សាលាឧទ្ធរណ៍ផ្អាកសវនាការ សំណុំរឿង ថោង សារ៉ាត់ ប្តឹងជំទាស់សាលក្រម
- ភ្នំពេញ
រាជធានីភ្នំពេញ ៖ សាលាឧទ្ធរណ៍ នារសៀលថ្ងៃទី៣ ខែតុលា បានបន្តបើកសវនាការលើសំណុំរឿងឃាតកម្មបាញ់សម្លាប់ឧកញ៉ា អុឹង ម៉េងជឺដោយក្រុមអតីតឧកញ៉ា ថោង សារ៉ាត់…
រាជធានីភ្នំពេញ ៖ សាលាឧទ្ធរណ៍ នារសៀលថ្ងៃទី៣ ខែតុលា បានបន្តបើកសវនាការលើសំណុំរឿងឃាតកម្មបាញ់សម្លាប់ឧកញ៉ា អុឹង ម៉េងជឺដោយក្រុមអតីតឧកញ៉ា ថោង សារ៉ាត់ និងបក្សពួក ។ ទោះបីជាបែបណា សវនាការនេះមិនទាន់បានបញ្ចប់ទេ និងលើកពេលទៅបន្តនៅថ្ងៃទី៨ ខែតុលា ខាងមុខទៀត ។ មានការសង្កេតឃើញទណ្ឌិត ថោង សារ៉ាត់ ត្រូវបាននាំមកសវនាការដោយដេកនៅលើរទេះ ដែលដឹកតាមរថយន្តរបស់មន្ទីរពេទ្យរដ្ឋ នាំចូលក្នុងរង្វង់ក្រចកសេះជាមួយនឹងបក្សពួកដែលជាអតីតអង្គរក្សនោះដែរ និងមានសភាពស្គមស្លេកស្លាំង ។
គួរបញ្ជាក់ថា កាលពីរសៀលថ្ងៃទី២០ ខែកញ្ញាកន្លងទៅ សាលាឧទ្ធរណ៍បានលើកយកសំណុំរឿងទណ្ឌិតអតីតឧកញ៉ា ថោង សារ៉ាត់ និងបក្សពួក មកបើកសវនាការម្តងហើយ ពីការកើតទុក្ខមិនសុខចិត្តចំពោះសាលក្រមសាលាដំបូងរាជធានីភ្នំពេញ ដែលបានផ្តន្ទាទោសដាក់ពន្ធនាគារអស់មួយជីវិត មកបើកសវនាការតាមបណ្តឹងឧទ្ធរណ៍ ពាក់ព័ន្ធនឹងករណីឃាតកម្មលើឧកញ៉ា អុឹង ម៉េងជឺ ។
សវនាការបានធ្វើឡើងចំពោះមុខជនជាប់ចោទជាទណ្ឌិតចំនួន៥នាក់ មាន ១-អតីតឧកញ៉ា ថោង សារ៉ាត់ ថៅកែក្រុមហ៊ុន៩៩៩ ត្រូវបានរថយន្តមន្ទីរពេទ្យដឹកទៅចូលរួមសវនាការនិងជិះលើរទេះរុញ ២-ឈ្មោះ សៀង វាសនា ៣-ឈ្មោះ កូយ ចាន់ថុល ៤-ឈ្មោះ មាស សម្បត្តិ និង៥-ឈ្មោះ ឈុន ចិត្រា ។
សវនាការប្រព្រឹត្តធ្វើជាសាធារណៈ និងមានការសាកសួរជនជាប់ចោទអស់រយៈពេលជាច្រើនម៉ោង ទើបបញ្ចប់ទៅវិញដោយសារផុតម៉ោងរដ្ឋបាល ហើយប្រធានក្រុមប្រឹក្សាបានប្រកាសបិទអង្គជំនុំជម្រះ និងមិនកំណត់ពេលសវនាការទៅថ្ងៃក្រោយ អាស្រ័យលើការជូនដំណឹងបន្ត ។
កាលពីរសៀលថ្ងៃទី២៦ ខែមីនា ឆ្នាំ២០១៩ សំណុំរឿងឃាតកម្មបាញ់សម្លាប់ឧកញ៉ា អឹុង ម៉េងជឺ ពីសំណាក់ក្រុមអតីតឧកញ៉ា ថោងសារ៉ាត់ ត្រូវបានសាលាដំបូងរាជធានីភ្នំពេញ ប្រ កាសសាលក្រមផ្តន្ទាទោសជនជាប់ចោទដាក់ពន្ធនាគារក្នុងម្នាក់ៗអស់១ជីវិត ។ សាលក្រមបានប្រកាសជាសាធារណៈ និងចំពោះមុខជនជាប់ចោទ៤នាក់ កំបាំងមុខ ថោង សារ៉ាត់ ប៉ុន្តែចាត់ទុកជាចំពោះមុខដោយជនជាប់ចោទមានមេធាវីការពារក្តីចូលរួមស្តាប់ក្នុងពេលប្រកាសសាលក្រមនោះ ។
រឿងក្តីឃាតកម្មមួយនេះ ត្រូវបានសាធារណជនតាមដានយ៉ាងយកចិត្តទុកដាក់អស់រយៈពេលជាច្រើន
