កាល់ស្យូម គឺជាជាតិរ៉ែចាំបាច់បំផុតមួយសម្រាប់រក្សាសុខភាពឆ្អឹងរឹងមាំ។ ទោះជាយ៉ាងណារាងកាយក៏ត្រូវការជាតិកាល់ស្យូមដើម្បីរក្សាសម្ពាធឈាម គ្រប់គ្រងការបញ្ចេញអ័រម៉ូន និងដំណើរការមុខងារប្រព័ន្ធសសៃប្រសាទប្រក្រតីផងដែរ។ នៅពេលរាងកាយទទួលបានជាតិកាល់ស្យូមមិនគ្រប់គ្រាន់ នោះអ្នកអាចប្រឈមមុខនឹងបញ្ហាខ្វះជាតិកាល់ស្យូមមិនខាន។ ថាតើកង្វះជាតិកាល់ស្យូមបង្ហាញអាការៈអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាការៈដែលលេចឡើងនៅពេលរាងកាយខ្វះជាតិកាល់ស្យូម ៖
១. ស្បែកស្ងួត ៖ កង្វះជាតិកាល់ស្យូមក្នុងរាងកាយក៏អាចជះឥទ្ធិពលដល់សុខភាពស្បែកផងដែរ។ ជាធម្មតាស្ថានភាពនេះធ្វើអោយស្បែកស្ងួតបែកស្រកា។ លើសពីនេះទៅទៀតកង្វះជាតិកាល់ស្យូមក្នុងរាងកាយមានទំនាក់ទំនងយ៉ាងជិតស្និទ្ធទៅនឹងការវិវត្តនៃបញ្ហាស្បែកផ្សេងៗដូចជាត្រអកនិងជំងឺស្បែករបកក្រហម (psoriasis)។
២. អស់កម្លាំងខុសប្រក្រតី ៖ មានអារម្មណ៍អស់កម្លាំងល្ហិតល្ហៃសឹងគ្រប់ពេលមែនទេ? អ្នកប្រហែលជាត្រូវការជាតិកាល់ស្យូមបន្ថែមហើយ។ អ្នកដែលជួបប្រទះបញ្ហានៃកង្វះជាតិកាល់ស្យូមងាយនឹងមានអារម្មណ៍ថាអស់កម្លាំងមែនទែន។នោះក៏ព្រោះតែជាធម្មតាកង្វះជាតិកាល់ស្យូមក្នុងរាងកាយ គឺបង្កផលប៉ះពាល់ចំពោះសុខភាពទាំងមូល។ ដូច្នេះប្រសិនបើអ្នកជួបប្រទះអាការៈអស់កម្លាំងខ្លាំង ល្ហិតល្ហៃ ឬមានអារម្មណ៍ខ្សោយថាមពលជាប់ជានិច្ច ចូរព្យាយាមទទួលទានអាហារមានផ្ទុកសម្បូរទៅដោយជាតិកាល់ស្យូម។
៣. ជំងឺបាក់ទឹកចិត្ត (Depression)៖ នោះក៏ព្រោះតែកាល់ស្យូមមានតួនាទីចាំបាច់សម្រាប់ការគ្រប់គ្រងអារម្មណ៍ជួយអោយស្ងប់និងធូរស្រាល។ ដូច្នេះហើយទើបនៅពេលទទួលទានកាល់ស្យូមបានតិចប៉ុណ្ណា ហានិភ័យនៃបញ្ហាធ្លាក់ទឹកចិត្ត និងអារម្មណ៍មិនល្អកើនឡើងប៉ុននោះ។
៤. គេងមិនលក់ ៖ ជឿ ឬអត់ថាអ្នកអាចនឹងជួបប្រទះបញ្ហាជំងឺគេងមិនលក់ ប្រសិនបើអ្នកមិនទទួលទានអាហារដែលមានផ្ទុកសម្បូរទៅដោយជាតិកាល់ស្យូមគ្រប់គ្រាន់។ បញ្ហានោះគឺកាល់ស្យូមក៏មានតួនាទីក្នុងការបង្កើតអ័រ ម៉ូនមេឡាតូនីនដែលជួយអោយគេងលក់។ ទោះបីជាពេលខ្លះកង្វះជាតិកាល់ស្យូមមិនបង្កផលប៉ះពាល់ដល់ដំណេក ប៉ុន្តែវាអាចធ្វើឲ្យអ្នកគ្មានកម្លាំងពេញលេញឡើងវិញនៅព្រឹកបន្ទាប់។
៥. ឈឺឆៀបៗនិងស្ពឹក ៖ កង្វះជាតិកាល់ស្យូមធ្ងន់ធ្ងរអាចបណ្ដាលអោយកើតមានបញ្ហាស្ពឹកនិងឈឺឆៀបជុំវិញមាត់ ឬម្រាមដៃជើង ឬសូម្បីតែញ័រសាច់ដុំ។
៦. ឧស្សាហ៍ឈឺ ៖ កាល់ស្យូម គឺជាសារធាតុចិញ្ចឹមដ៏ចាំបាច់មួយសម្រាប់រក្សាបាននូវសុខភាពប្រព័ន្ធភាពស៊ាំរឹងមាំខ្លាំងក្លា។ ប្រសិនបើអ្នកឧស្សាហ៍កើតជំងឺផ្ដាសាយ គ្រុនផ្ដាសាយ ក្អក អាឡែកស៊ី ហើយងាយឆ្លងមេរោគផ្សេងៗនោះ ចូរចាប់ផ្ដើមទទួលទានអាហារដែលមានផ្ទុកសម្បូរទៅដោយជាតិកាល់ស្យូមជាប្រចាំ។
៧. ក្រចកផុយស្រួយឆាប់បាក់ ៖ ក៏ដូចនឹងឆ្អឹងដែរ ក្រចកក៏ត្រូវការបរិមាណនៃជាតិកាល់ស្យូមគ្រប់គ្រាន់ដើម្បីរក្សាភាពរឹងមាំសុខភាពល្អផងដែរ។ ដូច្នេះនៅពេលអ្នកមានបញ្ហាខ្វះជាតិកាល់ស្យូម ក្រចកប្រែជាស្ងួតខ្លាំង ខ្សោយងាយរបកនិងឆាប់បាក់។
៨. រមួលសាច់ដុំ ៖ អាការៈរមួលសាច់ដុំដែលច្រើនកើតឡើងនៅពេលយប់អាចជារោគសញ្ញា ឬអាការៈដំបូងបំផុតមួយនៃកង្វះជាតិកាល់ស្យូមក្នុងរាងកាយ (ប្រភពពី៖ Health.com.kh) ៕ (កែសម្រួលដោយ ៖ បុប្ផា)
ចែករំលែកព័តមាននេះ