ក្នុងសង្គមយើងនេះ យើងអាចសង្កេតឃើញថា មនុស្សមួយចំនួនពូកែស្រមើលស្រម៉ៃ ខណៈដែលមនុស្សមួយចំនួនទៀតចូលចិត្តគិតអ្វីតាមតថភាពជាក់ស្តែង ។ ប៉ុន្តែមហាសេដ្ឋី Ray Dalio ដែលជាស្ថាបនិករបស់ Bridgewater…
ក្នុងសង្គមយើងនេះ យើងអាចសង្កេតឃើញថា មនុស្សមួយចំនួនពូកែស្រមើលស្រម៉ៃ ខណៈដែលមនុស្សមួយចំនួនទៀតចូលចិត្តគិតអ្វីតាមតថភាពជាក់ស្តែង ។ ប៉ុន្តែមហាសេដ្ឋី Ray Dalio ដែលជាស្ថាបនិករបស់ Bridgewater Associates គិតថា មនុស្សត្រូវការគុណសម្បត្តិទាំងពីរនេះទើបអាចជោគជ័យបាន។ លោកបានបកស្រាយថា អ្នកដែលមានក្តីសុបិនត្រូវការគំនិតបែបពិតនិយម ទើបអាចជួយឲ្យពួកគេសម្រេចគោលដៅខ្លួនបាន ព្រោះវាជួយឲ្យអ្នកជ្រើសរើសក្តីសុបិនបានត្រឹមត្រូវ រួចសម្រេចវាឲ្យក្លាយជាការពិត។
លោក Dalio បានចែករំលែកលើ Facebook របស់លោកថា ការយល់ដឹងទទួលស្គាល់ និងធ្វើការជាមួយនឹងតថភាពជាក់ស្តែង គឺពិតជាសំខាន់ណាស់ ផ្ទុយពីអ្នកដែលមានក្តីសុបិន ប៉ុន្តែមិនដែលធ្វើសកម្មភាពអ្វី ដើម្បីព្យាយាមសម្រេចវាឡើយ ។
ចូរកត់សម្គាល់ដែរថា លោក Dalio មិនរិះគន់ការចេះស្រមើលស្រម៉ៃ ឬការមានក្តីសុបិនទេ ។ ផ្ទុយមកវិញ លោកគិតថា ក្តីសុបិន គឺជាកត្តាដែលជួយឲ្យជីវិតមនុស្សមានន័យ ។ ប៉ុន្តែលោកបានបកស្រាថា មនុស្សដែលបង្កើតបានអ្វីថ្មីៗ និងទទួលបានភាពជោគជ័យ គឺមិនមែនជាមនុស្សដែលតែងតែស្រមើលស្រម៉ៃទេ តែពួកគេជាមនុស្សដែលយល់ច្បាស់ពីតថភាពជាក់ស្តែង។ ការស្រមើលស្រម៉ៃពីភាពជោគជ័យ គឺមានប្រសិទ្ធិភាពពេលដែលមនុស្សស្រមើលស្រម៉ៃឃើញឧបសគ្គពិតជាក់ស្តែង ដែលពួកគេអាចនឹងជួប ខណៈដែលពួកគេព្យាយាមសម្រេចគោលដៅទាំងនោះ ។
ប្រាកដណាស់ លោក Dalio មិនមែនជាអ្នកដឹកនាំមួយរូបដែលមានទស្សនៈដូច្នេះទេ ។ លោក Tim Cook ដែលជានាយកប្រតិបត្តិរបស់ក្រុមហ៊ុន Apple បានចែករំលែកថា ពេលដែលស្វែងរកបុគ្គលិក លោកតែងតែរកមនុស្សដែលមិនសប្បាយចិត្តនឹងអ្វីដែលកំពុងកើតមានឡើង ឬអ្វីដែលសង្គមមានក្នុងពេលបច្ចុប្បន្ន និងមានការប្តេជ្ញាចង់ផ្លាស់ប្តូរពិភពលោក។
ប៉ុន្តែលោក Cook បានបន្ថែមទៀតថា សមត្ថភាពក្នុងការស្រមើលស្រម៉ៃ គឺពិតជាសំខាន់ណាស់សម្រាប់ក្រុមហ៊ុនបច្ចេកវិទ្យាដូចលោក ប៉ុន្តែសមត្ថភាពក្នុងការតស៊ូ និងខិតខំប្រឹងប្រែងក្នុងការសម្រេចគោលដៅទាំងនោះក៏សំខាន់ដូចគ្នាដែរ ៕ កែសម្រួលដោយ ៖ សុឃាក់
ចែករំលែកព័តមាននេះ