ក្រុងហុងកុង ៖ បាតុករស្និទ្ធលទ្ធិប្រជាធិបតេយ្យច្រើនពាន់នាក់ កាលពីថ្ងៃទី៥តុលាបានលើកគ្នាតវ៉ាជាមួយការពាក់ម៉ាស់ ទោះជាមានការហាមឃាត់របស់អាជ្ញាធរហុងកុង បន្ទាប់ពីរាត្រីកាលនៃអំពើហិង្សា ក្នុងដែនដីអតីតអាណានិគមអង់គ្លេសនោះដែលនាំឲ្យមានការបិទមេត្រូនិងហាងទំនិញជាច្រើន។
ស្ទើរគ្រប់ទីកន្លែងនៃដែនដីហុងកុងពួកបាតុករដែលពាក់ម៉ាស់បិទមុខ បានលើកគ្នាតវ៉ានារសៀលថ្ងៃទី៥តុលា។ ពួកគេចង់ផ្កើនដល់ការហាមឃាត់ដែលប្រកាសនាថ្ងៃទី៤តុលាមិនឲ្យធ្វើបាតុកម្មដោយពាក់ម៉ាស់។
ពួកបាតុករនាដើមព្រលប់បាននាំគ្នាបង្កើតជាច្រវ៉ាក់មនុស្សនិងស្រែកពាក្យស្លោកនានាស្និទ្ធប្រជាធិបតេយ្យ។ ប្រមុខប្រតិបត្តិក្រុងហុងកុងលោកស្រីCARRIE KAM នាថ្ងៃទី៥តុលាបានបរិហារ បណ្ដាសកម្មភាពរបស់ពួកបះបោរដែលពាក់ម៉ាស់បិទមុខហើយអះអាងថា ប្រជាជនមានការភ័យខ្លាចបន្ទាប់ពីរាត្រីដ៏ខ្មៅងងឹតបំផុតមួយសម្រាប់ក្រុងហុងកុងមក។
នៅSHEUNG SHUIជិតព្រំដែនចិនគេឃើញពួកបាតុករបិទមុខ វាយបំបែកកញ្ចក់ហាងទំនិញនានាដែលជារបស់បណ្ដាក្រុមហ៊ុនចិនឬចាត់ទុកថាស្និទ្ធក្រុងប៉េកាំង។ វិធានការហាមឃាត់មិនឲ្យពួកបាតុករប្រើម៉ាស់បិទមុខ មានគោលដៅបញ្ចប់ការតវ៉ា៤ខែមកហើយ ជាការតវ៉ាធំពុំធ្លាប់មានពីមុនៗមក ចាប់តាំងពីដែនដីហុងកុងត្រូវប្រគល់ឲ្យចិនវិញពីឆ្នាំ១៩៩៧មក។
ការហាមឃាត់នោះហាក់ដូចជាយកប្រេងចាក់លើភ្លើង។ ប៉ុន្មានម៉ោងក្រោយការប្រកាសនេះសកម្មភាពតវ៉ាបានផ្ទុះឡើងស្ទើរគ្រប់ទីកន្លែងនៃដែនដីហុងកុង។ ការប៉ះទង្គិចគ្នាខ្លាំងក្លាកើតមានរវាងប៉ូលិសនិងពួកបាតុករដែលអុកឡុកតាមដងវិថីនានា ដើរដុតនិងអុកឡុកបណ្ដាស្ថានីយមេត្រូនិងបណ្ដាទីតាំងពាណិជ្ជកម្មស្និទ្ធចិន។ នៅខណ្ឌYUEN LONG ប៉ូលិសម្នាក់បានបាញ់កាំភ្លើង ពេលរថយន្តរបស់គេត្រូវឡោមពទ្ធ័ហើយដបសាំងដុតបានផ្ទុះក្បែរជើងគេ។ ក្មេងប្រុសម្នាក់ត្រូវរបួសដោយគ្រាប់កាំភ្លើងត្រង់ភ្លៅ៕ (កែសម្រួលដោយ ៖ បុប្ផា)
ចែករំលែកព័តមាននេះ