រាជធានីភ្នំពេញ ៖ រហូតមកដល់ពេលនេះ សំឡេងនៃការរិះគន់ពីសំណាក់ទស្សនិកជនខ្មែរចំពោះភាពយន្តរឿង «ពិសស្នេហ៍» ដែលត្រូវបានផលិតដោយស្ថានីយទូរទស្សន៍ប៉ុស្តិ៍លេខ ៥ ដោយបានចម្លងសាច់រឿងទាំងស្រុងពីរឿងថៃ ហើយត្រូវភាគីថៃបានចោទប្រកាន់នោះនៅមិនទាន់អស់កំដៅនៅឡើយទេ ។
ទស្សនិកជនខ្លះបានស្នើសុំឲ្យម្ចាស់ផលិតករនៃរឿងនេះ ចេញមុខមកបកស្រាយ និងពន្យល់ជាសាធារណៈមួយជុំវិញបញ្ហាខាងលើនេះ ខណៈពេលរហូតមកដល់ថ្ងៃទី៨ ខែតុលា ឆ្នាំ២០១៩នេះ គេនៅមិនទាន់បានឃើញការចេញមុខបកស្រាយណាមួយពីតំណាងស្ថានីយទូរទស្សន៍ប៉ុស្តិ៍លេខ ៥ នៅឡើយទេ ។
យ៉ាងណាក៏ដោយជុំវិញបញ្ហាខាងលើនេះ អ្នកនិពន្ធ និងអ្នកដឹកនាំភាពយន្តខ្មែរមួយចំនួនបាននាំគ្នាបញ្ចេញនូវគំនិត និងយោបល់ជុំវិញបញ្ហាទាំងនេះ ដោយនៅក្នុងនោះពួកគេសុទ្ធតែយល់ឃើញស្រដៀងគ្នាថា បញ្ហានេះមកពីប៉ុស្តិ៍លេខ ៥ មានអ្នកគ្រប់គ្រងជាជនជាតិថៃ ចំណែកផលិតករភាគច្រើនក៏ជាជនជាតិថៃ ។
ផលិតករលោក មុត ថារី បានលើកឡើងថា រឿងនេះនិយាយ ឬសរសេរថើៗមិនបានទេ ព្រោះគេកំពុងតែចោទប្រកាន់ថា អ្នកដឹកនាំរឿងខ្មែរលួចចម្លងរបស់ថៃយកមកបកប្រែថត សូម្បីតែការពិត គឺអ្នកគ្រប់គ្រងទូរទស្សន៍ប៉ុស្តិ៍លេខ ៥ ខេមរភូមិន្ទ ដែលកំពុងដឹកនាំ នឹងថតសព្វថ្ងៃក្រោមការគ្រប់គ្រងរបស់ជនជាតិថៃក៏ដោយ ។ ម្យ៉ាងទៀតបើគេឱ្យខ្មែរផលិតវិញ គឺគេយកសេណារីយូររឿងថៃមកឱ្យខ្មែរបកប្រែថតក្នុងតម្លៃថោកៗ ថតមិនបានល្អ គេថាខ្មែរថតអន់ជាងកាលថៃថត ។
លោកបញ្ជាក់ថា អស់លោកអ្នកដែលពាក់ព័ន្ធក្នុងផ្នែកនេះត្រូវតាមដានឲ្យច្បាស់ ដើម្បីកុំឱ្យគេប្រមាថមើលស្រាលផលិតករដឹកនាំរឿងខ្មែរដ៏មហាកំសត់តទៅទៀត ។
ក្នុងនោះផងដែរ ក៏មានអ្នកនិពន្ធរឿងជើងចាស់មួយរូបគឺលោក នួន សង្វាត ក៏បានឲ្យដឹងដែរថា លោកធ្លាប់ទាក់ទងទៅខាងប៉ុស្តិ៍លេខ ៥ ដើម្បីដាក់រឿងភាគរបស់លោក តែគេមិនយក គេយកតែរឿងថៃមកបកដើម្បីថតឡើងវិញប៉ុណ្ណោះ ។
