រាជធានីភ្នំពេញ ៖ យុវជនម្នាក់ត្រូវបានកម្លាំងនគរបាលព្រហ្មទណ្ឌខណ្ឌដង្កោធ្វើការឃាត់ខ្លួនតាមពាក្យបណ្ដឹងរបស់ស្ត្រីម្នាក់ដែលបានប្ដឹងចោទប្រកាន់ថា យុវជនម្នាក់នេះល្បួងកូនស្រីរបស់គាត់ដែលទើបមានអាយុ១៥ឆ្នាំទៅរំលោភសេពសន្ធវៈនៅក្នុងបន្ទប់ផ្ទះជួលមួយកន្លែងរហូតបានសម្រេច១ដង។
ការចាប់ខ្លួនយុវជនម្នាក់ខាងលើនេះបានធ្វើឡើងកាលវេលាម៉ោង១២និង១០នាទីយប់រំលងអាធ្រាត្រឈានចូលថ្ងៃទី៧ ខែតុលា ឆ្នាំ២០១៩ នៅបន្ទប់ជួលលេខ៤ ផ្លូវលេ១០៤ ស្ថិតនៅភូមិក្រពើទ្រោម សង្កាត់រលួស ខណ្ឌដង្កោ រាជធានីភ្នំពេញ ។
យុវជនសង្ស័យម្នាក់ខាងលើឈ្មោះ ឌុក សំណាង អាយុ២០ឆ្នាំ មុខរបរកម្មករផលិតសរសរគ្រឹះ ស្នាក់នៅបន្ទប់ជួលកើតហេតុខាងលើ។
តាមប្រភពពីនគរបាលបានឲ្យដឹងថា កាលពីវេលាម៉ោង២រសៀលថ្ងៃទី៦ ខែតុលា ឆ្នាំ២០១៩ ក្មេងស្រីរងគ្រោះបានទូរស័ព្ទទៅកាន់ជនសង្ស័យ ដោយសួរថា «បងទំនេរឬទេ?» ខណៈនោះជនសង្ស័យឆ្លើយថា «ទំនេរតើ» បន្ទាប់មកក្មេងស្រីរគ្រោះក៏បានប្រាប់ថា «អញ្ចឹងសូមបងមកដឹកអូនទៅលេងបន្ទប់ជួលរបស់បងផង» ។ ពេលនោះជនសង្ស័យក៏យល់ព្រម ហើយរហូតដល់វេលាម៉ោង៣និង៣០នាទីរសៀលថ្ងៃដដែល ជនសង្ស័យក៏បានជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ តាកែវ១N-៧៣៩៥ ទៅឌុបក្មេងស្រីរងគ្រោះពីផ្ទះនៅក្នុងខេត្តកណ្ដាល មកលេងបន្ទប់ជួលដែលខ្លួនស្នាក់នៅ។
តាមប្រភពដដែលបានបន្តថា លុះពេលទៅដល់បន្ទប់ជួលខាងលើក្មេងស្រីរងគ្រោះបានដើរចូលទៅក្នុងបន្ទប់មុន ចំណែកឯជនសង្ស័យបានចូលតាមក្រោយ រួចខ្ទាស់គន្លឹះទ្វារជាប់ បន្ទាប់មកអ្នកទាំង២នាក់ក៏បានរួមរ័កជាមួយគ្នារហូតបានសម្រេច១ដង ទើបសង្ស័យជិះម៉ូតូឌុបក្មេងស្រីរងគ្រោះទៅផ្ទះវិញ។
តាមប្រភពដដែលបានបន្តទៀតថា លុះពេលទៅដល់ផ្ទះវិញ ម្ដាយក្មេងស្រីរងគ្រោះជជីកសួរកូនស្រីពីរឿងបាត់ពីផ្ទះច្រើនម៉ោង ដោយមិនអាចលាក់បាំងបាន ទើបនាងទម្លាយរឿងពិតប្រាប់ដល់ម្ដាយ បន្ទាប់មកស្ត្រីជាម្ដាយបានដាក់ពាក្យប្ដឹងសុំឲ្យនគរបាលបានព្រហ្មទណ្ឌខណ្ឌដង្កោចុះទៅចាប់ខ្លួនសង្ស័យ ដោយចោទប្រកាន់ថា យុវជនខាងលើនេះល្បួងកូនស្រីគាត់មិនទាន់គ្រប់អាយុរួមរ័ករហូតបានសម្រេច ។ ពេលនេះនគរបាលបានកំពុងធ្វើការសាកសួរនិងកសាងសំណុំរឿងដើម្បីចាត់ការតាមច្បាប់ហើយ៕ (កែសម្រួលដោយ ៖ ធីតា)
ចែករំលែកព័តមាននេះ