រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា សម្បុកចោរកម្មលួចម៉ូតូដ៏ធំមួយកន្លែង ត្រូវបានលោកវរសេនីយ៍ត្រី ទូច ទី ដែលទើបតែទៅកាន់តំណែងជានាយប៉ុស្តិ៍រដ្ឋបាលនគរបាលកាកាប១ បាន១ថ្ងៃដឹកនាំកម្លាំងចុះទៅសហការណ៍ជាមួយកម្លាំងនគរបាលប៉ុស្តិ៍ស្ទឹងមានជ័យ១បង្ក្រាប ។
ដោយនៅក្នុងពេលនោះនគរបាលដកហូតបានម៉ូតូរួមជាមួយស្លាកលេខម៉ូតូជាច្រើនបន្ទះ កាតគ្រីម៉ូតូជាច្រើនសន្លឹក និងអត្តសញ្ញាណប័ណ្ណរបស់ម្ចាស់ម៉ូតូផងដែរ ប៉ុន្តែអ្វីដែលគួរឲ្យមានការសោកស្ដាយបំផុតនោះ គឺជនសង្ស័យហាក់ដឹងខ្លួនមុនក៏បានជិះម៉ូតូ១គ្រឿងរត់គេចខ្លួនបាត់ស្រមោល ។
ប្រត្តិបត្តិការនោះបានធ្វើឡើងពេញ១ថ្ងៃ ទី០៥ ខែតុលា នេះ នៅចំណុចបន្ទប់លេខ៦ ស្ថិតនៅក្នុងភូមិទ្រា១ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។ ក្រោយពេលឆែកឆេរទីតាំងនោះ នគរបាលបានរកឃើញម៉ូតូចំនួន៣គ្រឿង រួមមាន ម៉ូតូហុងដាឌ្រីមសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ 1FY-3431 ,ម៉ាកហុងដាឌ្រីមសេ១២៥ ស៊េរីឆ្នាំ២០១០ពណ៌ខ្មៅ ពាក់ស្លាកលេខកណ្ដាល 1J-7333 ,ម៉ាកស៊ុយហ្ស៊ុយគីលេត ពណ៌ស ពាក់ស្លាកលេខកំពង់ស្ពឺ 1OM-5444,ស្លាកលេខម៉ូតូចំនួន៣៨បន្ទះ , កាតគ្រីម៉ូតូចំនួន៤៥សន្លឹក, និងអត្តសញ្ញាណប័ណ្ណចំនួន៥សន្លឹក ។
ចំណែកម៉ូតូដែលត្រូវចោរលួចនោះ ម៉ាកហុងដាឌ្រីមសេ១២៥ ស៊េរីឆ្នាំ២០១៦ពណ៌ខ្មៅ ពាក់ស្លាកលេខភ្នំពេញ 1FY-3431 ដែលមានភ្ជាប់ប្រព័ន្ធតាមដានសុវត្ថិភាពGPS ជាកម្មសិទ្ធិរបស់និស្សិតស្រីម្នាក់ឈ្មោះ ត្រេន សុជាតិ អាយុ២៤ឆ្នាំ ស្នាក់នៅបន្ទប់ជួលស្ថិតនៅក្នុងភូមិប៉ប្រកាងត្បូង សង្កាត់កាកាប១ ខណ្ឌពោធិ៍សែនជ័យ ។
