ហាណូយ៖ ដោយកត់សម្គាល់ឃើញថាប្រទេសវៀតណាមមានសមត្ថភាពខ្ពស់ក្នុងការកែច្នៃតាំងពីទសវត្សរ៍៨០រហូតមកដល់បច្ចុប្បន្ននេះ ដូច្នេះប្រមុខដឹកនាំរាជរដ្ឋាភិបាលកម្ពុជាបានថ្លែងឲ្យដឹងកាលពីពេលថ្មីៗនេះថាឥឡូវនេះវៀតណាមមានលទ្ធភាពនិងសមត្ថភាពកាន់តែខ្ពស់ខាងកែច្នៃ ខណៈកម្ពុជាមានវត្ថុធាតុដើមក៏ប៉ុន្តែកម្ពុជាខ្វះលទ្ធភាពនៃការកែច្នៃ។ ហេតុដូច្នេះការវិនិយោគទាក់ទងទៅលើការកែច្នៃផលិតផលវត្ថុធាតុដើមដែលមានស្រាប់នៅកម្ពុជា គឺជារឿងចាំបាច់ និងអាចទាក់ទាញបាននូវការវិនិយោគពីវៀតណាម។
ថ្លែងនៅឯសន្និសីទសារព័ត៌មានស្ដីពីការជម្រុញវិនិយោគនិងពាណិជ្ជកម្មនៅទីក្រុងហាណូយនារសៀលថ្ងៃទី ៤ ខែតុលាកន្លងទៅនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានមានប្រសាសន៍ថាអ្នកវិនិយោគិនវៀតណាមគួរយកចិត្តទុកដាក់វិនិយោគនិងបណ្តាក់ទុកទៅលើការកែច្នៃនូវវត្ថុធាតុដើមនានាដែលកម្ពុជាមាន ។ បន្ថែមពីលើនេះ សម្ដេចតេជោបានស្នើនាយករដ្ឋមន្ត្រីវៀតណាមលោក ង្វៀន សួនហ្វ៊ុក (Nguyen Xuan Phuc) នូវគំនិតផ្តួចផ្តើមរបស់សម្តេច «ដើម្បីឲ្យមានការជួបជុំគ្នាជាទៀតទាត់រវាងស្ថាប័នរបស់រាជរដ្ឋាភិបាលកម្ពុជានិងអ្នកវិនិយោគវៀតណាម។
ក្រៅពីវេទិការរវាងរាជរដ្ឋាភិបាលនិងវិស័យឯកជនគប្បីរៀបចំឱ្យមានជំនួបដោយឡែកមួយរវាងក្រុមប្រឹក្សាអភិវឌ្ឍន៍កម្ពុជាជាមួយនិងអ្នកវិនិយោគវៀតណាមដែលដឹកនាំដោយអគ្គរដ្ឋទូតវៀតណាមប្រចាំនៅកម្ពុជា» ក្នុងន័យជម្រុញនូវការវិនិយោគនិងការធ្វើពាណិជ្ជកម្មទ្វេរភាគីឲ្យកាន់តែប្រសើរឡើង ដូច្នេះការជួបជុំគឺគួរតែរៀបចំមួយឆ្នាំម្ដង មួយឆ្នាំពីរដង ឬក៏មានការចាំបាច់ក្នុងការជួបបែបនេះវាជាការល្អនឹងអាចឲ្យមានជំនួបដោះស្រាយបញ្ហាភ្លាមភ្លាមដើម្បីងាយស្រួលមិនត្រូវទុកឲ្យអូសបន្លាយពេកដែលនាំទៅដល់ការខាតបង់សម្រាប់ការវិនិយោគឬរឿងច្រើនទៅដល់ទៅដល់ការរួមចំណែកការអភិវឌ្ឍ ។
សម្ដេចក៏បានបញ្ជាក់ថានេះជាយន្តការដែលកម្ពុជាបានធ្វើជាមួយនឹងជប៉ុននិងប្រទេសមួយចំនួនផ្សេងទៀត។ ដូច្នេះបើសិនជាលោកនាយករដ្ឋមន្ត្រីវៀតណាមឯកភាពចំពោះបញ្ហានេះ ខ្ញុំគិតថាយើងអាចដោះស្រាយបានទាន់ពេលវេលានិងកង្វល់នៃលំបាកនានា។ ចំណុចមួយទៀតទាក់ទិនជាមួយនឹងការពង្រឹងភាពជាដៃគូរវាងវិស័យឯកជន រវាងភាគីទាំងពីរសម្ដេចតេជោមានប្រសាសន៍សូមលើកទឹកចិត្តឲ្យសភាពាណិជ្ជកម្មកម្ពុជានិងធុរកិច្ចរបស់វៀតណាមនៅកម្ពុជាមានការជួបជុំគ្នាដើម្បីពិនិត្យជាមួយគ្នាព្រោះអ្នករកស៊ីជាមួយគ្នាតែងតែចាប់ដៃជាមួយគ្នា។