លោកថា៖ «ខ្ញុំក៏ធ្លាប់ទាក់ទងទៅខាងប៉ុស្តិ៍ខ្មែរមួយហ្នឹង ដើម្បីដាក់រឿងភាគមួយរបស់ខ្ញុំដែរ ប៉ុន្តែត្រូវអ្នកការងារនៅទីនោះប្រាប់មកវិញថា គេមិនយករឿងខ្មែរទេ ព្រោះអ្នកដឹកនាំនៅទីនោះជាជនជាតិថៃ ដូចនេះគេយកតែរឿងថៃមកបកដើម្បីថតឡើងវិញប៉ុណ្ណោះ ។ ដូចនេះរឿងនេះ វាអត់មានចម្លែកទេ ដែលជនជាតិថៃទើបតែភ្ញាក់ផ្អើលរឿងទូរទស្សន៍ខ្មែរមួយយក Scripts រឿងថៃ មកឲ្យខ្មែរថតឡើងវិញនោះ វាមិនខុសអីទេ បើសិនជាម្ចាស់ដើមខាងថៃគេព្រមឲ្យយើងចម្លងមែន។
តែអ្វីដែលសំខាន់ តើគុណភាពយើងអាចទៅរួចជាមួយគេ ឬអត់? តែក៏សុំចិត្ត បើជាប៉ុស្តិ៍នៅស្រុកយើង គួរតែជំរុញរឿងរបស់ខ្មែរខ្លះទៅហ្អី? តែសំខាន់ក្រសួងយើងអនុញ្ញាតដែរហ្នុងណា៎…ទ្រាំធ្វើអន់ទៀតទៅន៎ ។
ចំណែកអតីតប្រធានសមាគមភាពយន្តកម្ពុជា និងជាចាងហ្វាងផលិតកម្មដើមត្នោត លោក ឆាយ បូរ៉ា ក៏បានបញ្ជាក់ថា ទូរទស្សន៍ប៉ុស្តិ៍លេខ ៥ ដែលជាម្ចាស់គឺជនជាតិថៃ ។ គាត់អាចឆ្លើយសំណួររបស់អ្នក ។ រឿងភាគច្រើនដែលផលិតនៅក្នុងទូរទស្សន៍ប៉ុស្តិ៍លេខ ៥ គឺយក Scripts មកពីថៃ ។ គាត់អាចឆ្លើយទៅទំព័រនេះ ។ ខ្ញុំធ្លាប់លឺ TV5 ទិញសិទ្ធិ Scripts ថៃជាផ្លូវការ ។
លោកបញ្ជាក់ថា ខ្ញុំជាអ្នកផលិតខ្សែភាពយន្ត និងជាអ្នកដឹកនាំរឿងជនជាតិកម្ពុជា ខ្ញុំគោរពសិទ្ធិថតចម្លង និងប្រយុទ្ធប្រឆាំងនឹងការលួចចម្លង ។
គួរំលឹកថា រឿង «ពិសស្នេហ៍» របស់ទូរទស្សន៍ប៉ុសិ៍លេខ ៥ ដែលយកលំនាំតាមរឿងថៃ បន្ទាប់ពីរឿងនេះចាក់បញ្ចាំងមិនទាន់បានប៉ុន្មានថ្ងៃផងនោះ ស្រាប់តែមានការរិះគន់យ៉ាងខ្លាំងពីទស្សនិកជនខ្មែរនៅពេលដែលរឿងនេះបានយកលំនាំស្ទើរទាំងស្រុងពីរឿងថៃ ។
រលកនាការរិះគន់នេះ បានកើតឡើងបន្ទាប់ពីផេកហ្វេសប៊ុករបស់ថៃមួយបានធ្វើការប្រៀបធៀបរឿង «ពិសស្នេហ៍» របស់ខ្មែរដូចគ្នាទៅនឹងរឿងថៃរបស់គេ ក្នុងន័យចំអក ។ បញ្ហានេះបានធ្វើឱ្យទស្សនិកជនខ្មែរជាច្រើនបានចេញមកនាំគ្នារិះគន់ចំពោះផលិតកររបស់ទូរទស្សន៍ប៉ុស្តិ៍លេខ ៥ ដែលបានធ្វើរឿងនាំឱ្យអាប់ឱនដល់មុខមាត់ប្រទេសកម្ពុជា ។
គួររំលឹកទៀតថា ៖ ផ្ទុះការរិះគន់រឿង «ពិសស្នេហ៍» ក្រោយដាក់បញ្ចាំងមិនទាន់បានប៉ុន្មានថ្ងៃ ៕ (កែសម្រួលដោយ ៖ បុប្ផា)
ចែករំលែកព័តមាននេះ