ក្រុងហុងកុង ៖ សមាជិកម្នាក់នៃក្រុមប្រឹក្សាប្រតិបត្តិក្រុងហុងកុងថ្លែងនាថ្ងៃទី៧តុលាថា រដ្ឋាភិបាលហុងកុងគ្រោងកម្រិតការប្រើអ៊ីនធើរណេត ៣ថ្ងៃបន្ទាប់ពីការហាមឃាត់មិនឲ្យពាក់ម៉ាស់ក្នុងការប្រមូលផ្ដុំមនុស្សតវ៉ា ដែលផ្ទុយពីគោលដៅវាបែរជាបង្កើនការតវ៉ាទៅវិញ។
លោកIP KWOK HIMសមាជិកមួយរូបនៃក្រុមប្រឹក្សាប្រតិបត្តិនិងជាសមាជិកសភាស្និទ្ធក្រុងប៉េកាំងថ្លែងប្រាប់សារព័ត៌មានថា រដ្ឋាភិបាលមិនបដិសេធឡើយ លទ្ធភាពហាមឃាត់អ៊ីនធើរណេត។ ទោះបីយ៉ាងណាលោកគូសបញ្ជាក់ថា ការរិតត្បិតក្នុងការប្រើអីុនធើរណេត នឹងអាចនាំឲ្យមានផលវិបាកអាក្រក់នានាសម្រាប់ហុងកុង។ ខ្ញុំយល់ថាលក្ខខណ្ឌមួយក្នុងចំណោមលក្ខខណ្ឌ អនុវត្តការហាមឃាត់ប្រើអ៊ីនធើរណេត នោះគឺធ្វើយ៉ាងណាមិនឲ្យប៉ះពាល់ ដល់បណ្ដាសហគ្រាសហុងកុង។
ការគំរាមកំហែងថ្មីនោះកើតមានបន្ទាប់ពី៣ថ្ងៃនៃការហាមមិនឲ្យពាក់ម៉ាស់ ក្នុងបាតុកម្មដែលមនុស្សច្រើនសិបពាន់នាក់បានផ្កើន លើកគ្នាតវ៉ាពាក់ម៉ាស់ក្នុងដែនដីហុងកុងទាំងមូល។បណ្ដាស្ថានីយមេត្រូត្រូវអុកឡុកបំផ្លាញដោយពួកបាតុកររ៉ាឌីកាល់ក្រុមតូចៗ ហើយមួយផ្នែកនៃបណ្ដាញមេត្រូនៅមិនដំណើរការផងពេលចុងសប្ដាហ៍។ ស្ថានីយមេត្រូនិងហាងទំនិញនានាពុំបើកទ្វារឡើយនាថ្ងៃទី៧តុលា។
បណ្ដាសហគ្រាសដែលមានទំនាក់ទំនងជាមួយចិន ពិសេសបណ្ដាធនាគារក៏ជាគោលដៅនៃការអុកឡុករបស់ពួកបាតុករដែរ។ នាយប់ថ្ងៃទី៧តុលាបណ្ដាក្រុមបាតុកររ៉ាឌីកាល់បានអុកឡុកហាងទាំងឡាយ រាំងខ្ទប់មហាវិថីក្នុងសង្កាត់ជាច្រើន ហើយលុកចូលបំផ្លិចបំផ្លាញក្នុងស្ថានីយមេត្រូ២។ ប៉ូលិសបានប្រើឧស្ម័នបង្ហូរទឹកភ្នែក យ៉ាងតិចក្នុងកន្លែង៣។ នារសៀលថ្ងៃទី៧តុលាពួកបាតុករពាក់ម៉ាស់បិទមុខបានចូលអុកឡុកមជ្ឈមណ្ឌលពាណិជ្ជកម្មជាច្រើន៕ (កែសម្រួលដោយ ៖ បុប្ផា)
ចែករំលែកព័តមាននេះ