ខេត្តបន្ទាយមានជ័យ ៖ ពលករប្រុងឆ្លងដែនទៅរកការងារធ្វើលើដីថៃជាង100នាក់ត្រូវបានកម្លាំងនគរបាលការពារព្រំដែនគោក807ធ្វើការទប់ស្កាត់អប់រំមិនឲ្យឆ្លងដែនខុសច្បាប់ នេះបើតាមការឲ្យដឹងពីសមត្ថកិច្ចព្រំដែនជួរមុខក្នុងស្រុកថ្មពួក ។
ពលករជាង100នាក់ខាងលើមានស្រី56នាក់ត្រូវបានទប់ស្កាត់ចាប់ពីថ្ងៃទី30 ខែកញ្ញា ដល់ថ្ងៃទី3 ខែតុលា ឆ្នាំ2019 នៅចំណុចភូមិសាស្ត្របន្ទាត់ព្រំដែនរវាងភូមិសាមគ្គី និងភូមិត្រពាំងសំរោង និងភូមិបន្ទាយមានឬទ្ធី ឃុំគោករមៀត ស្រុកថ្មពួក ។
សមត្ថកិច្ចនៅភូមិសាស្ត្រកើតហេតុប្រាប់ថា ពលករទាំងនេះមកពីខេត្តសៀមរាប, បន្ទាយមានជ័យ និងបាត់ដំបង ។ ពេលសាកសួរពួកគេប្រាប់សមត្ថកិច្ចថា ប្រុងទៅរកការងារធ្វើលើទឹកដីថៃ ។
លោកអនុសេនីយ៍ឯក ម៉ៅ ដារ៉ា មេប៉ុស្តិ៍អូរសាយនៃនគរបាលការពារព្រំដែនគោកលេខ807ប្រាប់ឲ្យដឹងថា ពលករទាំងអស់ក្រោយទប់ស្កាត់ និងអប់រំក៏បានឲ្យពួកគេត្រឡប់ទៅលំនៅដ្ឋានវិញរៀងខ្លួនៗ ។
មិនតែប៉ុណ្ណោះលោកបានណែនាំដល់ពលករទាំងអស់ឲ្យងាកទៅរកឯកសារស្របច្បាប់មុនឆ្លងទៅប្រទេសថៃព្រោះថា បើឆ្លងដែនខុសច្បាប់ពេលជួបបញ្ហាពុំមានអ្នកទទួលខុសត្រូវឡើយ ៕
កែសម្រួលដោយ ៖ សំណាង
ចែករំលែកព័តមាននេះ