លោកវរសេនីយ៍ត្រីទូច ទី ដែលទើបផ្លាស់ពីនាយប៉ុស្តិ៍រដ្ឋបាលនគរបាលត្រពាំងក្រសាំងមកកាន់ជានាយប៉ុស្តិ៍កាកាប១ បាន១ថ្ងៃបានប្រាប់ឲ្យដឹងថា កាលពីវេលាម៉ោងប្រហែល៥និង៣០នាទីល្ងាច ថ្ងៃទី០៤ ខែតុលា និស្សិតស្រីរងគ្រោះខាងលើបានជិះម៉ូតូត្រឡប់មកពីធ្វើការ បានទុកម៉ូតូនៅខាងក្រោមរួចឡើទៅបន្ទប់ជួលជាន់លើ និងបានសម្រាក ។ បន្ទាប់មកបានដេកលង់លក់រហូតដល់វេលាម៉ោងប្រហែល៦និង២០នាទីព្រឹក ថ្ងៃទី០៥ ខែតុលា បន្ទាប់ពីភ្ញាក់ពីដំណេកបានដើរចុះសម្ដៅទៅរកកន្លែងទុកម៉ូតូ ស្រាប់តែបាត់អត់ឃើញទើបមានការភ្ញាក់ផ្អើលឆោឡោទាំងព្រឹក ។
លោកនាយប៉ុស្តិ៍កាកាប១ ដដែលបានបន្តថា បន្ទាប់មកនាងបានទៅដាក់ពាក្យប្ដឹងសុំឲ្យកម្លាំងលោកជួយអន្តរាគមន៍ទើបមានការស្រាវជ្រាវតាមប្រព័ន្ធតាមដានសុវត្ថិភាពGPS ដែលមានភ្ជាប់នៅនឹងម៉ូតូ ហើយបានកំណត់ដឹងថា ម៉ូតូកំពុងស្ថិតនៅក្នុងភូមិសាស្ត្រសង្កាត់ស្ទឹងមសនជ័យ១ ។ ទើបលោកដឹកនាំកម្លាំងចុះទៅកាន់ទីនោះ ក្រោមបញ្ជារបស់លោ យឹម សារ៉ាន់ អធិការនគរបាលខណ្ឌពោធិ៍សែនជ័យ ដោយបានសហការណ៍ជាមួយកម្លាំងនគរបាលប៉ុស្តិ៍ស្ទឹងមានជ័យ១ផងដែរ ។ ខណៈពេលទៅដល់ទីតាំងសម្បុកចោរបានប្រទះឃើញម៉ូតូជនរងគ្រោះនៅទីនោះមែន ហើយកម្លាំងទាំងអស់មិនបានយកចេញភ្លាមៗទេ ព្រោះពេលនោះអត់ឃើញជនសង្ស័យទើបនាំគ្នារង់ឃ្លាំមើល ដើម្បីឃាត់ខ្លួនជនសង្ស័យពេលដែលវិលចូលទៅកាន់ផ្ទះទីតាំងនោះ ។
ប្រភពដដែលបានបន្តថា ប៉ុន្តែរង់ចាំស្ទើរពេញ១ថ្ងៃទីបំផុតជនសង្ស័យដឹងខ្លួនមុនហើយក៏បានជិះម៉ូតូគេចខ្លួនបាត់ស្រមោល ហើយកម្លាំងក៏សម្រេចចិត្តឆែកឆេរបន្ទប់ជួយដែលជាសម្បុកលាក់ខ្លួនរបស់ជនសង្ស័យ និងជាកន្លែងដែលជនសង្ស័យលួចម៉ូតូបានជិះយកទៅលាក់ទុកនៅក្នុងនោះផងដែរ ។ ហើយអ្វីដែលគួរឲ្យភ្ញាក់ផ្អើលនោះ ជនសង្ស័យពិតជាមុខសញ្ញាចោរកាច់កម៉ូតូយ៉ាងសកម្មបំផុត ព្រោះគ្រាន់តែស្លាកលេខដោះចេញក្រោយលួចបាននោះជិត៤០បន្ទះ និងកាតគ្រីជិត៣០សន្លឹកទៅហើយ ។
ពេលនេះកម្លាំងលោកបានប្រគល់ម៉ូតូដែលរកឃើញជូនទៅជនរងគ្រោះវិញហើយ និងបាននាំយកវត្ថុតាងទាំងអស់ទៅរក្សាទុកនៅប៉ុស្តិ៍រង់ចាំការកសាងសំណុំរឿង និងស្រាវជ្រាវបន្ត ដើម្បីឈានទៅការចាប់ខ្លួនជនសង្ស័យខាងលើនោះទៀត៕ កែសម្រួលដោយ ៖ សុឃាក់
ចែករំលែកព័តមាននេះ