ជាមួយគ្នានោះផងដែរ សម្ដេចតេជោបានបង្ហាញនូវការកោតសរសើរដល់ក្រុមអ្នកវិនិយោគវៀតណាម ពាក់ព័ន្ធនឹងការបង់គឺធ្វើបានល្អបំផុតនៅក្នុងប្រទេសកម្ពុជា ព្រោះក្រុមហ៊ុនទៅពីប្រទេសវៀតណាមបណ្តាក់ទុនរកស៊ី ឬធ្វើជំនួញនៅកម្ពុចាមិនដែលជំពាក់ហ៊ុនម្ដងណាទេគឺបង់ពន្ធទៀតទាត់ហើយមានតម្លាភាពខ្លាំងណាស់។ បន្ថែមពីលើនោះក៏បានចូលរួមជួយនៅក្នុងកិច្ចការសង្គមយ៉ាងច្រើនដែលទាក់ទងជាមួយនឹងកាកបាទក្រហមកម្ពុជា ឬការផ្ដល់ជំនួយដល់ការហ្វឹកហាត់ហ្វឹកហ្វឹនជាដើម ជួយដោះស្រាយការងារធ្វើហើយក៏បានរួមចំណែកធ្វើឲ្យកម្ពុជាមានកំណើនសេដ្ឋកិច្ច ៧%ក្នុងរយៈពេលមួយទសវត្សរ៍កន្លងទៅនេះ។
បន្ថែមពីលើនេះសម្តេចតេជោ ក៏បានបង្ហាញនូវការយល់ស្របទៅនឹងលោកនាយករដ្ឋ
មន្ត្រីវៀតណាមដែលចង់ឲ្យមានតំបន់សេដ្ឋកិច្ចពិសេសកម្ពុជា-វៀតណាម ដូច្នេះតំបន់សេដ្ឋកិច្ចពិសេសនេះ គឺមិនចាំបាច់ទៅណាឆ្ងាយពីព្រំដែនកម្ពុជា-វៀតណាមទេ ប៉ុន្តែសុំកសាងនៅក្នុងទឹកដីកម្ពុជាដើម្បីឱ្យដឹងថាផលិតផលចេញពីកម្ពុជា ប៉ុន្តែអ្នកវិនិយោគគឺភាគីវៀតណាម។
សម្តេចតេជោក៏បានបញ្ជាក់ថាទំហំពាណិជ្ជកម្មទ្វេភាគីរវាងកម្ពុជានិងវៀតណាមនឹងឈានដល់ជាង ៥ ពាន់លានដុល្លារអាមេរិកនៅចុងឆ្នាំ ២០១៩ ដែលជាតួលេខមួយដ៏ល្អប្រសើរ ។ សម្តេចនាយរដ្ឋមន្ត្រីបានបញ្ជាក់ថា បើនិយាយអំពីពាណិជ្ជកម្មយើងមានសេចក្តីរីករាយដោយមានការកើនឡើងនូវទំហំពាណិជ្ជកម្មទ្វេភាគីដែលតួលេខនេះបានកើនឡើងដល់ជិត ៤,៧ ពាន់លានដុល្លារអាមេរិកក្នុងឆ្នាំ ២០១៨ គឺកើនឡើង ២៤ ភាគរយបន្ថែមទៀតបើប្រៀបធៀបទៅនឹងឆ្នាំ ២០១៧ ។ ក្នុងរយៈពេល ៦ ខែដំបូងនៃឆ្នាំ ២០១៩ ទំហំពាណិជ្ជកម្មសរុបបានឈានដល់ ២,៧ ពាន់លានដុល្លារអាមេរិក ហើយយើងរំពឹងថានឹងទទួលបានច្រើនជាង ៥ ពាន់លានដុល្លារនៅដំណាច់ឆ្នាំនេះ” ។
សូមបញ្ជាក់ការនាំចេញរបស់វៀតណាមមកកម្ពុជារួមមាន ដែក ប្រេង វាយនភ័ណ្ឌនិងសម្លៀកបំពាក់និងផលិតផលកសិកម្ម ដូចជាត្រីសាច់និងបន្លែក៏ដូចជាទំនិញប្រើប្រាស់ខណៈដែលការនាំចេញរបស់កម្ពុជាទៅកាន់ប្រទេសវៀតណាមរួមមានគ្រាប់ស្វាយចន្ទី កៅស៊ូ ឈើនិងផលិតផលធ្វើពីឈើផ្លែឈើនិងបន្លែ៕ កែសម្រួលដោយ ៖សុឃាក់
ចែករំលែកព័តមាននេះ