ខេត្តកំពង់ចាម ៖ ខណៈទឹកទន្លេមេគង្គស្រកចុះ ក៏បណ្តាលឲ្យសសរព្រះវិហារវត្តធម្មយុត្តចុងកោះដែលមានអាយុកាលជិត២០០ឆ្នាំ ស្ថិតនៅភូមិទី៩ ឃុំកោះសូទិន ស្រុកកោះសូទិន បាក់សសរបេតុង២ដើមចូលទៅក្នុងទឹកទន្លេមេគង្គ ធ្វើឲ្យពុទ្ធបរិស័ទចំណុះជើងវត្ត និងអាជ្ញាធរមូលដ្ឋានសោកស្តាយយ៉ាងខ្លាំង…
ខេត្តកំពង់ចាម ៖ ខណៈទឹកទន្លេមេគង្គស្រកចុះ ក៏បណ្តាលឲ្យសសរព្រះវិហារវត្តធម្មយុត្តចុងកោះដែលមានអាយុកាលជិត២០០ឆ្នាំ ស្ថិតនៅភូមិទី៩ ឃុំកោះសូទិន ស្រុកកោះសូទិន បាក់សសរបេតុង២ដើមចូលទៅក្នុងទឹកទន្លេមេគង្គ ធ្វើឲ្យពុទ្ធបរិស័ទចំណុះជើងវត្ត និងអាជ្ញាធរមូលដ្ឋានសោកស្តាយយ៉ាងខ្លាំង និងព្រួយ បារម្ភខ្លាចបាក់ព្រះវិហារទាំងមូលចូលទឹកទន្លេ ។
ចៅអធិការវត្តនាម ជឹម ចន្ទថុនា មានថេរដីកាឲ្យដឹងថា នារដូវប្រាំងកន្លងទៅច្រាំងទន្លេនៅក្រោយព្រះវិហារ ចម្ងាយជាង១០ម៉ែត្រដោយសារមានការព្រួយបារម្ភខ្លាចបាក់ចូលទៅក្នុងទឹកទន្លេមេគង្គ ក៏បានស្នើសុំទៅមន្ទីរវប្បធម៌និងវិចិត្រសិល្បៈខេត្ត ដើម្បីសុំការអន្តរាគមន៍រុះរើចៀសវាងកុំឲ្យបាក់បែកខូចខាត ។ លុះនៅពេលទឹកទន្លេឡើងក្នុងរដូវវស្សាឆ្នាំ២០១៩នេះ កាលពី១ខែមុន ចេតិយមួយនៅជិតព្រះវិហារដែលកសាងក្នុងអំឡុងឆ្នាំ១៨៨៥គឺចេតិយលោកយាយ ម៉ម ធូ បានបាក់ធ្លាក់ចូលទៅក្នុងទឹកទន្លេបាត់ទៅហើយ។
ចៅអធិការវត្តចុងកោះមានថេរដីកាទៀតថា លុះមកដល់ព្រឹកថ្ងែទី៣០ ខែកញ្ញា ខណៈទឹកទន្លេស្រកនោះស្រាប់តែបាក់ច្រាំងទន្លេនាំយកសសរបេតុងព្រះវិហារចំនួន២ដើមធ្លាក់ក្នុងទឹក ។ ព្រះអង្គក៏ដូចជាពុទ្ធ បរិ ស័ទចំណុះជើងវត្ត មានការសោកស្តាយជាខ្លាំងដែលព្រះវិហារមានអាយុកាលជិត២០០ឆ្នាំហើយ ត្រូវបានខាងមន្ទីរវប្បធម៌និងវិចិត្រសិល្បៈខេត្តចាត់ទុកជាសម្បត្តិវប្បធម៌ជាតិបានបាក់ ។ ដោយសារសំណើសុំរុះរើហាក់ដូចជាមានភាពយឺតយា៉វនោះ ក៏មានការរុះដំបូលក្បឿងបានមួយចំនួន តែខាងមន្ទីរវប្បធម៌និងវិចិត្រសិល្បៈខេត្តមកឃាត់មិនឲ្យរុះបន្តទៀត រហូតដល់ទឹកឡើងមកធ្វើឲ្យបាក់សសរអស់២ដើមទើបឲ្យរុះ ប៉ុន្តែមិនមានអ្នកណាហ៊ានឡើងរុះក្បឿងទៀតទេ ព្រោះខ្លាចបាក់មានគ្រោះថ្នាក់ដល់អាយុជីវិត ។
ព្រះសង្ឃនិងពុទ្ធបរិស័ទចំណុះជើងវត្ត បាននាំគ្នារុះមេរុនៅជាប់នឹងព្រះវិហារ បានរបស់របរមួយចំនួនក្នុងនោះមានទ្វារនិងបង្អួចឈើ ហើយរហូតមកដល់ព្រឹកថ្ងៃទី១ ខែតុលា ក៏បន្តការរុះទៀត យកទៅដាក់នៅទីតាំងវត្តសាងសង់ថ្មីចម្ងាយពីកន្លែងចាស់ប្រហែល២គីឡូម៉ែត្រ ហើយប្រសិនណាប្រើបាននឹងប្រើបន្ត ។
ជាមួយនឹងការព្រួយបារម្ភពីការបាក់ច្រាំងខូចព្រះវិហារនេះ ក៏មានការអំពាវនាវដល់សម្តេចតេជោនាយករដ្ឋមន្ត្រី ហុ៊ន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សូមជួយសង្គ្រោះវត្តចុងកោះនេះផង ដោយធ្វើយ៉ាងណាកុំឲ្យបាក់ច្រាំងបន្តទៀត ព្រោះថាវត្តនេះបើគិតមកដល់សព្វថ្ងៃមានអាយុកាលជិត
២០០ឆ្នាំហើយ ។
លោកស្រី ស៊ុន ចន្ថា មេឃុំកោះសូទិន មានប្រសាសន៍ថា ក្នុងនាមអាជ្ញាធរមូលដ្ឋានពិតជាមានការសោក ស្តាយចំពោះព្រះវិហារមានអាយុកាលជិត២សតវត្សរ៍ ដោយសារច្រាំងបាក់យកសសរអស់២ដើមចូលទៅក្នុងទន្លេមេគង្គ ។ ពេលទទួលបានដំណឹងនេះ នៅព្រឹកថ្ងែទី១ ខែតុលា លោកស្រីបានធ្វើដំណើរតាមទូកទៅមើល ហើយប្រសិនបើពេលទឹកស្រកខាងមុខមិនបាក់បន្តទៀតនោះ លោកស្រីនឹងឲ្យគណៈកម្មការវត្តរុះយកសសរឈើចំនួន១០ដើមដែលសុទ្ធសឹងជាឈើល្អៗហើយខ្លឹមជាប្រភេទកកោះ ដើម្បីទុកធ្វើអ្វីៗបន្តទៀតតាមតែអាចប្រើបាន ៕
ចែករំលែកព័តមាននេះ