ខេត្តសៀមរាប ៖ សេចក្តីរាយការណ៍បឋមបានឲ្យដឹងថា បុរសម្នាក់បានធ្វើអត្តឃាតអារក សម្លាប់ខ្លួនឯង ខណៈខឹងប្រពន្ធសុំលែងលះគ្នា ដោយសារតូចចិត្តខ្លាំង ទើបសម្រេចចិត្តបែបនេះ បង្កឲ្យមានការភ្ញាក់ផ្អើលដល់សមត្ថកិច្ច ហេតុការណ៍នេះបានកើតឡើងនាវេលាម៉ោង១៦និង១០នាទីរសៀល ថ្ងៃទី០៦ ខែតុលានេះ ស្ថិតនៅត្រង់ចំណុច លើកំណាត់ផ្លូវជាតិលេខ៦ ខាងកើតសាខាគយទឹកវិល ក្នុងភូមិសណ្ដាន់ សង្កាត់ទឹកវិល ក្រុង-ខេត្តសៀមរាប ។
បើតាមប្រភពពីសមត្ថកិច្ចមូលដ្ឋានបានប្រាប់ឲ្យដឹងថា ជនរងគ្រោះមានឈ្មោះ ពៅ អាយុ៣៣ឆ្នាំ មុខរបរលក់កាំបិត មានស្រុកកំណើតភូមិដើមស្ពៃ សង្កាត់ស្លាកែត ក្រុងបាត់ដំបង ខេត្តបាត់ដំបង សព្វថ្ងៃស្នាក់នៅជាមួយថៅកែដំកាំបិតលក់ ឈ្មោះ រី រ៉វី អាយុ៣៧ឆ្នាំ រស់នៅភូមិគោកដូង សង្កាត់ទឹកវិល ក្រុងសៀមរាប ។ បុរសខាងលើធ្វើអត្តឃាតដោយប្រើកាំបិត តែត្រូវបានបញ្ជូនទៅមន្ទីរពេទ្យសង្គ្រោះហើយដែរ ។
សមត្ថកិច្ចបានបន្តថា មូលហេតុបណ្តាលឲ្យបុរសរូបនោះបានធ្វើអត្តឃាតខ្លួនឯង គឺខឹងជាមួយប្រពន្ធសុំលែងលះគ្នា ។ បច្ចុប្បន្នជនរងគ្រោះកំពុងសង្គ្រោះបន្ទាន់ នៅមន្ទីរពេទ្យបង្អែកខេត្តសៀមរាបហើយដែរ ៕ កែសម្រួលដោយ ៖សុឃាក់
ចែករំលែកព័តមាននេះ