ឆ្នាំមកហើយ ហើយសវនាការបានធ្វើឡើងជាច្រើនលើកមិនធ្លាប់មាន រហូតមានសាលក្រមប្រកាសចាត់របៀបទៀតផង ។ សាធារណជនតែងតែទន្ទឹងចាំមើលលើសំណុំរឿងឃាតកម្មលើឧកញ៉ា អឹុង ម៉េងជឺ តើជនណាជាឃាតករ ដែលពេលនេះ តាមរយៈសាលក្រមប្រកាសដោយសាលាដំបូងរាជធានីភ្នំពេញ បានចោទអតីតឧកញ៉ា ថោង សារ៉ាត់ និងអង្គរក្សរបស់ខ្លួន៥នាក់ ដែលម្នាក់ស្លាប់នៅក្នុងពន្ធនាគារថាគឺជាឃាតករ ។
សូមរំឭកថា ឧកញ៉ា អឹុង ម៉េងជឺ ថៅកែក្រុមហ៊ុនស៊ីម៉ង់ត៍ត្បូងពេជ្រ បានត្រូវឃាតករបាញ់សម្លាប់ កាល
ពីយប់ថ្ងៃទី២២ ខែវិច្ឆិកា ឆ្នាំ២០១៤ នៅមុខហាងលក់ផ្លែឈើយីហោ«ឡោតិចសេង» ក្នុងខណ្ឌចំការមន រាជធានីភ្នំពេញ ។
ឃាតកម្មនាពេលនោះ ត្រូវបានថតស្តែងតាមរយៈកាមេរ៉ាសុវត្ថិភាព និងជារឿងរ៉ាវភ្ញាក់ផ្អើលធំបំផុតនាចុងឆ្នាំ២០១៤ ។ ក្រោយពីកើតមានអំពើឃាតកម្មនោះ នគរបាលព្រហ្មទណ្ឌរាជធានីភ្នំពេញ បានធ្វើការស្រាវជ្រាវនិងកំណត់មុខសញ្ញារហូតឈានដល់ការចាប់ខ្លួនជនសង្ស័យជាបន្តបន្ទាប់ចំនួន៦នាក់ពាក់ព័ន្ធនឹងអំពើឃាតកម្មនោះ ។
េយាងតាមរបាយការណ៍របស់សមត្ថកិច្ចនៅក្នុងសវនាការ អតីតឧកញ៉ា ថោង សារ៉ាត់ គឺជាអ្នកផ្តើមគំនិតក្នុងអំពើឃាតកម្ម ឯឈ្មោះ សៀង វាសនា(អង្គរក្ស) ជាជនដៃដល់កាន់កាំភ្លើងខ្លីចុះពីលើម៉ូតូ ដើរទៅបាញ់ប្រហារលោកឧកញ៉ា អឹុង ម៉េងជឺ ស្លាប់ក្នុងថ្លុងឈាមនៅនឹងកន្លែង ខណៈជនរងគ្រោះចុះពីរថយន្តទំនើបមួយគ្រឿងទៅរកទិញផ្លែឈើ ។ ចំណែកឈ្មោះ លី សៅ (អង្គរក្ស ស្លាប់ក្នុងគុក) អ្នកជិះម៉ូតូឌុបឈ្មោះ សៀង វាសនា ហើយឈ្មោះ កូយ ចាន់ថុល ឈ្មោះ មាស សម្បត្តិ និងឈ្មោះ ឈុន ចិត្រា ក៏ជាប់ពាក់ព័ន្ធក្នុងអំពើឃាតកម្មនោះដែរ ។
បន្ទាប់ពីការប្រកាសសាលក្រមសាលាដំបូងរាជធានីភ្នំពេញ ផ្តន្ទាទោសជនជាប់ចោទដាក់ពន្ធនាគារម្នាក់ៗអស់មួយជីវិត គេសង្កេតឃើញអ្នកស្រី ទាវ ធីតា ភរិយាទណ្ឌិត ថោង សារ៉ាត់ និងក្រុមគ្រួសារជនជាប់ចោទ៤នាក់ទៀតស្រែកទ្រហោយំ នៅពេលក្រុមអនុរក្សពន្ធនាគារព្រៃសនាំអ្នកទោសទៅឃុំខ្លួននៅពន្ធនាគារវិញ ។
អ្នកស្រី ទាវ ធីតា បានរិះគន់ថា សាលក្រមសាលាដំបូងរាជធានីភ្នំពេញ ផ្តន្ទាទោសប្តីអ្នកស្រីអយុត្តិធម៌ណាស់ ប្តីអ្នកស្រីមិនមែនជាឃាតករដូចការចោទប្រកាន់នោះទេ ។ ដោយសារការកើតទុក្ខមិនសុខចិត្តចំពោះសាលក្រមសាលាដំបូងរាជធានីភ្នំពេញនេះហើយ ទើបធ្វើឲ្យក្រុមគ្រួសារនិងទណ្ឌិតទាំង៥នាក់ ពឹងពាក់មេធាវីការពារក្តីប្តឹងឧទ្ធរណ៍តាមច្បាប់កំណត់ ៕
ចែករំលែកព័តមាននេះ