ខេត្តបន្ទាយមានជ័យ ៖ ប្រាសាទមេបុណ្យស្រុកថ្មពួកត្រូវបានភ្ញៀវជាតិអន្តរជាតិបានស្គាល់នៅពេលកសាងស្ពានឈើតភ្ជាប់ជាង៨០០ម៉ែត្រ ជាស្ពានជាប់និស្ស័យបារាយណ៍មេបុណ្យដែលស្ថិតឃុំបន្ទាយឆ្មារស្រុកថ្មពួក ។
លោក យ៉ង់ តាំងកួយ ប្រធានវប្បធម៌ និងវិចិត្រសិល្បៈខេត្តបន្ទាយមានជ័យបានប្រាប់ថាប្រាសាទមេបុណ្យ ស្ថិតក្នុងឃុំបន្ទាយឆ្មារ ស្រុកថ្មពួក ហើយប្រាសាទមេបុណ្យនេះ កសាងអំឡុងសម័យព្រះបាទជ័យវរម័ន្នទី០៧ ហើយកសាងនៅចុងសតវត្សទី១២ ដើមសតវត្សទី១៣ បរិវេណប្រាសាទមានបណ្តោយប្រវែង១,៨០០ម៉ែត្រ និងទទឹង៨០០ម៉ែត្រ និងមានបារាយជុំវិញ ដែលមានឃឿនប្រាសាទ បណ្តោយប្រវែង២៥០ម៉ែត្រ និងទទឹង២០០ម៉ែត្រដែលមានរចនាបថស្រដៀងប្រាសាទបន្ទាយឆ្មារ និងប្រាសាទបន្ទាយទ័ព ។
លោកបានបញ្ជាក់ថា ប្រាសាទមេបុណ្យនេះ មានកំពូលចំនួន៥ និងមានបណ្ណាល័យ១ដែលរងការបាក់បែក នាសម័យសង្គ្រាមដោយជនល្មើសកាប់គាស់រកវត្ថុបុរាណត្រូវបានបាក់បែក និងខូចខាតស្ទើរទាំងស្រុងហើយ មិនដែលមានអ្នកស្គាល់ឡើយ នៅប្រាសាទមេបុណ្យនេះ ។
លោក ឌៀប ឈួន អភិបាលស្រុកថ្មពួកបានបញ្ជាក់ថា ប្រាសាទមេបុណ្យនេះ កាលពីមុនមិនដែលមានអ្នកស្គាល់នោះទេ ទើបតែពេលនេះដោយបានការយកចិត្តទុកដាក់ពីលោកជំទាវ ម៉ៅ ម៉ាល័យ ភរិយាលោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តបន្ទាយមានជ័យបានដឹកនាំមន្ត្រីរាជការ និងកម្លាំងប្រដាប់អាវុធទាំង៣ស្ថាប័ន និងយុវជនធ្វើការសំអាត និងរៀបកសាងស្ពានឈើ និងជណ្តើរក្នុងប្រាសាទរៀបចំសួន ។
ដោយបានផ្តួចផ្តើមកសាងស្ពានឈើប្រវែង៨០០ម៉ែត្រ និងទទឹង១,៨០ម៉ែត្រ ដែលតភ្ជាប់ពីទីទួលមួយកន្លែង ឆ្លងកាត់វាលស្រែទៅកាន់ប្រាសាទមេបុណ្យ (ជាស្ពានជាប់និស្ស័យបារាយណ៍មេបុណ្យ) ដែលកសាងនៅថ្ងៃទី០៥ ខែមិថុនា ឆ្នាំ២០១៩ ហើយរួចរាល់នៅថ្ងៃទី២៨ ខែកញ្ញា ឆ្នាំ២០១៩ ដែលចំណាយថវិកាផ្ទាល់ខ្លួនលោកជំទាវ និងសប្បុរសជនប្រមាណជិត៦ម៉ឺនដុល្លារសហរដ្ឋអាមេរិក ។
លោកបានបញ្ជាក់ថា ក្រោយដាក់សម្ពោធអោយប្រើប្រាស់នៅថ្ងៃទី២៩ ខែកញ្ញា ឆ្នាំ២០១៩នៅអំឡុងថ្ងៃបុណ្យភ្ជុំបិណ្ឌប្រពៃណីខ្មែរ រយៈពេល៣ថ្ងៃ ឃើញមានភ្ញៀវជាតិមកលេងកម្សាន្តមានប្រមាណជិត៣ម៉ឺននាក់ ។ ដោយឡែកនៅស្រុកថ្មពួកមានទីទួលប្រាសាទជាច្រើនសល់ជំនាន់ដើម តែប្រាសាទដែលភ្ញៀវមកលេងកម្សាន្តមានប្រាសាទបន្ទាយឆ្មា និងប្រាសាទបន្ទាយទ័ព និងប្រាសាទមេបុណ្យ ៕ កែសម្រួលដោយ ៖ សុឃាក់
ចែករំលែកព័តមាននេះ