រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ស្ត្រីមេម៉ាយម្នាក់ត្រូវបានក្រុមគ្រួសារអះអាងថា មានជំងឺប្រចាំកាយមើលមិនជាក៏តូចចិត្តខ្លួនឯងធ្វើដំណើរមកលោតទឹកសម្លាប់ខ្លួនពីលើស្ពានជ្រោយចង្វារ បណ្តាលឲ្យស្លាប់ហើយលិចបាត់រកសពពុំឃើញ ។ ហេតុការណ៍នេះបង្កឲ្យមានការភ្ញាក់ផ្អើល កាលពីវេលាម៉ោងប្រមាណ១២និង៣០នាទីថ្ងៃត្រង់ ទី០៤…
រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ស្ត្រីមេម៉ាយម្នាក់ត្រូវបានក្រុមគ្រួសារអះអាងថា មានជំងឺប្រចាំកាយមើលមិនជាក៏តូចចិត្តខ្លួនឯងធ្វើដំណើរមកលោតទឹកសម្លាប់ខ្លួនពីលើស្ពានជ្រោយចង្វារ បណ្តាលឲ្យស្លាប់ហើយលិចបាត់រកសពពុំឃើញ ។ ហេតុការណ៍នេះបង្កឲ្យមានការភ្ញាក់ផ្អើល កាលពីវេលាម៉ោងប្រមាណ១២និង៣០នាទីថ្ងៃត្រង់ ទី០៤ ខែតុលា នេះ នៅចំនុចលើស្ពានជ្រោយចង្វារចាស់ ស្ថិតក្នុងសង្កាត់ស្រះចក ខណ្ឌដូនពេញ ។
ស្ត្រីរងគ្រោះមានវិបត្តិរូបនោះឈ្មោះ ហេន នាថ អាយុ៤៣ឆ្នាំ ស្នាក់នៅផ្ទះជួល ភូមិត្រពាំងថ្លឹង សង្កាត់ ចោមចៅទី២ ខណ្ឌពោធិសែនជ័យ និងមានស្រុកកំណើតនៅភូមិព្រែកប្រណាក ឃុំរាយប៉ាយ ស្រុកកងមាស ខេត្តកំពង់ចាម ។
តាមព័ត៌មានអោយដឹងថា នៅមុនពេលកើតហេតុគេឃើញស្ត្រីរូបនោះធ្វើដំណើរឡើងលើស្ពានពីទិសខាងលិចទៅកើតដោយមានកាន់កាបូបមួយ ។ នៅពេលដល់កណ្តាលស្ពាន ស្រាប់តែទុកកាបូប និងដោះស្បែកជើងលោតទម្លាក់ខ្លួនទៅក្នុងទន្លេ បង្កឲ្យមានការភ្ញាក់ផ្អើល តែម្តង ។
តាមព័ត៌មានអោយដឹងទៀតថា នៅពេលលោតអ្នកដំណើរក៏បានរត់ទៅជួយចាប់ដែរ តែមិនទាន់ ។ បន្ទាប់ពីលោតសម្លាប់ខ្លួន ស្ត្រីរូបនោះក៏បានលិចបាត់រកសពពុំឃើញឡើយ ។ តាមកូនស្រីឈ្មោះ ខេង ស្រីឡា អាយុ២៣ឆ្នាំ បានអោយដឹងថា ម្តាយរបស់នាងបានចេញពីផ្ទះ កាលពីថ្ងៃទី៣ ខែតុលានេះ ហើយបាត់រហូត ដោយនាងមិនបានចាប់អារម្មណ៍ឡើយ ។
លុះនៅមុនពេលកើតហេតុនាងមិនឃើញម្ដាយត្រឡប់មកផ្ទះវិញ ក៏បានតេសួរ ស្រាប់តែម្ដាយប្រាប់ថា គាត់មកលោតទឹកសម្លាប់ខ្លួននៅស្ពានជ្រោយចង្វារ នាងក៏មិនជឿ និងគិតថា ម្តាយគិតខ្លីបែបនេះ ។ កូនស្រីរូបនោះបានបន្តថា នៅវេលាម៉ោងប្រមាណ១រសៀល មានប្រជាពលរដ្ឋតេប្រាប់នាងថា ម្ដាយបានលោតទឹកសម្លាប់ខ្លួនពីលើស្ពានជ្រោយចង្វារបាត់ហើយ ។
ក្រោយមកទៀត សមត្ថកិច្ចបានតេទៅប្រាប់ថា ឲ្យមកយកកាបូប ទូរស័ព្ទ និងសំបុត្រពេទ្យទើបដឹងថា ម្ដាយស្លាប់មែន ។ តាមព័ត៌មានអោយដឹងទៀតថា មូលហេតុដែលធ្វើអោយស្ត្រីមេម៉ាយរូបនោះលោតទឹកសម្លាប់ខ្លួន ដោយសារតែមានជំងឺមហារីកក្រពះជាយូរមកហើយ ៕ កែសម្រួលដោយ ៖ សុឃាក់
ចែករំលែកព័តមាននេះ