អ្វីជាច្រើនក្នុងជីវិតកើតចេញមកពីទំនាក់ទំនងរវាងមនុស្ស និងមនុស្ស ហើយមនុស្សលោកពឹងផ្អែកលើសហគមន៍ដែលពួកគេរស់នៅក្នុង ។ ជាការពិតជាក់ស្តែង ភាពជោគជ័យរបស់បុគ្គល និងអាជីវកម្មក៏មានការពឹងពាក់ច្រើនលើទំនាក់ទំនងដែលបុគ្គលមានជាមួយអ្នកដទៃដែរ ។ ប៉ុន្តែការកសាងទំនាក់ទំនងដែលត្រឹមត្រូវ និងមានប្រយោជន៍មិនតែងតែងាយស្រួលឡើយ ។ ដូច្នេះប្រសិនបើអ្នកចង់បង្កើតទំនាក់ទំនងដែលអាចជួយអ្នកក្នុងការដើរឆ្ពោះទៅរកភាពជោគជ័យ ចូរអនុវត្តតាមគន្លឹះមូលដ្ឋានខាងក្រោមនេះ៖
១. និយាយជាមួយមនុស្សគ្រប់រូបនៅគ្រប់ទីកន្លែង៖
គោលការណ៍មូលដ្ឋានដែលមនុស្សជោគជ័យតែងតែគោរព គឺការមានចិត្តចង់និយាយជាមួយមនុស្សគ្រប់រូប មិនថាពួកគេនៅកន្លែងណាឡើយ ។ លោក Jeff Hoffman ដែលជាសហស្ថាបនិករបស់ក្រុមហ៊ុន Priceline បានកត់សម្គាល់ថា ទោះជាលោកឈរទិញអាហារក៏លោកអាចចាប់ផ្តើមការសន្ទនាជាមួយអ្នកដែលឈរជិតលោកបានដែរ ។
២. សុំមិត្តភក្តិ និងមនុស្សដែលស្គាល់ឲ្យជួយណែនាំ៖
មិត្តភក្តិ និងមនុស្សដែលអ្នកស្គាល់អាចស្គាល់មនុស្សដែលចែករំលែកគោលការណ៍ និងគោលដៅដូចអ្នកដែរ ហើយការណែនាំដែលឆ្លងកាត់មនុស្សអាចផ្តល់ភាពជោគជ័យច្រើនដល់អ្នកក្នុងការបង្កើតទំនាក់ទំនងដែលមានន័យ ។
៣. កុំគិតថាអ្នកពូកែជាងអ្នកមានបទពិសោធន៍៖
មិនថាអ្នកស្ថិតក្នុងដំណាក់កាលណានៃជីវិតទេ អ្នកមិនគួរឈប់ស្វែងរកអ្នកណែនាំឡើយ ។ ដូច្នេះប្រសិនបើអ្នកមានឱកាសក្នុងការស្គាល់មនុស្សដែលមានបទពិសោធន៍ច្រើនជាងអ្នក អ្នកគួរតែឲ្យតម្លៃលើទំនាក់ទំនងនេះ ជាពិសេសប្រសិនបើពួកគេមកពីវិស័យខុសពីអ្នក ឬមានទស្សនៈខុសពីអ្នក ព្រោះអ្នកអាចរៀនសូត្របានច្រើន ។
៤. រក្សាទំនាក់ទំនង៖
មនុស្សជាច្រើនមានទម្លាប់បង្កើតទំនាក់ទំនងជាមួយអ្នកដទៃ ប៉ុន្តែមិនដែលទាក់ទងទៅពួកគេរហូតដល់បាត់បង់ទំនាក់ទំនងទាំងស្រុង ។ អ្នកគួរតែមានទំនួលខុសត្រូវក្នុងការរំឭកខ្លួនឯងឲ្យបន្តទាក់ទងយ៉ាងតិចណាស់ជារៀងរាល់ ២ ទៅ ៣ខែម្តងជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