ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មានករណីជនសង្ស័យចំនួន2នាក់ ត្រូវបានសមត្ថកិច្ចឃាត់ខ្លួនភ្លាមៗ បន្ទាប់ពីពួកគេធ្វើសកម្មភាពបាញ់សម្លាប់ជនជាតិចិនម្នាក់ រួចយកមកទម្លាក់ចោលនៅចំណុចផ្លូវសេតេ បង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ច កាលពីម៉ោង9និង08នាទីព្រឹក ថ្ងៃទី៦ ខែតុលា ឆ្នាំ២០១៩ ស្ថិតនៅក្នុងភូមិ 3 សង្កាត់លេខ 2 ក្រុងនិងខេត្តព្រះសីហនុ ។
យោងតាមប្រភពព័ត៌មានជាបឋមពីកន្លែងកើតហេតុ បានឲ្យដឹងថា មុនពេលកើតហេតុ នៅម៉ោង8ព្រឹក ថ្ងៃទី6 ខែតុលានេះ មានរថយន្តមួយគ្រឿងម៉ាក Isuzu ស៊េរីខ្ពស់ បានបើកមកដល់ចំណុចកើតហេតុនៅតាមបណ្ដោយផ្លូវសេតេ ក្នុងភូមិ 3 សង្កាត់លេខ 2 ស្រាប់តែរុញសាកសពជនរងគ្រោះទម្លាក់ចោលនៅលើបណ្ដោយផ្លូវសេតេខាងលើ បង្កឱ្យមានការភ្ញាក់ផ្អើលតែម្តង ។
ប្រភពដដែលបន្តថា ក្រោយពេលទម្លាក់សពជនរងគ្រោះហើយ រថយន្តក៏បានបើកចតទៅទុកចោលនៅចំណុចផ្លូវចូលវត្តក្រោម ស្ថិតក្នុងភូមិ1 សង្កាត់ 3 ក្រុងនិងខេត្តព្រះសីហនុ រួចឡើងជិះ Passapp គេចខ្លួនបាត់ ក្នុងគោលបំណងមកសំងំលាក់ខ្លួននៅក្នុងសណ្ឋាគារវិមានខ្សាច់ស ដែលស្ថិតនៅក្រុមទី16 ភូមិ4 សង្កាត់លេខ4 ប៉ុន្តែក្រោយមកក៏ត្រូវសមត្ថកិច្ចតាមប្រមាញ់ឃាត់ខ្លួនបានចំនួន2នាក់ និងម្នាក់ទៀតកំពុងរត់គេចខ្លួននៅឡើយ។
គួរបញ្ជាក់ថា រហូតមកដល់ពេលនេះ នៅមិនទាន់ដឹងស្គាល់អត្តសញ្ញាណជនសង្ស័យ និងជនរងគ្រោះនៅឡើយនោះទេ ខណៈសមត្ថកិច្ចកំពុងធ្វើការស្រាវជ្រាវយ៉ាងដុតដៃដុតជើងតាមប្រមាញ់ជនសង្ស័យម្នាក់ទៀត ដែលកំពុងរត់គេចខ្លួន ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព។ (កែសម្រួលដោយ ៖ បុប្ផា)
ចែករំលែកព័តមាននេះ