រាជធានីភ្នំពេញ ៖ អ្នកប្រកបមុខរបរលក់សៀវភៅបានត្អូញត្អែរថ្ងូរដូចព្រាប ខណៈដែលចំនួនអ្នកអានសៀវភៅមានការថយចុះស្ទើរតែលែងមានទៅហើយនោះ ស្របពេលដែលប្រទេសកម្ពុជារបស់យើងកំពុងតែមានការរីកចម្រើន ប្រព័ន្ធបច្ចេកវិជ្ជាទំនើបៗកំពុងតែមានការវិវឌ្ឍន៍ ទៅមុខ កាន់តែជឿនលឿនទៅមុខកាន់តែខ្លាំង ជាពិសេសគឺទូរស័ព្ទដៃស្មាតហ្វូនកាន់តែទំនើបទៅៗបម្រើបាននូវគ្រប់តម្រូវការអ្វីដែលអ្នកចង់ដឹង ចង់មើលទាំងអស់ ។
ដោយហេតុនេះហើយ បានធ្វើឱ្យមនុស្សជាច្រើនងាកទៅរកការប្រើទូរស័ព្ទដៃស្មាតហ្វូនទំនើប ដោយគ្រាន់តែចុចអាចមើលឃើញទាំងអស់ និងបានធ្វើឱ្យមនុស្សជាច្រើនងាកទៅរកការប្រើប្រាស់វា ធ្វើឱ្យចំនួនអ្នកអានសៀវភៅដែលបោះពុម្ព មានការធ្លាក់ចុះយ៉ាងខ្លាំងស្ទើរតែលែងមានទៅហើយ ។
ស្ត្រីឈ្មោះ សួង វណ្ណា អាយុ ៥៣ឆ្នាំ ជាអ្នកលក់សៀវភៅនៅក្បែរសាលាវិទ្យាល័យព្រះយុគន្ធរបានប្រាប់ឱ្យដឹងថា ការលក់សៀវភៅអានរបស់គាត់សព្វថ្ងៃមានការធ្លាក់ចុះយ៉ាងខ្លាំងស្ទើរតែអស់គ្មានសល់ និងនៅមានលក់តែបន្តិចបន្តួចប៉ុណ្ណោះ ពោលគឺចាប់តាំងពីកើតមានទូរស័ព្ទបច្ចេកវិជ្ជាទំនើបមកនោះ ។ គាត់ថាដោយខុសកាលពីពេលមុនមានមនុស្សចូលចិត្តអានសៀវភៅច្រើន ហើយរូបគាត់ក៏បានកម្មង់ យកសៀវភៅជាច្រើនយកមកដាក់លក់ដែលមានដូចជា ទស្សនាវដ្តី កាសែត សៀវភៅរឿង និងសៀវភៅច្បាប់ លក់ដាច់យ៉ាងខ្លាំង។
អ្នកស្រីក៏បានប្រាប់បន្តទៀតថា លុះមកដល់មួយរយះក្រោយនេះ ការលក់សៀវភៅអានរបស់គាត់គ្រប់ប្រភេទលក់លែងដាច់ដូចមុន ដោយសារតែអ្នកធ្លាប់ទិញសៀវរបស់គាត់យកទៅអាន គេចង់មើលរឿង ឬក៏អ្វីមួយនោះ គឺគេគ្រាន់តែចុចទូរស័ព្ទគេអាចមើលបានទាំងអស់។ ចំណែកឯការលក់សៀវភៅរបស់គាត់សព្វថ្ងៃនេះ គឺនៅលក់ដាច់តែប្រភេទសៀវភៅពុម្ពរបស់ក្មេងរៀន សៀវភៅសរសេរធម្មតា ការសែត រួមទាំងឧបករណ៍សិក្សារបស់ក្មេងរៀនតិចប៉ុណ្ណោះ។ ចំណែកក្រៅពីនេះលក់លែងដាច់់ហើយ និងប្រាក់ចំណូលក៏វាមានការធ្លាក់ចុះខ្លាំងដែរ ។
ស្ត្រីអ្នកលក់ម្នាក់ឈ្មោះ ហ៊ុន ណាវី អាយុ ៤៩ឆ្នាំ ដែលមានតូបលក់សៀវភៅក្បែរគ្នានេះក៏បានប្រាប់ដែរថា មុខរបរលក់សៀវភៅរបស់គាត់សព្វថ្ងៃនេះ គឺមានការធ្លាក់ចុះយ៉ាងខ្លាំង និងស្ទើរតែលែងមានអ្នកមករកទិញយកទៅអានទាល់តែសោះតែម្តង ។ ចំណែកឯប្រាក់់ចំណូលក៏មានការធ្លាក់ចុះ និងជីវភាពរស់នៅកាន់តែមានការលំបាកលំបិនជាងមុនទៅទៀត ។ តូបរបស់គាត់មានលក់ទស្សនាវដ្តី កាសែត សៀវភៅពុម្ពថ្នាក់ទី១ ថ្នាក់ទី២ ថ្នាក់ទី៣ រហូតទៅដល់សៀវភៅពុម្ពថ្នាក់ទី១២ ទៅតាមកម្មវិធីសិក្សាររបស់រដ្ឋ ក្រៅពីនោះនៅមានសៀវភៅរឿងនិទាន អង់គ្លេស វចនានុក្រម សៀវភៅភាសាចិន ភាសាវៀតណាមជាដើម ។
