រាជធានីភ្នំពេញ ៖ រថយន្តម៉ាកឡិចសុីស RX-330 ១គ្រឿងត្រូវបានលោក ថេង កុសល នាយប៉ុស្តិ៍រដ្ឋបាលនគរបាលចោមចៅ៣ស្ទូចដឹកយកទៅរក្សាទុកនៅប៉ុស្តិ៍ជាបណ្ដោះអាសន្នកាលពីវេលាម៉ោង១១ព្រឹក ថ្ងៃទី៥ ខែតុលា ឆ្នាំ២០១៩ ក្រោយពេលដែលបុរសជនជាតិចិនមិនស្គាល់អត្តសញ្ញាណម្នាក់បើកយកទៅប្លុងចោលរួចចាកចេញទៅបាត់រយៈពេលជាង១០ថ្ងៃកន្លងមកហើយមិនឃើញត្រឡប់ទៅយកវិញសោះ ។ ទន្ទឹមនឹងនេះដែរលោកនាយប៉ុស្តិ៍នគរបាលចោមចៅ៣ខាងលើក៏បានប្រកាសស្វែងរកម្ចាស់ឲ្យនាំយកឯកសារពាក់ព័ន្ធផ្សេងៗទៅទទួលយករថយន្តនេះត្រឡប់ទៅវិញផង ។
រថយន្តដែលយកទៅប្លុងចោលនោះម៉ាកឡិចសុីស RX-330 ពណ៍ទឹកសមុទ្រ ពាក់ផ្លាកលេខ ភ្នំពេញ 2AX-8180 ហើយបែកកង់អស់ចំនួន៣គ្រាប់ថែមទៀតផង និងត្រូវបានជនជាតិចិនមិនស្គាល់អត្តសញ្ញាណម្នាក់បើកយកទៅប្លុងចោលនៅតាមផ្លូវជិតផ្ទះប្រជាពលរដ្ឋស្ថិតនៅក្នុងភូមិព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ អស់រយៈពេលជាង១០ថ្ងៃកន្លងមកហើយគឺតាំងពីថ្ងៃទី២៦ ខែកញ្ញា ឆ្នាំ២០១៩ មកម្ល៉េះ ។
អ្នកភូមិព្រៃទាបាននិយាយប្រាប់ឲ្យនគរបាលដឹងថា កាលពីជាង១០ថ្ងៃមុនពួកគាត់បានឃើញបុរសជនជាតិចិនមិនស្គាល់អត្តសញ្ញាណម្នាក់បើកយករថយន្ត១គ្រឿងនេះទៅឈប់នៅត្រង់ចំណុចខាងលើបន្ទាប់មកបានបើកទ្វារចុះដើរចាកចេញទៅបាត់រហូតតែម្ដងមិនឃើញត្រឡប់ទៅយករថយន្តវិញឡើយ ។ បន្ទាប់ពីឃើញរថយន្តចតនៅទីនោះច្រើនថ្ងៃបែបនេះពួកគាត់មិនហ៊ានប៉ះពាល់ឡើយព្រោះខ្លាចជាប់ពាក់ព័ន្ធទៅនឹងបទល្មើសផ្សេងដូចជាចោរកម្ម លួចប្លន់ ឬអំពើឃាតកម្មអ្វីមួយរួចហើយក៏បានរាយការណ៍ជូនលោកនាយប៉ុស្តិ៍ចោមចៅ៣ចុះទៅពិនិត្យមើលជាក់ស្ដែង ។
អ្នកភូមិបានបន្តថា រថយន្តម៉ាកឡិចសុីស RX-330 មួយគ្រឿងខាងលើពួកគាត់សង្ស័យថាជនជាតិចិនម្នាក់នោះអាចនឹងជួលរថយន្តនេះពីជនជាតិខ្មែរយើងណាម្នាក់ហើយពុំមែនជាកម្មសិទ្ធិរបស់ជនជាតិចិននោះឡើយ ។
លោក ថេង កុសល នាយប៉ុស្តិ៍រដ្ឋបាលនគរបាលចោមចៅ៣បានប្រាប់ឱ្យដឹងថា ក្រោយពីទទួលបានសេចក្ដីរាយការណ៍លោកបានដឹកនាំកម្លាំងចុះទៅពិនិត្យមើល ប៉ុន្តែពុំឃើញមានអ្វីគួរឲ្យមានការសង្ស័យនៅក្នុងរថយន្តនេះទេ ។ ប៉ុន្តែលោកក៏មិនទាន់ដឹងថា រថយន្តនេះមានជាប់ពាក់ព័ន្ធទៅនឹងបទល្មើសលួចប្លន់យកពីកន្លែងណាមួយមកប្លុងចោលទីនេះនៅឡើយទេ ហើយលោកកំពុងធ្វើការស្រាវជ្រាវរកមូលហេតុនៃការប្លុងចោលនេះហើយ ។
ពេលនេះប្រសិនបើបងប្អូនណាបាត់រថយន្តឬបានស្គាល់ថារថយន្តនេះគឺជាកម្មសិទ្ធិរបស់ខ្លួននោះសូមនាំយកឯកសារពាក់ព័ន្ធផ្សេងៗទៅទំនាក់ទំនងជាមួយលោកដើម្បីសុំយករថយន្តត្រឡប់ទៅវិញផង លោករង់ចាំទទួលសម្រួលជូនជានិច្ច ៕
កែសម្រួលដោយ ៖ សំណាង
ចែករំលែកព័តមាននេះ