ខេត្តកណ្តាល ៖ សេចក្តីរាយការណ៍បឋមបានឲ្យដឹងថា កម្មកររោងចក្រកាត់ដេរសម្លៀកបំពាក់ក្រុមហ៊ុន «ស្កាយឡាញ អឹភែរឹល» (អគារ០៣) នៃសួនឧស្សាហកម្មសំរោងធំ ស្ថិតក្នុងភូមិព្រែកត្រែង០២ ឃុំសំរោងធំ ស្រុកកៀនស្វាយ ខេត្តកណ្តាល កម្មករបានដួលសន្លប់ ចំនួន០៣នាក់ និងបានដួលសន្លប់បន្តបន្ទាប់គ្នា កាលពីព្រឹកថ្ងៃទី០៨ ខែតុលានេះ ត្រូវបានគេដឹកបញ្ជូនយកទៅព្យាបាលនៅមណ្ឌលសុខភាពឃុំគគីរធំ ។
បើតាមកម្មករជាច្រើនដែលបំរើការងារនៅក្នុងរោងចក្រមួយនេះបានលើកឡើងដូចៗគ្នាថាកាលពីយប់ថ្ងៃសៅរ៍ ទី០៥ ខែតុលា ឆ្នាំ២០១៩ មេឃធ្លាក់ភ្លៀងរលឹមលាយឡំជាមួយខ្យល់កន្ទ្រាក់ បណ្តាលឲ្យរោងដែកកម្មករហូបបាយរោងដែកផ្ញើកង់ ម៉ូតូ ឡាន បានបាក់រៀបដល់ដី និងដំបូលពិដានអគារកាត់ដេរប៉ើងរបើកអស់មួយកំណាត់ក្រោយ ។ លុះដល់ព្រឹកឡើងថ្ងៃទី០៧ ខែតុលា កម្មករបានមកដល់រោងចក្រ បំណងចូលធ្វើការងារវិញ ស្រាប់តែឃើញមានពិដានខ្សែភ្លើងធ្លាក់រញ៉េរញ៉ៃ និងសម្នើមទឹកភ្លៀងនៅកន្លែងខ្លួនអង្គុយកាត់ដេរផងនោះ ក៏នាំគ្នាសំណូមពរប្រាប់ទៅខាងរោងចក្រថា កម្មករមិនចូលធ្វើការទេព្រោះខ្លាចឆ្លងចរន្តអគ្គិសនីឆក់មានគ្រោះថ្នាក់ដល់អាយុជីវិត ចាំខាងជាងជួសជុលរួចរាល់ ទើបកម្មករចូលធ្វើការវិញ ។
ប៉ុន្តែខាងរោងចក្រ នៅតែចង់ឲ្យកម្មករធ្វើការងារ តែកម្មករមិនធ្វើបាននាំគ្នាទៅផ្ទះអស់ទៅ ។ រហូតដល់ថ្ងៃទី០៨ ខែតុលានេះ ខាងជាងក៏នៅតែជួសជុលមិនទាន់រួចរាល់ដដែល ហើយតំណាងរោងចក្រចេះតែបង្ខំឲ្យកម្មករចូលធ្វើការ កម្មករគ្មានជំរើសក៏បង្ខំចិត្តចូលធ្វើតាមក្រុមហ៊ុនទៅ ។ ស្រាប់តែកំពុងធ្វើការបានមួយសន្ទុះ ក៏ឮសំឡេងប្រព័ន្ធប្រកាសអាសន្នពន្លឺឡើងធ្វើឲ្យកម្មកររាប់ពាន់នាក់ ភ័យស្លន់ស្លោរត់ប្រសាចចេញមកខាងក្រៅរោងចក្រ ហើយធ្វើឲ្យកម្មករដែលទើបសម្រាលកូនរួច០៣នាក់ ភ័យដួលសន្លប់ក្នុងរោងចក្រត្រូវគេដឹកបញ្ជូនយកទៅសង្គ្រោះនៅមណ្ឌលសុខភាពគគីរធំតែម្តង ។
រឿងដែលគួរឲ្យហួសចិត្តនោះ ខណៈដែលកំពុងស្ថិតក្នុងស្ថានភាពតក់ស្លត់ភ័យខ្លាច និងមានកម្មករដួលសន្លប់រហូតដល់ទៅ០៣នាក់ក៏ដោយក្រុមហ៊ុនរោងចក្រមួយនេះមិនខ្វល់ដែរ នៅតែបង្ខំចង់ឲ្យកម្មករចូលបំរើការងារដូចដើម តែកម្មករទាំងអស់មិនព្រមចូលធ្វើនៅឈរហាលថ្ងៃក្តៅនៅពីមុខអគាររោងចក្រ ព្រោះខាងរោងចក្របិទទ្វារខាងមុខមិនឲ្យកម្មករចេញក្រៅនោះទេ។ រហូតទាល់តែព័ត៌មាននេះដឹងដល់លោក អ៊ូ ឈាង អភិបាលស្រុកកៀនស្វាយចាត់ឲ្យអភិបាលរងមន្ត្រីជំនាញ និងកម្លាំងប៉ូលិសប៉េអឹម ប្រជាការពារភូមិចុះពិនិត្យ និងសម្របសម្រួលជាមួយតំណាងភាគីរោងចក្រចិន មួយសន្ទះរហូតដល់ម៉ោងជាង១០ព្រឹកថ្ងៃដដែល ទើបគេឃើញខាងកម្មករទាំងអស់បានចេញទៅផ្ទះមួយថ្ងៃទៀត ដោយកាត់លុយ៥០% តែថ្ងៃស្អែកទី០៩ ខែតុលាតំណាងក្រុមហ៊ុនគំរាមឲ្យកម្មករត្រូវតែចូលធ្វើការវិញ បើមិនដូច្នោះទេ ក្រុមហ៊ុននឹងបញ្ឈប់ការងារ ។
ពាក់ព័ន្ធបញ្ហានេះដែរ លោក ពៅ គឹមលី អភិបាលរងស្រុកកៀនស្វាយបានប្រាប់អោយដឹងថា ដោយសារតែអ្នកកាន់ឡកំដៅអ៊ុតគាត់មកថ្មីមិនទាន់មានបច្ចេកទេសណាមួយដោយសារខ្វះទឹកទើបធ្វើអោយឡើងកំដៅខ្ពស់ខុសប្រក្រតី បណ្តាលឲ្យប្រព័ន្ធប្រកាសអាសន្នឲ្យសញ្ញាស៊ីរ៉ែនរោទិ៍ឡើង កម្មករឮដូចនេះមានការភិតភ័យស្លន់ស្លោរត់ចេញមកក្រៅ បណ្តាលឲ្យដួលសន្លប់កម្មការិនី០៣នាក់ ឥឡូវបានដឹងខ្លួនទៅផ្ទះរៀងៗខ្លួនវិញអស់ហើយ ។
ចំពោះកម្មករទាំងអស់គេអោយសម្រាក ដោយខាងក្រុមហ៊ុនកាត់លុយ៥០% រង់ចាំខាងក្រុមហ៊ុនជួសជុលរួចរាល់ ទើបឲ្យកម្មករចូលធ្វើការវិញតែបើគេធ្វើមិនទាន់ហើយទេកម្មករក៏មិនទាន់ចូលធ្វើការដែរ ៕ កែសម្រួលដោយ ៖ សុឃាក់
ចែករំលែកព័តមាននេះ