងាយឆ្ងាយជិត២០០គីឡូម៉ែត្រពីទីរួមខេត្តពោធិ៍សាត់ ។
គួររំលឹកថា នៅស្រុកវាលវែងប្រជាពលរដ្ឋតែងតែជួបគ្រោះថ្នាក់ដោយសារគ្រាប់មីនជារៀងរាល់ឆ្នាំ ដោយសារចូលព្រៃកាប់ឈើធ្វើផ្ទះ រកអុស រកផ្សិត ជីកដំឡូង ដាក់អន្ទាក់សត្វ ពិសេសការកាប់គាស់រឺភ្ជួរដីដាំស្រូវ និងធ្វើចំការជាដើម ។ គ្រាប់មីន និងគ្រាប់យុទ្ធភ័ណ្ឌទាំងនោះកប់ក្នុងដីដែលបន្សល់ទុកកាលពីសម័យសង្គ្រាម ហើយនឹងនៅមានកប់ក្នុងដីគ្រាប់ទីកន្លែងជាច្រើនទៀតដែលបងប្អូនប្រជាពលរដ្ឋយើងត្រូវតែមានការប្រុងប្រយ័ត្នជាប់ជានិច្ច ។
អាជ្ញាធរមូលដ្ឋានឲ្យដឹងថា ក្នុងឆ្នាំ២០១៩នេះ មានប្រជាពលរដ្ឋប្រមាណ០៦នាក់ ដែលរងគ្រោះដោយសារគ្រាប់មីននៅស្រុកវាលវែង ៕ កែសម្រួលដោយ ៖ សុឃាក់
ចែករំលែកព័តមាននេះ