ខេត្តព្រះសីហនុ ៖ មនុស្សម្នាក់បានរងរបួសធ្ងន់សង្ឃឹមរស់តិចតួចបំផុតត្រូវបានរថយន្តសង្គ្រោះបញ្ជូនទៅកាន់មន្ទីពេទ្យ បន្ទាប់ពីត្រូវបានរថយន្តស្ទូច០១គ្រឿង ពណ៌ស បើកកៀរហើយបុកជនរងគ្រោះ កាលពីវេលាម៉ោង០៦និង៣០នាទីយប់ លើផ្លូវបុរីកម្មករ ត្រង់ចំណុច ជិតស្ពានសេតេ…
ខេត្តព្រះសីហនុ ៖ មនុស្សម្នាក់បានរងរបួសធ្ងន់សង្ឃឹមរស់តិចតួចបំផុតត្រូវបានរថយន្តសង្គ្រោះបញ្ជូនទៅកាន់មន្ទីពេទ្យ បន្ទាប់ពីត្រូវបានរថយន្តស្ទូច០១គ្រឿង ពណ៌ស បើកកៀរហើយបុកជនរងគ្រោះ កាលពីវេលាម៉ោង០៦និង៣០នាទីយប់ លើផ្លូវបុរីកម្មករ ត្រង់ចំណុច ជិតស្ពានសេតេ ស្ថិតនៅភូមិ២ សង្កាត់លេខ៣ ក្រុង/ខេត្តព្រះសីហនុ ថ្ងៃទី០៧ ខែតុលា ឆ្នាំ២០១៩ ។
យោងតាមប្រភពអំពីលោកឧត្តមសេនីយ៏ត្រី អុី សុខា ស្នងការរងទទួលផែនសណ្តាប់ធ្នាប់នៃស្នងការដ្ឋាននគរបាលខេត្តព្រះសីហនុបានឱ្យដឹងថា នៅថ្ងៃទី០៧ ខែតុលា ឆ្នាំ២០១៩ វេលាម៉ោង០៦និង៣០នាទីយប់ លើផ្លូវបុរីកម្មករ ត្រង់ចំណុចជិតស្ពានសេតេ ស្ថិតនៅភូមិ២ សង្កាត់លេខ៣ ក្រុង/ខេត្តព្រះសីហនុ មានករណីគ្រោះថ្នាក់ចរាចរណ៍មួយកើតឡើងបង្កដោយរថយន្តស្ទូច០១គ្រឿង ពណ៌ស ពាក់ផ្លាកលេខ ព្រះសីហនុ 3A-7967 អ្នកបើកបរឈ្មោះ ផន សុផាត ភេទប្រុស អាយុ២១ឆ្នាំ មុខរបរអ្នកបើកបរ មានទីលំនៅភូមិវាលរលឹម ឃុំតាតោក ស្រុកសំឡូត ខេត្តបាត់ដំបង មានអ្នករួមដំណើរចំនួន១នាក់ឈ្មោះ ហាង ហឿន ភេទប្រុស អាយុ៥៥ឆ្នាំ មុខរបរស្ទូចទំនិញ មានទីលំនៅភូមិ៥ សង្កាត់លេខ៤ ក្រុង/ខេត្តព្រះសីហនុ មានទិសដៅពីលិចឆ្ពោះទៅកើត ។
លុះដល់ចំណុចខាងលើបានកៀរម៉ូតូ០១គ្រឿងម៉ាក Smash ពណ៌សលាយខ្មៅ ពាក់ផ្លាកលេខ ព្រះសីហនុ 1D-9181 អ្នកបើកបរឈ្មោះ ឡៅ ហ្វុង ភេទប្រុស ជាជនជាតិចិន មុខរបរកម្មករ ស្នាក់នៅភូមិ៤ សង្កាត់លេខ៤ ក្រុង/ខេត្តព្រះសីហនុ ដែលបើកបរទិសដៅស្របគ្នារួចអូសកិនអ្នកបើកបរម៉ូតូចេញពីលើម៉ូតូតែម្តង ។
ហេតុការណ៍គ្រោះថ្នាក់នេះបណ្តាលឲ្យរងរបួសធ្ងន់មនុស្សម្នាក់ឈ្មោះ ឡៅ ហ្វុង ជនជាតិ ចិន បានបញ្ជូនទៅសង្គ្រោះនៅគ្លីនិកឯកជនក្រោយមកស្លាប់នៅក្នុងគ្លីនិក បច្ចុប្បន្នសពជនរងគ្រោះរក្សាទុកនៅគ្លីនិករង់ចាំក្រុមគ្រួសារមកទទួល ។ ចំណែកអ្នកបើកបររថយន្តរត់គេចខ្លួនបាត់ក្រោយពេលកើតហេតុ រីឯម្ចាស់រថយន្តដែលរួមដំណើរលើរថយន្តសមត្ថកិច្ចបាននាំទៅកាន់ការិយាល័យនគរបាលចរាចរណ៍ផ្លូវគោកដើម្បីធ្វើការសួរ ៕
កែសម្រួលដោយ ៖ សំណាង
ចែករំលែកព័តមាននេះ