ខេត្តសៀមរាប ៖ កម្លាំងនាយកដ្ឋាននគរបាលព្រហ្មទណ្ឌសហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាល និងកម្លាំងអធិការដ្ឋាននគរបាលក្រុងសៀមរាប បានចុះយាមល្បាតតាមផ្លូវគ្រប់ទីកន្លែងនៅម្តុំផ្សារចាស់ដើម្បីរង់ចាំចាប់ក្រុមចោរ(ជាមុខសញ្ញាលួចកាច់សោរ.កម៉ូតូ) ខណៈនោះកម្លាំងជំនាញក្រឡេកឃើញជនសង្ស័យកំពុងជិះម៉ូតូឆ្វែលបម្រុងធ្វើសកម្មភាពកាច់សោរ.កម៉ូតូនៅម្តុំរង្វង់មូលវត្តដំណាក់ក៏ធ្វើការឃាត់ខ្លួនជនសង្ស័យបានចំនួន០២នាក់ ។ ហេតុការចុះប្រតិបត្តិការបង្ក្រាបករណីកាច់សោរ.កម៉ូតូនោះបានធ្វើឡើងនៅវេលាម៉ោងប្រហែលជាង២រំលងអធ្រាត្រថ្ងៃទី០៧ ខែតុលា ឆ្នាំ២០១៩ ស្ថិតនៅចំណុចខាងត្បូងរង្វង់មូលវត្តដំណាក់ ក្នុងភូមិវត្តដំណាក់ សង្កាត់សាលាកំរើក ក្រុង-ខេត្តសៀមរាប ។
ជនសង្ស័យទាំង២នាក់នេះមានទី១-ឈ្មោះ អុល រ៉ាត់ ហៅក្រៅ អាញ៉ា ភេទប្រុស អាយុ៣៥ឆ្នាំ មុខរបរមិនពិត មានស្រុកកំណើតភូមិបឹងដូនប៉ា ឃុំស្លក្រាម ក្រុង-ខេត្តសៀមរាប បច្ចុប្បន្ន មានទីលំនៅភូមិជ្រៃ ឃុំកណ្តែក ស្រុកប្រាសាទបាគង ខេត្តសៀមរាប និងទី២-ឈ្មោះ ហាច ហ៊ូន ហៅ ហ៊ូន ភេទប្រុស អាយុ៤៣ឆ្នាំ មុខរបរមិនពិតប្រាកដ មានស្រុកកំណើតភូមិរោងគោ ឃុំស្រណាល ស្រុកក្រឡាញ់ ខេត្តសៀមរាប បច្ចុប្បន្នស្នាក់នៅបន្ទប់ជួលភូមិតាវៀន សង្កាត់សាលាកំរើក ក្រុង-ខេត្តសៀមរាប ។
បើតាមប្រសាសន៍របស់លោកវរសេនីយ៍ឯក ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបានប្រាប់នៅល្ងាចថ្ងៃទី៧ ខែតុលា ឆ្នាំ២០១៩ ថាជនសង្ស័យដែលទើបចេញពីគុកទាំង២នាក់នោះធ្លាប់បានលួចកាច់សោរ.កម៉ូតូជាច្រើនលើកក្នុងក្រុងសៀមរាប ។
លោកវរសេនីយ៍ឯកបានឱ្យដឹងថា ក្នុងប្រតិបត្តិការធ្វើឆែកឆេរនោះកម្លាំងសមត្ថកិច្ចបានរកឃើញវត្ថុតាងដូចជា ម៉ូតូ០១ គ្រឿង ម៉ាកហុងដាឌ្រីមសេ១២៥ ស៊េរីឆ្នាំ២០១៩ ពណ៌ខ្មៅ ពាក់ផ្លាកលេខ កំពង់ចាម 1W-3621, កាំភ្លើងខ្លីម៉ាក K54 ១ដើម បង់ចំនួន១មានគ្រាប់ចំនួន៥គ្រាប់ រួមជាមួយនឹងសោរសម្រាប់កាច់.កម៉ូតូ និងឧបករណ៍ផ្សេងៗជាច្រើនទៀត ។
លោកបានបញ្ជាក់ទៀតថា ផ្អែកតាមចម្លើយសារភាពរបស់ឈ្មោះ អុល រ៉ាត់ បានសារភាពថា ខ្លួនធ្លាប់ជាប់ពន្ធនាគារពីបទលួច«ម៉ូទ័របូមទឹក»ហើយចេញពីពន្ធនាគារក្នុងឆ្នាំ២០១៥ ។ ក្រោយមកខ្លួនបានស្គាល់ឈ្មោះ វ៉ា ភេទប្រុស អាយុ អាយុប្រហែល៤០ឆ្នាំ ហើយឈ្មោះ វ៉ា បានឱ្យខ្លួនដើរលួចម៉ូតូកាច់សោរ.កម៉ូតូយកទៅលក់ឱ្យឈ្មោះ វ៉ា ហើយឈ្មោះ វ៉ា ថែមទាំងបានឱ្យសម្ភារមួយចំនួនសម្រាប់ធ្វើសកម្មភាពលួចកាច់សោរ.កម៉ូតូ ។
