សហភាពអឺរ៉ុប ៖ សហភាពអឺរ៉ុបកាលពីថ្ងៃទី៣តុលាបានសន្យាពីការតបតវិញចំពោះទណ្ឌកម្មអាមេរិក លើបណ្ដាផលិតផលអឹរ៉ុបតែដោយសង្ឃឹមថា អាចសម្រេចបានកិច្ចព្រមព្រៀងមួយជាមួយក្រុងវ៉ាស៊ិនតោន ដើម្បីចៀសវាងការបង្កើនសង្គ្រាមពាណិជ្ចកម្មដ៏ចង្រៃរវាងភាគីទាំង២។
ភាពតានតឹងរវាងអឺរ៉ុបនិងសហរដ្ឋអាមេរិកកើតមានភ្លាមៗ កាលពីថ្ងៃទី២តុលាពេលក្រុងវ៉ាស៊ិនតោនប្រកាសយកពន្ធគយដាក់ទណ្ឌកម្មមានទឹកប្រាក់៧,៥ពាន់លានដុល្លារ លើបណ្ដាផលិតផលអឺរ៉ុប ក្រោយពីទទួលភ្លើងខៀវរបស់អង្គការពាណិជ្ជកម្មពិភពលោក ក្នុងក្របខណ្ឌនៃការតតាំងគ្នាខាងផ្លូវច្បាប់អស់ពេល១៥ឆ្នាំមកហើយ រវាងក្រុមហ៊ុនប៊ូអ៊ីងអាមេរិកនិងក្រុមហ៊ុនAIRBUSអឺរ៉ុប។
ក្នុងសន្និសីទសារព័ត៌មានមួយអ្នកនាំពាក្យរបស់គណៈកម្មាធិការអឺរ៉ុប លោកDANIEL ROSARIOបានព្រមានថា ចម្លើយតបរបស់ក្រុងព្រុចសែលក្នុងនាមរដ្ឋទាំង២៨ជាសមាជិកសហភាពអឺរ៉ុប មិនបាច់រង់ចាំឡើយ។ ប្រសិនបើអាមេរិកដាក់ទណ្ឌកម្មនានានោះនឹងជម្រុញឲ្យសហភាពអឹរ៉ុបធ្វើដូចគ្នានេះដែរ។
ចំណែកប្រទេសបារាំងអ្នកនាំពាក្យរដ្ឋាភិបាលគូសបញ្ជាក់ថា ក្រុងប៉ារីសគ្រោងបណ្ដាវិធានការតបតវិញ ប្រឆាំងសហរដ្ឋអាមេរិកដោយមានការព្រមព្រៀងគ្នាជាមួយសហភាពអឺរ៉ុប។ ដោយសម្ដែងការសោកស្ដាយចំពោះការសម្រេចរបស់អាមេរិក លោកROSARIOអះអាងថា ការយកពន្ធគយបន្ថែមដែលនឹងចូលជាធរមានពីថ្ងៃទី១៨តុលាទៅ នឹងប៉ះពាល់មុនគេដល់បណ្ដាអ្នកប្រើប្រាស់និងបណ្ដាសហគ្រាសអាមេរិក។ ពួកគេត្រូវចាយលុយថែមសម្រាប់ទិញបណ្ដាផលិតផលដែលពួកគេត្រូវការចាំបាច់៕ (កែសម្រួលដោយ ៖ បុប្ផា)
ចែករំលែកព័តមាននេះ