ស្ត្រីដដែលបានរៀបរាប់ ប្រាប់បន្តទៀតថា កាលពីមុនទស្សនាវដ្តី និងកាសែតតែងតែមានអ្នកមកទិញយកទៅអានច្រើនណាស់ តែនៅពេលនេះនៅលក់ដាច់ តិចតួចប៉ុណ្ណោះ តែសម្រាប់សៀវភៅអានផ្សេងៗមួយចំនួនធំវិញគឺលក់លែងដាច់តែម្តង ។ ប៉ុន្តែសម្រាប់ប្រភេទជាសៀវរឿង ដែលជាប់ពាក់ព័ន្ធទៅនិងមេរៀនសំរាប់ប្រលងសិស្សថ្នាក់ទី៩និងទី១២ក៏នៅលក់ដាច់ខ្លះដែរ ។
ពាក់ព័ន្ធទៅនឹងការធ្លាក់ចុះនៃការលក់សៀវភៅអាននេះដែរ កើតឡើងក្រោយពីទូរស័ព្ទដៃស្មាតហ្វូនចេញមក ដោយគេចង់មើលអ្វីគ្រាន់តែចុចឈ្មោះនោះ គឺគេអាចមើលឃើញទាំងអស់ នេះហើយជាហេតុដែលធ្វើឱ្យគេមិនបាច់ទិញសៀវភៅយកទៅអានដូចពេលមុនៗទៀតនោះ ។ ការប្រកបមុខរបរលក់ សៀវភៅ លក់កាសែតរបស់គាត់នៅទីនេះមានរយៈពេលជាង២០ឆ្នាំមកហើយ ដោយកាលពីមុនលក់ដាច់អាចរកចំណូលបានច្រើន តែពេលនេះមិនសូវមានអ្នកអានសៀវភៅលក់លែងដាច់ប្រាក់ចំណូលក៏វាមានការថយចុះខ្លាំងដែរ ។
ស្ត្រីឈ្មោះ សុខ ខេង អាយុ៥៦ឆ្នាំ អ្នកលក់សៀវភៅនៅក្បែររបងវត្តទួលទំពូងបានប្រាប់ឱ្យដឹងថា តូបរបស់គាត់រាល់ថ្ងៃគឺ មិនមានសៀវភៅអានដាក់លក់ទៀតហើយ ដោយសារតែមិនមានអ្នកទិញ និងយកមកលក់មិនដាច់នោះ ដោយនៅមានលក់តែកាសែត ទស្សនាវដ្ដី សៀវភៅក្មេងរៀន និងសៀវភៅសរសេរក្មេងបន្តិចបន្តួចប៉ុណ្ណោះ ។ កាលពីមុនរូបគាត់យកកាសែតមកលក់ ក្នុងមួយថ្ងៃចាប់ពី៥០ទៅ ៦០ច្បាប់ ។ ចំណែកឯសៀវភៅទស្សនាវដ្តីវិញយកមកលក់ម្តងៗ២០ទៅ៣០ក្បាល តែឥឡូវក្នុងមួយថ្ងៃកាសែត លក់មួយថ្ងៃបានតែចំនួន៣០ទៅ៤០ច្បាប់ ហើយទស្សនាវដ្តីកន្លះខែចេញម្តងយកមកតែ៦ទៅ៧ក្បាលក៏លក់មិនអស់ដែរ ។
ស្ត្រីដដែលបានរៀបរាប់ប្រាប់បន្តទៀតថា កាលពី២ទៅ៣ឆ្នាំមុនមកទល់នឹងពេលនេះ គឺការលក់កាសែត ទស្សនាវដ្តី និងសៀវភៅអាន ផ្សេង គឺមានការខុសគ្នាឆ្ងាយណាស់ ដោយសារតែពេលនេះគេមានទូរស័ព្ទស្មាតហ្វូនមួយគេអាចមើលអ្វីបានទាំងអស់ និងដឹងគ្រប់រឿង ។ ដូច្នេះហើយបានជាប្រភេទសៀវភៅអានមួយចំនួនដូចជា សៀវភៅរឿងព្រេងនិទាន សៀវភៅប្រលោមលោកផ្សេងៗ គឺគាត់ឈប់យកមកលក់ដូចមុនទៀតហើយ។
ចំណែកឯប្រាក់ចំណូលក៏ថយចុះច្រើនដែរ ដោយកាលពីមុនក្នុងមួយថ្ងៃរកប្រាក់ចំណេញបានចាប់់ពី៥ទៅ៦ម៉ឺនរៀល តែពេលនេះនៅសល់ត្រឹមតែមួយថ្ងៃចំនួនពី២ទៅ៣ម៉ឺនរៀលប៉ុណ្ណោះ ៕ (កែសម្រួលដោយ ៖ បុប្ផា)
ចែករំលែកព័តមាននេះ