ហើយម៉ូតូដែលយកទៅលក់នោះមានតាមស៊េរីដូចជា ស៊េរីឆ្នាំ២០១៦ តម្លៃ៥០០$, ម៉ូតូស៊េរីឆ្នាំ២០១៧ តម្លៃ៦០០$, ម៉ូតូស៊េរីឆ្នាំ២០១៨ និងឆ្នាំ២០១៩ តម្លៃ៨០០$, ម៉ូតូ Zoomer-X តម្លៃ៥០០$ កន្លងមកខ្លួនបានធ្វើសកម្មភាពលួចកាច់សោរ.កម៉ូតូក្នុងក្រុងសៀមរាបបានចំនួនប្រហែលប្រាំមួយគ្រឿងមកហើយ ។ ចំណែកកាំភ្លើងខ្លីម៉ាក K54 ខាងលើខ្លួនទិញពីឈ្មោះ វ៉ា តម្លៃ៥០០$ ។
ចំណែកឯចម្លើយសារភាពរបស់ឈ្មោះ ហាច ហួន ហៅឡាម បានសារភាពថា ខ្លួនធ្លាប់ជាប់ពន្ធនាគារកាលពីថ្ងៃទី២៣ ខែមីនា ឆ្នាំ២០១៩ ពីបទលួច«កាច់សោរ.កម៉ូតូ» ហើយចេញពីពន្ធនាគារ នៅខែសីហា ឆ្នាំ២០១៩ ។ ខ្លួន និងឈ្មោះ អុល រ៉ាត់ កន្លងមកកាលពីថ្ងៃទី០៤ ខែតុលា ឆ្នាំ២០១៩ ស្ថិតនៅចំណុចមុខវត្តកេសរ៉ារាម ភូមិតាភុល សង្កាត់ស្វាយដង្គំ ក្រុង/ខេត្តសៀមរាប បានធ្វើសកម្មភាពកាច់សោរ.កម៉ូតូចំនួន០១គ្រឿងម៉ាកហុងដាZoomer-X ពណ៌ក្រហម បិទស្គត់ខ្មៅ ស៊េរីឆ្នាំ២០១៨ ហើយយកទៅលក់ឱ្យឈ្មោ វ៉ា បានតម្លៃ៥០០$ ។
នៅថ្ងៃទី១០ ខែកញ្ញា ឆ្នាំ២០១៩ វេលាម៉ោង១១និង៣០នាទីយប់ នៅចំណុចភូមិវត្តស្វាយ សង្កាត់សាលាកំរើក ក្រុង-ខេត្តសៀមរាប ខ្លួននឹងបក្ខពួកបានធ្វើសកម្មភាពកាច់សោរ.កម៉ូតូ០១គ្រឿងម៉ាកហុងដាឃ្លីក ពណ៌សលាយខ្មៅ ស៊េរីឆ្នាំ២០១៩ ។
ជាក់ស្តែងនៅវេលាម៉ោងប្រហែលជាង២រំលងអធ្រាត្រថ្ងៃទី០៧ ខែតុលា ឆ្នាំ២០១៩ ខ្លួន និ ងឈ្មោះ អុល រ៉ាត់ បានជិះម៉ូតូម៉ាកហុងដាឌ្រីម ស៊េរីឆ្នាំ២០១៩ ពណ៌ខ្មៅ ពាក់ផ្លាកលេខកំពង់ចាម 1W-3621 បម្រុងធ្វើសកម្មភាពលួចកាច់សោរ.កម៉ូតូបន្ត តែត្រូវកម្លាំងសមត្ថកិច្ចឃាត់ខ្លួនបានភ្លាមៗតែម្តងទៅ ។
បច្ចុប្បន្នកម្លាំងការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តសៀមរាបកំពុងរៀបចំកសាងសំណុំរឿងបញ្ជូនជនសង្ស័យទាំង២នាក់ និងវត្ថុតាងទៅតុលាការខេត្តដើម្បីចាត់ការបន្តតាមនីតិវិធីច្បាប់ ចំណែកបក្ខពួកដែលនៅសេសសល់មួយចំនួនកម្លាំងជំនាញកំពុងស្រាវជ្រាវបន្ត ដើម្បីយកមកផ្តន្ទាទោសទៅតាមផ្លូវច្បាប់ឱ្យខានតែបាន ៕
កែសម្រួលដោយ ៖ សំណាង
ចែករំលែកព័តមាននេះ