សហគ្រិនភាពមិនមែនជាជម្រើសដែលងាយស្រួលទេ ហើយវាក៏មិនមែនតែងតែជាជម្រើសដែលត្រឹមត្រូវសម្រាប់មនុស្សគ្រប់រូបឡើយ ។ ដូច្នេះវាពិតជាសំខាន់ណាស់ ក្នុងការគិតគូពិចារណាឲ្យបានច្បាស់លាស់មុនពេលសម្រេចចិត្តបោះបង់ការងារប្រចាំថ្ងៃ ដើម្បីបើកអាជីវកម្ម ឬក្រុមហ៊ុនណាមួយ ។ យ៉ាងណាក្តី តើអ្នកអាចធ្វើដូចម្តេច ដើម្បីដឹងថា ភាពជាសហគ្រិនជាជម្រើសល្អ ឬមិនល្អសម្រាប់អ្នក ? អ្នកស្រី Ashley Merill ដែលជាស្ថាបនិក និងនាយកប្រតិបត្តិរបស់ក្រុមហ៊ុន Lunya បានប្រាប់មកថា អ្នកត្រូវតែចេះឆ្លើយសំណួរខាងក្រោមនេះជាមុនសិន៖
១. តើគំនិតអាជីវកម្មអ្នកអាចដោះស្រាយបញ្ហាពិតជាក់ស្តែងទេ ?
ការបើកអាជីវកម្មដែលមានសក្តានុពលប្រៀបបានជាដំណើរផ្សងព្រេងក្នុងការស្វែងរកដំណោះស្រាយសម្រាប់បញ្ហាណាមួយជាក់ស្តែង ។ ពេលដែលអ្វីដែលអ្នកផ្គត់ផ្គង់ដំណោះស្រាយអ្នកទិញរបស់អ្នកនឹងផ្តល់តម្លៃដល់អាជីវកម្មរបស់អ្នក ។ ជាលទ្ធផលអាជីវកម្មរបស់អ្នកនឹងបន្តរីកចម្រើន ។
២. តើគំនិតរបស់អ្នកជួយរកលុយឲ្យអ្នកទេ ?
អាជីវកម្មត្រូវតែរកប្រាក់ចំណេញទើបអាចបន្តដំណើរការទៅមុខបាន ។ ប៉ុន្តែមានសហគ្រិនជាច្រើនរូបដែលឲ្យតម្លៃលើគំនិតរបស់ខ្លួន ព្រោះវាជាអ្វីដែលពួកគេចាប់អារម្មណ៍ និងចូលចិត្តដោយភ្លេចគិតថា តើគំនិតនេះអាចជួយឲ្យពួកគេរកលុយ ឬទេ ? អ្នកត្រូវគិតថា តើអ្នកមានអ្វីដែលមនុស្សចង់បាន ឬសុខចិត្តយកប្រាក់ទៅដូរយកទេ ?
៣. តើអ្នកមានមូលហេតុសមហេតុសមផលទេ ?
ការចាប់ផ្តើមអាជីវកម្មមួយផ្ទាល់ខ្លួនមិនមែនតែងតែជាផ្លូវកាត់ក្នុងការរកលុយទេ ហើយមូលហេតុដែលធ្វើឲ្យអ្នកសម្រេចចិត្តដើរផ្លូវជាសហគ្រិនអាចជាកត្តាជំរុញទឹកចិត្ត និងកម្លាំងក្នុងការគ្រប់គ្រង និងធ្វើឲ្យអាជីវកម្មអ្នកជោគជ័យដែរ ។ អាជីវកម្មដែលត្រូវបានបង្កើតឡើង ដើម្បីដោះស្រាយបញ្ហាណាមួយក្នុងសង្គម គឺជាកត្តាជំរុញដ៏ល្អមួយដល់ស្ថាបនិក និងបុគ្គលិកក្នុងក្រុមហ៊ុន ព្រមទាំងជួយឲ្យពួកគេមានចិត្តតស៊ូឆ្លងកាត់គ្រប់ឧបសគ្គជាដើម ។
៤. តើអ្នកមានចិត្តចង់ធ្វើជាសហគ្រិនខ្លាំងប៉ុណ្ណា ?
សហគ្រិនប្រៀបបានជាមនុស្សដែលបោះបង់ការងារដែលធ្វើការ៤០ម៉ោងក្នុងមួយសប្តាហ៍ ដើម្បីមកធ្វើការ៨០ម៉ោងក្នុងមួយសប្តាហ៍ ។ សហគ្រិនមួយចំនួនមិនមានថ្ងៃចុងសប្តាហ៍ឡើយ ហើយពួកគេក៏ត្រូវបោះបង់ថ្ងៃឈប់សម្រាក និងការចូលដំណេកផងដែរ ដើម្បីគិតគូសម្រាប់អាជីវកម្មខ្លួន ។
ទស្សនៈ គឺពិតជាសំខាន់ណាស់ ដូច្នេះប្រសិនបើអ្នកមិនមានចិត្តប្តេជ្ញាឆ្លងកាត់គ្រប់ឧបសគ្គ ឬទុក្ខលំបាកទេនោះ អ្នកមិនគួរសម្រេចចិត្តដើរផ្លូវនេះឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