ខេត្តព្រះសីហនុ ៖ បន្ទាប់ពីមានប្រតិកម្មពីប្រជាពលរដ្ឋជាពិសេសមានកិច្ចអន្តរាគមន៏ពីលោក គួច ចំរើន អភិបាលខេត្តព្រះសីហនុនាព្រឹកថ្ងៃទី០៧ ខែតុលា ឆ្នាំ២០១៩ នេះក្រុមការងារក្រុងព្រះសីហនុក្រោមការបញ្ជាផ្ទាល់ពីលោក អ៊ី…
ខេត្តព្រះសីហនុ ៖ បន្ទាប់ពីមានប្រតិកម្មពីប្រជាពលរដ្ឋជាពិសេសមានកិច្ចអន្តរាគមន៏ពីលោក គួច ចំរើន អភិបាលខេត្តព្រះសីហនុនាព្រឹកថ្ងៃទី០៧ ខែតុលា ឆ្នាំ២០១៩ នេះក្រុមការងារក្រុងព្រះសីហនុក្រោមការបញ្ជាផ្ទាល់ពីលោក អ៊ី សុខឡេង អភិបាលក្រុងព្រះសីហនុ ដឹកនាំដោយលោក ជួប សីហា មន្ត្រីសាលាក្រុងបានចុះព្រមានលើការដ្ឋានមួយកន្លែងតាមបណ្តោយផ្លូវ៧មករា កែងផ្លូវឯករាជ្យ ស្ថិតក្នុងក្រុមទី០២ភូមិ០៤ សង្កាត់លេខ០៤ក្រុងព្រះសីហនុ ដោយកំណត់ឱ្យរើសម្ភារសំណង់ចេញពីផ្លូវជាបន្ទាន់មិនឱ្យលើសពីមួយថ្ងៃ ។
យោងតាមប្រភពពីមន្ត្រីសាលាក្រុងដែលបានដឹកនាំក្រុមការងារបានអះអាងថា ដោយមានការអនុញ្ញាតពីលោក អ៊ី សុខឡេង អភិបាលក្រុងព្រះសីហនុលោកបានដឹកនាំក្រុមការងារចម្រុះចុះទៅធ្វើការហាមឃាត់ការដ្ឋានមួយកន្លែងតាមបណ្តោយផ្លូវ៧មករា កែងផ្លូវឯករាជ្យ ស្ថិតក្នុងក្រុមទី០២ភូមិ០៤ សង្កាត់លេខ០៤ ក្រុងព្រះសីហនុ បន្ទាប់ពីក្រុមហ៊ុនសាងសង់ នេះបានយកផ្លូវសាធារណៈផ្ទុកសម្ភារសំណង់បិទផ្លូវប្រជាពលរដ្ឋធ្វើដំណើរមួយចំហៀងផ្លូវបង្កការកកស្ទះយ៉ាងខ្លាំងអស់រយៈពេលជាច្រើនថ្ងៃមកហើយបើទោះបីជាអាជ្ញាធរមូលដ្ឋានចុះទៅធ្វើការណែនាំយ៉ាងណាក្តី ។
ដូចនេះដើម្បីជាការព្រមានអាជ្ញាធរក្រុងសម្រេចធ្វើកំណត់ហេតុរើសម្ភារសំណង់របស់ខ្លួន ចេញពីលើផ្លូវដោយយកសម្ភារសំណង់ចេញ និងត្រូវហ៊ុំព័ទ្ធការដ្ឋានសំណង់របស់ខ្លួនទៅតាមបច្ចេកទេសសាងសង់ឱ្យរួចរាល់ជាមុនសិនទើបអនុញ្ញាតឱ្យបន្តការសាងសង់បន្តទៀត ។
ជុំវិញចំណាត់ការយ៉ាងក្តៅគគុករបស់អាជ្ញាធរក្រុងនេះផងដែរក្រុមប្រជាពលរដ្ឋបានសម្តែងការសាទរយ៉ាងខ្លាំង និងបានស្នើរឱ្យអាជ្ញាធរមូលដ្ឋាន ជាពិសេសមន្ត្រីពាក់ព័ន្ឋរឹងបន្តឹងបន្ថែមទៀតទៅលើក្រុមហ៊ុនសាងសង់ជាច្រើនទៀតដែលគិតតែប្រយោជន៏ផ្ទាល់ខ្លួនផ្ទុកសម្ភារសំណង់ផ្សេងៗនៅលើផ្លូវសាធារណៈ បង្កផលប៉ះពាល់យ៉ាងធ្ងន់ធ្ងរដល់សណ្តាប់ធ្នាប់សាធារណៈ បង្កភាពស្មុគស្មាញដល់អាជ្ញាធរដែនដីក៏ដូចជាបងប្អូនប្រជាពលរដ្ឋដែលធ្វើដំណើរតាមផ្លូវ ៕
កែសម្រួលដោយ ៖ សំណាង
ចែករំលែកព័តមាននេះ