ប្រទេសអ៊ីរ៉ាក់ ៖ ពលរដ្ឋអ៊ីរ៉ាក់ច្រើនពាន់នាក់កាលពីថ្ងៃទី៥តុលា បានបន្តលើកគ្នាដើរហែក្បួនបាតុកម្មតាមដងវិថីដើម្បីទាមទារជាថ្មីការចាកចេញរបស់រដ្ឋាភិបាល ដែលត្រូវចោទប្រកាន់ថាពុករលួយ។ មកដល់ថ្ងៃទី៥នៃការតវ៉ាមនុស្សជិត១០០នាក់បានត្រូវស្លាប់និងយ៉ាងតិច៤០០០នាក់រងរបួស។ បាតុករភាគច្រើនត្រូវស្លាប់ដោយគ្រាប់កាំភ្លើង នេះបើតាមប្រភពព័ត៌មានមន្ទីរពេទ្យដែលគូសបញ្ជាក់នាពេលមុននេះថា ប៉ូលិស៦នាក់ក៏ត្រូវស្លាប់ដែររហូតមកទល់ពេលនេះ។
ស្នូរកាំភ្លើងត្រូវបានលាន់ឮនាថ្ងៃទី៥តុលានៅក្រុងបាដាដរដ្ឋធានីអ៊ីរ៉ាក់និងក្នុងទីក្រុងដទៃៗទៀត នាភាគខាងត្បូងប្រទេស។ នៅក្រុងបាដាដពួកបាតុករបានប្រមូលផ្ដុំគ្នានៅទីលានTAHRIR កណ្ដាលរដ្ឋធានី។ ចំណែកបាតុករច្រើនពាន់នាក់ទៀតបានលើកគ្នាតវ៉ានៅទីក្រុងឌីវ៉ានីយ៉ានិងក្រុងណាស៊ីរីយ៉ានាភាគខាងត្បូងប្រទេស។
តាមការអំពាវនាវតាមបណ្ដាញសង្គម ចលនាតវ៉ារីកកាន់តែធំប្រឆាំងអំពើពុករលួយ ភាពឥតការងារធ្វើនិងភាពអសកម្មនៃបណ្ដាសេវាកម្មសាធារណៈ ក្នុងប្រទេសដែលទើបចាកផុតមិនដល់២ឆ្នាំផងពីជម្លោះជិត៤ទសវត្ស។ ប្រទេសជួបប្រទះការខ្វះខាតអគ្គិសនីនិងទឹកស្អាតរ៉ាំរ៉ៃ។ បាតុកម្មទាំងនោះគឺជាការសាកល្បងដំបូង សម្រាប់រដ្ឋាភិបាលរបស់នាយរដ្ឋមន្ត្រីលោកអាដែលអាប់ដែលម៉ាហ៍ឌី ដែលបង្កើតឡើងទើបបានមិនដល់១ឆ្នាំពេញផង។
អ.ស.បនាថ្ងៃទី៥តុលាបានអំពាវនាវឲ្យបញ្ឈប់អំពើហិង្សានៅអ៊ីរ៉ាក់ ដែលក្នុងចំណោមអ្នកស្លាប់ភាគច្រើនជាពួកបាតុករ។ នារសៀលនិងយប់ថ្ងៃទី៥តុលា កងកម្លាំងសន្តិសុខបានបំបែកពួកបាតុករនៅភាគខាងកើតរដ្ឋធានី ដែលនៅទីនោះពួកបាតុករ ប្រឈមមុខនឹងការបាញ់គ្រាប់ពិតនិងឧស្ម័នបង្ហូរទឹកភ្នែក។
នៅភាគខាងត្បូងប្រទេស ពួកអ្នកតវ៉ាបានដុតទីស្នាក់ការរបស់គណបក្សនយោបាយ៦ នៅទីក្រុងណាស៊ីរីយ៉ាហើយមនុស្សច្រើនពាន់នាក់ ហែក្បួនតាមដងវិថីនៃទីក្រុងឌីវ៉ានីយ៉ា ដែលនៅទីនោះមានស្នូរកាំភ្លើងជាច្រើន៕ (កែសម្រួលដោយ ៖ បុប្ផា)
ចែករំលែកព័តមាននេះ