ជីវិតនារីម្នាក់នេះ...តើអ្នកណាទទួលខុសត្រូវ?

ជីវិតនារីម្នាក់នេះ…តើអ្នកណាទទួលខុសត្រូវ?

ថ្ងៃទី ០៧ ខែ តុលា ឆ្នាំ ២០១៩

ម៉ោង ១៦:១៤

ខេត្តសៀមរាប ៖ បើតាមប្រភពពីមន្ត្រីនគរបាលចរាចរណ៍ខេត្តសៀមរាបបានឲ្យដឹងនៅថ្ងៃទី៧ ខែតុលា ឆ្នាំ២០១៩ នេះថាស្ត្រីម្នាក់ត្រូវរថយន្តកូរ៉េចំណុះ២តោនកន្លះបុកស្លាប់ភ្លាមៗ នៅលើផ្លូវក្រវ៉ាត់ក្រុងសៀមរាប បង្កការភ្ញាក់ផ្អើលកាលពីថ្ងៃទី៦ ខែតុលា ឆ្នាំ២០១៩ ស្ថិតនៅចំណុចផ្លូវចូលសាលាសង្តាត់ស្វាយដង្គុំ លើផ្លូវក្រវ៉ាត់ក្រុងសៀមរាប ។

គ្រោះថ្នាក់ចរាចរណ៍នេះកើតឡើងរវាងរថយន្តធំចំណុះ២តោនកន្លះ គ្មានស្លាកលេខ ជាមួយអ្នកបើកម៉ូតូម៉ាកឌ្រីមសេ១២៥ ពណ៌ខ្មៅ ពាក់ផ្លាកលេខ សៀមរាប 1AC-8447 អ្នកបើកបរដោយឈ្មោះ ខា ស្រីម៉ៅ ភេទស្រី អាយុ២៨ឆ្នាំ រស់នៅភូមិតាគង់ សង្កាត់សំបូរ ក្រុងសៀមរាប ខេត្តសៀមរាប បណ្តាលឲ្យអ្នកបើកបរម៉ូតូខាងលើស្លាប់នៅហ្នឹងកន្លែងកើតហេតុភ្លាមៗ ចំណែកអ្នកបើកបររថយន្តចុះគេចខ្លួនបាត់ស្រមោល ។ ពាក់ព័ន្ធករណីនេះប្រភពបានបញ្ជាក់បន្ថែមថា កំពុងតែស៊ើបអង្កេត និងស្រាវជ្រាវជុំវិញហេតុការណ៍នោះដើម្បីស្វែងរកចាប់ខ្លួនជនបង្កយកមកផ្តន្ទាទោសទៅតាមផ្លូវច្បាប់ ។

ក្រោយធ្វើការវាស់វែងរួចមកកម្លាំងជំនាញបានយកវត្ថុតាងរថយន្ត និងម៉ូតូទៅរក្សាទុកនៅស្នងការដ្ឋាននគរបាលខេត្តសៀមរាបដើម្បីរង់ចាំការដោះស្រាយតាមផ្លូវច្បាប់ ។ បច្ចុប្បន្នសពជនរងគ្រោះត្រូវបានសមត្ថកិច្ចប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណី ៕

កែសម្រួលដោយ ៖ សំណាង