រាជធានីភ្នំពេញ ៖ ប្តីជិះម៉ូតូឌុបប្រពន្ធមានផ្ទៃពោះមិនគោរពភ្លើងស្តុបនៅផ្លូវបំបែកជាបួន ក៏ត្រូវរថយន្តម៉ាកព្រូសមួយគ្រឿង បើកជ្រុលទៅបុក បណ្តាលឱ្យប្តីរងរបួសស្រាល ចំណែកប្រពន្ធដែលរងរបួសត្រូវបានគេដឹកទៅមន្ទីរពេទ្យដើម្បីសង្គ្រោះ ។ បន្ទាប់ពីកើតហេតុ ភាគីខាងរថយន្តទារសំណងចំនួន២៥០ដុល្លារ តែភាគីខាងម៉ូតូសងចំនួន២០០ដុល្លារ ។
ហេតុការណ៍ខាងលើនេះបានកើតឡើងកាលពីវេលាម៉ោង១រំលងអាធ្រាត្រឈានចូលថ្ងៃទី៣ ខែតុលា ឆ្នាំ២០១៩ ចំនុចស្តុបបូកគោ ផ្លូវព្រះមុនីវង្ស កែងនិងផ្លូវម៉ៅសេទុង សង្កាត់បឹងត្របែក ខណ្ឌចំការមន ។
ភាគីខាងប្តីនិងប្រពន្ធដែលមានផ្ទៃពោះខាងលើមិនស្គាល់អត្តសញ្ញាណនោះ បានជិះម៉ូតូមួយគ្រឿងម៉ាកស្គូពី ពណ៌ក្រហម ពាក់ស្លាកលេខ ភ្នំពេញ ១FX-១៤១៧ ។ ចំណែកភាគីខាងរថយន្តមួយគ្រឿងខាងលើម៉ាកព្រូស ពណ៌ក្រហម ពាក់ស្លាកលេខ ភ្នំពេញ ២X-៩៤៤២ បើកបរដោយបុរសម្នាក់មិនស្គាល់អត្តសញ្ញាណ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញ ប្តីប្រពន្ធ២នាក់ ដោយប្រពន្ធមានផ្ទៃពោះផងនោះ បានជិះម៉ូតូមួយគ្រឿងម៉ាកស្គូពីធ្វើដំណើរតាមផ្លូវព្រះមុនីវង្សក្នុងទិសដៅពីជើងទៅត្បូង លុះមកដល់ចំនុចកើតហេតុ ដែលជាផ្លូវបំបែកជាបួន ហើយភ្លើងស្តុបបានលោតពណ៌ក្រហម តែខាងម៉ូតូមិនគោរពភ្លើងឡើយ ។
តាមប្រភពដដែលបានបន្តថា ពេលនោះ២នាក់ប្តីប្រពន្ធខាងលើនៅតែបន្តដំណើរទាំងបំពាន ក៏ត្រូវរថយន្តមួយគ្រឿងម៉ាកព្រូស បើកបរដោយបុរសម្នាក់ ធ្វើដំណើរតាមផ្លូវម៉ៅសេទុង ក្នុងទិសដៅពីលិចទៅកើត ហើយភ្លើងស្តុបអាទិភាពរបស់ខ្លួន ទើបជ្រុលទៅបុកម៉ូតូចំពាក់កណ្ដាល រួចអូសម៉ូតូកៀបជាប់ក្រោមរថយន្ត បណ្ដាលអោយរងការខូចខាត ព្រមទាំងធ្វើឲ្យស្ត្រីជាប្រពន្ធរងរបួសត្រូវគេដឹកតាមម៉ូតូកង់បីយកទៅមន្ទីរពេទ្យដើម្បីសង្គ្រោះ ដោយឡែកបុរសជាប្តីបានរងរបួសតិចតួច ។
បន្តិចក្រោយមក គេឃើញសមត្ថកិច្ចមូលដ្ឋាននិងជំនាញចរាចរណ៍បានចុះទៅដល់កន្លែងកើតហេតុ រួចហើយក៏បានអោយភាគីទាំងសងខាងសម្របសម្រួលគ្នា ដោយខាងភាគីរថយន្ត ទាមទារសំណង២៥០ដុល្លារ តែខាងម៉ូតូសងតែ១០០ដុល្លារ ក៏នៅតែមិនត្រូវគ្នាទៀត រហូតទាល់តែខាងម៉ូតូសងសំណង២០០ដុល្លារ ទើបខាងរថយន្តព្រមទទួល ដើម្បីបញ្ចប់រឿងនៅកន្លែងកើតហេតុ ៕ (កែសម្រួលដោយ ៖ ធីតា)
ចែករំលែកព័តមាននេះ