រាជធានីភ្នំពេញ ៖ នាយចេក ជាតារាកំប្លែងប្រចាំក្រុមនាយកុយច្រើនឆ្នាំមកហើយ ដោយតស៊ូសម្តែង ហើយសង្ឃឹមថាមាននិរន្តរភាពអាជីពនៅក្នុងក្រុម ។ ក្រោយពេលការសម្តែងកំប្លែងតាមទូរទស្សន៍កាន់តែខ្សត់ទៅ បណ្តាលឲ្យនាយត្រូវដកចេញពីក្រុម ដូច្នេះនាយក៏ពិបាកទប់ទល់ជីវភាពរស់នៅ…
រាជធានីភ្នំពេញ ៖ នាយចេក ជាតារាកំប្លែងប្រចាំក្រុមនាយកុយច្រើនឆ្នាំមកហើយ ដោយតស៊ូសម្តែង ហើយសង្ឃឹមថាមាននិរន្តរភាពអាជីពនៅក្នុងក្រុម ។ ក្រោយពេលការសម្តែងកំប្លែងតាមទូរទស្សន៍កាន់តែខ្សត់ទៅ បណ្តាលឲ្យនាយត្រូវដកចេញពីក្រុម ដូច្នេះនាយក៏ពិបាកទប់ទល់ជីវភាពរស់នៅ តែនៅចិញ្ចឹមចិត្តចង់សម្តែងដូចមុនដដែល ។
មហាជនបានដឹងថា តារាកំប្លែងជើងចាស់នាយចេក បានបាត់មុខពីក្រុមនាយកុយជាយូរមកហើយ ស្របពេលដែលបច្ចុប្បន្ននេះលោកបានជ្រើសរើសមុខរបរលក់ដូរតាមចិញ្ចើមផ្លូវ ដើម្បីសម្រាលជីវភាពរបស់ខ្លួន ទោះបីលំបាកបន្តិចក្តី ប៉ុន្តែលោកនៅតែតស៊ូមិនរួញរាឡើយ។ នាយចេកវ័យកាន់តែជ្រេទៅហើយ ក៏ប៉ុន្តែនៅតែខិតខំប្រឹងប្រែងនៅក្នុងការងាររកស៊ីរបស់ខ្លួន ដើម្បីគ្រួសារ ជាពិសេស កូនៗឲ្យសិក្សាបានខ្ពង់ខ្ពស់នឹងគេ ។
ក្នុងអំឡុងរដូវបុណ្យភ្ជុំបិណ្ឌដែលទើបរំលងទៅ ថ្មីៗនេះមានតារាប្រុសស្រីជាច្រើនបានលេចមុខនៅលើកញ្ចក់ទូរទស្សន៍ ក៏ប៉ុន្តែនាយចេកបែរជានៅផ្ទះលក់ដូរតាមផ្លូវទៅវិញ។ ទន្ទឹមនោះនាយចេកបានរៀបរាប់យ៉ាងស្រងូត ជាមួយនឹងក្តីសង្ឃឹមថាខ្លួននឹងបានឡើងឆាកដូចតារាដទៃវិញ ។
នាយបានបង្ហោះសារតាមហ្វេសប៊ុករបស់ខ្លួនថា ៖ «កាលពីមុនដល់រដូវបុណ្យ ម្ដងៗ តែងតែជូនពរបងប្អូន តាមរយៈស្ថានីយទូរទស្សន៍ បានផ្អាកមួយរយៈមកនេះ ពីព្រោះមេក្រុមគេថាលុយតិច មនុស្សច្រើនចែកមិនគ្រាន់ក៏ឲ្យខ្ញុំផ្អាកពីការសម្ដែងទាំងមានការស្ដាយថាធ្លាប់សម្ដែងជូនបងប្អូនសើចសប្បាយរីករាយ និងមានការគាំទ្រខ្ញុំទាំងចាស់ក្មេងផងដែរ។ តែសព្វថ្ងៃខ្ញុំនៅតែលេងជូនបងប្អូន កូនក្មួយតាមរយៈភ្លេងការ ភ្លេងសម័យ អាយ៉ៃ កំប្លែង បុកល័ក្ខ និងទៅតាមបណ្តាខេត្ត ដែលមានតម្លៃសមរម្យផងដែរ ហើយខ្ញុំក៏នៅមានការសង្ឃឹមថា គង់ថ្ងៃណាមួយនឹងមានវត្តមានតាមស្ថានីយទូរទស្សន៍វិញជាមិនខាន ។ សូមអគុណបងប្អូនដែលនៅគាំទ្រការសម្ដែងរហូតមក»។
បើទោះបីជានាយចេកលើកឡើងបែបនេះក៏ដោយក៏នៅមិនទាន់មានតម្រុយថាអាចចូលរួមសម្តែងបានវិញទេ ដោយសារមានមតិខ្លះលើកឡើងថាទូរទស្សន៍ឥឡូវខ្សត់អ្នកមើល ហើយទស្សនិកជននិយមមើលការកម្សាន្តតាមស្មាតហ្វូន ។
យ៉ាងណាក៏ដោយអ្នកគាំទ្រមួយចំនួនរំពឹងថាអ្នកដឹកនាំកម្មវិធីកម្សន្ត ផ្សេងៗក៏ដូចជាផេកសិល្បៈ ល្បីៗ ផលិតករនឹងមើលឃើញពីផលលំបាករបស់នាយចេក ហើយជូនការងារឲ្យគាត់ ៕ (កែសម្រួលដោយ ៖ បុប្ផា)
ចែករំលែកព័តមាននេះ