ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា មានការភ្ញាក់ផ្អើលទាំងព្រលឹម ដោយសារតែបាត់រថយន្តម៉ាកតាកូម៉ាមួយគ្រឿង ដែលគេសង្ស័យថា ត្រូវចោរលួច បាត់ កាលពីម៉ោង៤ទៀបភ្លឺ ថ្ងៃទី០៧ ខែតុលា ឆ្នាំ២០១៩ ខណៈម្ចាស់ចតទុកនៅខាងផ្ទះ ស្ថិតនៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង។
បើតាមប្រភពពីសមត្ថកិច្ចបានឲ្យដឹងថា រថយន្តដែលបាត់នោះម៉ាកតាកូម៉ា ពណ៌ក្រហម ពាក់ស្លាកលេខ ភ្នំពេញ 2S-2541 លេខម៉ាស៊ីន NIL លេខតួ 4TASM92N0Z102912 ដែលមានម្ចាស់ឈ្មោះ អ៊ុក ហេង ភេទប្រុស អាយុ៦៨ឆ្នាំ មុខរបរលក់ដូរ រស់នៅចំណុចកើតហេតុខាងលើ។
សេចក្តីរាយការណ៍បន្តថា ជាធម្មតារថយន្តនោះ ម្ចាស់តែងតែចតទុកនៅខាងមុខផ្ទះរបស់ខ្លួន ហើយស្រាប់តែបាត់ ខណៈពេលដែលគាត់ភ្ញាក់ពីដំណេក រួចបើកទ្វារផ្ទះចេញមកក្រៅទើបមានការភ្ញាក់ផ្អើលឆោឡោតែម្ដង។ បើតាមការសន្និដ្ឋានរបស់ជនរងគ្រោះថា រថយន្តនេះប្រហែលជាអាចត្រូវចោរលួចនៅវេលាទៀបភ្លឺ។
សេចក្តីរាយការណ៍បន្តទៀតថា ខណៈពេលនេះ សមត្ថកិច្ចកំពុងមមាញឹកក្នុងការស្រាវជ្រាវពីករណីនេះហើយ។ ហើយសមត្ថកិច្ចបានឲ្យដឹងដែរថា នេះជាករណីថ្មីមួយទៀត ដែលលេចមុខចោរលួចរថយន្ត ដែលកម្រមាននៅខេត្តបាត់ដំបង។ សូមឱ្យប្រជាពលរដ្ឋដែលមានយានយន្ត គួរតែមានការប្រុងប្រយ័ត្នចំពោះការបាត់បង់។ ប៉ុន្តែយ៉ាងណាក៏ដោយ ពេលនេះកម្លាំងសមត្ថកិច្ចកំពុងធ្វើការស៊ើបអង្កេតលើករណីនេះហើយ។ (កែសម្រួលដោយ ៖ បុប្ផា)
ចែករំលែកព័តមាននេះ