រាជធានីភ្នំពេញ ៖ កងកម្លាំងវិស្វកម្មមួកខៀវកម្ពុជាចំនួន២០៤នាក់ ក្នុងនោះមានកម្លាំងនារីចំនួន១០នាក់ នឹងបញ្ជូនទៅចូលរួមបំពេញបេសកកម្ម របស់អង្គការសហប្រជាជាតិ នៅសាធារណៈរដ្ឋអាហ្វ្រិកកណ្តាល នៅចុងខែតុលានេះ ដើម្បីប្តូវេនកម្លាំងចាស់ដែលបានបញ្ចប់រយៈពេល១ឆ្នាំ។
ការបញ្ជូនកងកម្លាំងវិស្វកម្មមួកខៀវទៅកាន់សាធារណរដ្ឋអាហ្វ្រិកកណ្តាល ក្នុងបេសកកម្មរបស់អង្គការសហប្រជាជាតិនេះលោក នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព នៅថ្ងៃទី៧ ខែតុលា ឆ្នាំ២០១៩នេះ មានប្រសាសន៍ថា “កម្លាំងទាំង២០៤នាក់នេះ ត្រូវបំពេញបេសកកម្មរយៈពេល១ឆ្នាំ ដែលមានការចល័តកម្លាំង ទៅឈរជើងក្នុងតំបន់ចំនួន២ទីតាំង គឺមាន នៅក្រុងប្រៀ (Bria) និងក្រុងបាំបារី (Bambari) ដើម្បីចូលរួមស្ថាបនាផ្លូវ សាងសង់ទីបញ្ជាការទៅកងកម្លាំងរក្សាសន្តិភាពមកពីបណ្តា ប្រទេសផ្សេងៗទៀត ដែលមកចូលរួមបេសកកម្មនៅអាហ្វ្រិកកណ្តាលដូចគ្នា”។
លោកបញ្ជាក់បន្ថែមថា ការដែលកម្ពុជាបញ្ជូនកងកម្លាំងមួកខៀវក្នុងបេសកកម្មនេះ គឺបង្ហាញអោយឃើញថា កម្ពុជាអនុវត្តបាន១០០% តាមអ្វីដែលកម្ពុជាបានចុះអនុស្សារណៈយោគយល់គ្នាជាមួយអង្គការសហប្រជាជាតិ ហើយក៏បង្ហាញអោយឃើញថាកម្ពុជាជាប្រទេសមួយដែលមានសន្តិភាពពេញលេញ ។
ក្នុងវិស័យរក្សាសន្តិភាព រាជរដ្ឋាភិបាលកម្ពុជា បានបង្ហាញពីចក្ខុវិស័យ ក្នុងគោលដៅធានានិរន្តរភាព នៃការបញ្ជូនកងកម្លាំងរក្សាសន្តិភាព ដោយប្តេជ្ញាយ៉ាងមុតមាំបន្តវិភាគទានចូលរួមបេសកកម្មរបស់អង្គការសហប្រជាជាតិ ដើម្បីរួមចំណែកជាមួយសហគមអន្តរជាតិ ក្នុងកិច្ចប្រឹងប្រែងស្វែងរកសន្តយិភាពជូនប្រទេសដទៃនៅលើសកល លោក តាមសំណូមពររបស់អង្គការសហប្រជាជាតិ។
កាលពីពេលកន្លងទៅ លោកស្រី Paulin Tamesis អ្នកសម្របសម្រួលអង្គការសហប្រជាជាតិប្រចាំកម្ពុជា ថ្លែងថា “បេសកកម្មរក្សាសន្តិភាពរបស់អង្គការសហប្រជាជាតិ គឺជាគំរូជាក់ស្តែងមួយ បង្ហាញពីសកម្មភាព ក្នុងលក្ខណៈពហុភាគី ហើយរដ្ឋាភិបាលនៃសហគមអាស៊ាន ក៏បានផ្តល់នូវការគាំទ្រយ៉ាងខ្លាំងក្លាផងដែរ ។
សមាជិកអាស៊ានទាំង១០ប្រទេសបានចុះហត្ថលេខាលើគំនិតផ្តួចផ្តើមនេះគឺសកម្មភាព ដើម្បីសន្តិភាព ជាពិសេសប្រទេសកម្ពុជាភាពល្បីល្បាញលើឆាកអន្តរជាតិ ដែលបានទទួលចំណាច់ថ្នាកល្អគឺលេខ២៩ លើ១២២ប្រទេស នៃការបរិច្ឆាគកងកម្លាំងក្នុងបេសកកម្មរក្សាសន្តិភាព។
អ្នកនាំពាក្យមជ្ឈមណ្ឌលជាតិរក្សាសន្តិភាព លោកស្រី កុសល ម៉ាលីនដា បានប្រាប់ហង្សមាសនៅថ្ងៃនេះថា គិតចាប់តាំងពីឆ្នាំ២០០៦ រហូតដល់បច្ចុប្បន្ននេះ កម្ពុជាបញ្ជូនកងកម្លាំងសរុបចំនួន៦៣០០នាក់ ក្នុងនោះមានកម្លាំងនារីជិត៣០០នាក់ លើជំនាញ បោសសម្អាតមីន, វិស្វកម្មសំណង់ផ្តេក-បញ្ឈរ, តម្រួតសណ្តាប់ធ្នាប់, មន្ទីរពេទ្យកម្រិត២ វិស្វកម្មព្រលានយន្តហោះ និងកងកម្ទេចគ្រាប់មិនទាន់ផ្ទុះ ទៅក្នុងបេសកកម្មចំនួន១០ ក្នុងប្រទេសចំនួន៨ រួមមាន ស៊ូដង់, ស៊ូដង់ខាងត្បូង, ឆាដ, ស៊ីរី, សាយប្រឹស, អាហ្វ្រិកកណ្តាល, លីបង់, និងម៉ាលី។
បច្ចុប្បន្នកម្លាំងមួកខៀវកម្ពុជា កំពុងបំពេញបេសកកម្មនៅប្រទេសចំនួន៥ រួមមាន អហ្វ្រិកកណ្តាល, លីបង់, ម៉ាលី,ស៊ូដង់ខាងត្បូង, និងស៊ូដង់ ដែលមានកម្លាំងចំនួនជាង៨០០នាក់ ក្នុងនោះមានកម្លាំងនារីចំនួនជាង៦០នាក់៕
ចែករំលែកព័តមាននេះ