ប្រទេសអ៊ុយក្រែន ៖ មនុស្សយ៉ាងតិច១ម៉ឺននាក់កាលពីថ្ងៃទី៦តុលាបានធ្វើបាតុកម្មនៅទីក្រុងកៀវ ប្រឆាំងការសម្រេចផ្ដល់ស្វ័យភាពកាន់តែធំមួយ ដល់បណ្ដាដែនដីបំបែកខ្លួននិយមស្និទ្ធរុស្ស៊ី ក្នុងក្របខណ្ឌនៃការខិតខំប្រឹងប្រែងសន្តិភាព របស់ប្រធានាធិបតីទើបជាប់ឆ្នោតថ្មីលោកVOLODYMYR ZELENSKY។
នៅទីលានឯករាជ្យដែលនៅក្រុងកៀវគេស្កាល់ក្រោមឈ្មោះថាទីលានMAIDAN ពួកអ្នកតវ៉ាបានលើកបដានានា ដោយព្រមានចំពោះប្រធានាធិបតី។ បាតុករដែលមានប្រមាណជា១០.០០០នាក់ ដោយក្នុងចំណោមពួកគេមានសមាជិកនៃបណ្ដាក្រុមជាតិនិយម ដូចជាក្រុមSVOBODAជាដើម បន្ទាប់មកបានលើកគ្នាឆ្ពោះទៅកាន់ទីស្នាក់ការរបស់រដ្ឋបាលប្រធានាធិបតីនិងសភា។
អតីតប្រធានាធិបតីអ៊ុយក្រែនលោកប៉េត្រូប៉ូរ៉ូឆេនកូ ដែលចូលរួមក្នុងបាតុកម្មនោះដែរអះអាងតាមTWITTERថា មនុស្សច្រើនសិបពាន់នាក់ចូលរួមក្នុងបាតុកម្មនៅទីក្រុងកៀវនិងក្នុងទីក្រុងប្រមាណ២០ទៀតរបស់ប្រទេស។
លោកប្រធានាធិបតីVOLODYMYR ZELENSKYកំពុងរៀបចំយ៉ាងសកម្មការជួបគ្នាកំពូលមួយជាមួយប្រធានាធិបតីរុស្ស៊ី លោកវ្ល៉ាឌីមៀរពូទីន ដើម្បីជម្រុញដំណើរការសន្តិភាពនៅភាគខាងកើតអ៊ុយក្រែន ដែលជាកន្លែងមានជម្លោះចាប់តាំងពី៥ឆ្នាំមកហើយ បណ្ដាលឲ្យមនុស្សស្លាប់ប្រមាណជា១៣.០០០នាក់។
តែពួកអ្នកចរចារុស្ស៊ីនិងអ៊ុយក្រែន បានព្រមព្រៀងគ្នាកាលពីថ្ងៃទី១តុលា លើប័ណ្ណដើរផ្លូវមួយ ដែលគ្រោងផ្ដល់លក្ខន្តិកៈពិសេសសម្រាប់បណ្ដាតំបន់បំបែកខ្លួន ជាមួយការបោះឆ្នោតមូលដ្ឋានដោយសេរិ ស្របតាមរដ្ឋធម្មនុញ្ញអ៊ុយក្រែន និងក្រោមការត្រួតពិនិត្យរបស់ពួកអ្នកសង្កេតការណ៍អន្តរជាតិ។
ពួកអ្នករិះគន់ប្រធានាធិបតីអ៊ុយក្រែនមានការបារម្ភថា នោះគ្រាន់តែជាការធ្វើសម្បទានជ្រុលពេកប្រៀបដូចជាការចុះចាញ់ ដែលនាំទៅរកការរក្សាទុកការត្រួតត្រារបស់ក្រុងមូស្គុលើបណ្ដាតំបន់បំបែកខ្លួន។ សម្រាប់ពួកបាតុករយល់ថាស្វ័យភាពកាន់តែទូលំទូលាយ ផ្ដល់ដល់សាធារណរដ្ឋស្វ័យប្រកាសDONESTK និង LOUGANSKនឹងនាំឲ្យមានការបំផ្លាញផលប្រយោជន៍របស់អ៊ុ៊ុយក្រែន៕ (កែសម្រួលដោយ ៖ បុប្ផា)
ចែករំលែកព័តមាននេះ