ខេត្តពោធិ៍សាត់ ៖ មនុស្សយើងកើតមក មានវាសនាមិនដូចគ្នាទេ អ្នកខ្លះកើតមក មានរូបសម្បត្តិស្អាត អ្នក ខ្លះកើតមកមានរូបសម្បត្តិអាក្រក់ឬពិការ អ្នកខ្លះកើតក្នុងត្រកូលអភិជន និងអ្នកខ្លះទៀតកើតក្នុងត្រកូលអ្នកក្រខ្សត់…
ខេត្តពោធិ៍សាត់ ៖ មនុស្សយើងកើតមក មានវាសនាមិនដូចគ្នាទេ អ្នកខ្លះកើតមក មានរូបសម្បត្តិស្អាត អ្នក ខ្លះកើតមកមានរូបសម្បត្តិអាក្រក់ឬពិការ អ្នកខ្លះកើតក្នុងត្រកូលអភិជន និងអ្នកខ្លះទៀតកើតក្នុងត្រកូលអ្នកក្រខ្សត់ ដែលនេះជាក្រិត្យក្រមធម្មជាតិកំណត់មក ។
ជាក់ស្ដែង គ្រួសារមួយរស់នៅភូមិក្រាំងរងៀង ឃុំអន្លង់រាបស្រុកវាលវែង ខេត្តពោធិ៍សាត់ មានកូនក្នុងបន្ទុកចំនួន៦នាក់ ស្រី៥នាក់ ក្នុងនោះ៣នាក់ពិការពីកំណើត មានជីវភាពជួបការខ្វះខាតច្រើន ដែលមានឪពុកដើរស៊ីឈ្នួលគេ និងម្ដាយដាំបន្លែបង្ការជុំវិញផ្ទះគ្រាន់ចិញ្ចឹមជីវិត ។
លោកអនុសេនីយ៍ទោ សុខ ណាត នាយប៉ុស្ដិ៍រដ្ឋបាលនគរបាលឃុំអន្លង់រាបបានផ្ដល់ព័ត៌មានប្រាប់កោះសន្តិភាពឲ្យដឹងថា ក្រុមគ្រួសារខាងលើនេះប្ដីឈ្មោះ ភៀច ផេង អាយុ៤៩ឆ្នាំ មានមុខរបរដើរស៊ីឈ្នួលគេ ប្រពន្ធឈ្មោះ ភន ហ៊ុម អាយុ៤៧ឆ្នាំ មានមុខរបរដាំបន្លែនៅជុំវិញផ្ទះ ដើម្បីលក់បានលុយបន្តិចបន្តួចទិញអង្ករហូប។
ចំណែកកូនទាំង៦នាក់
១-ឈ្មោះ ភៀច ហុន ភេទស្រី អាយុ២៩ឆ្នាំ (ខ្វិនជើងទាំងពីរ)
២-ឈ្មោះ ភៀច ហេង ភេទស្រី អាយុ២៧ឆ្នាំ (ខ្វិនជើងទាំងពីរ)
៣-ឈ្មោះ ភៀច កុភ័ស្ស ភេទប្រុស អាយុ២៤ឆ្នាំ មានប្រពន្ធលែងគ្នា
៤-ឈ្មោះ ភៀច ឆវី ហៅហៀង ភេទស្រី អាយុ២២ឆ្នាំ ពិការ(គមខ្នង)តែអាចដើរបានតិចៗ
៥-ឈ្មោះ ភៀច ហ៊ីម ភេទស្រី អាយុ២១ឆ្នាំ មានប្ដីធ្វើជាកម្មករឲ្យក្រុមហ៊ុនចិននៅឃុំថ្មដាជាប់ព្រំដែនកម្ពុជា-ថៃ និង៦-ឈ្មោះ ភៀច សោភ័ណ ភេទស្រី អាយុ១៨ឆ្នាំ (នៅលីវ) ។
លោក សុខ ណាត បានឲ្យដឹងទៀតថា ក្រុមគ្រួសារខាងលើនេះ ពុំមានដីធ្លីជាកម្មសិទ្ធិនឹងគេទេ រស់នៅក្នុងផ្ទះឈើប្រក់ស័ង្កសី លើដីរបស់លោកមេឃុំជាបណ្ដោះអាសន្ន ក្នុងបន្ទុកតែមួយ ។ ទាក់ទិននឹងករណីនេះ លោកនាយប៉ុស្ដិ៍រដ្ឋបាលបានបញ្ជាក់ថា គ្រួសារខាងលើ មានស្រុកកំណើតនៅខេត្តកំពង់ធំ ប៉ុន្តែនៅឆ្នាំ២០១០ បានមករស់នៅឃុំអន្លង់រាប ស្រុកវាលវែង ខេត្តពោធិ៍សាត់ ។
មុនដំបូងរស់នៅផ្ទះជាមួយបងប្អូន ក្រោយមកដោយសារមានទំនាស់គ្នា គ្រួសារខាងលើក៍បានចាកចេញទៅរស់នៅកន្លែងផ្សេងរបៀបពនេចរ ។ លុះក្រោយមកទើបលោកមេឃុំ ឲ្យរស់នៅបណ្ដោះអាសន្នលើដីរបស់គាត់ រហូតមកដល់សព្វថ្ងៃនេះ ។ ដោយមើលឃើញជាក់ស្ដែង ក្រុមការងារនិងអាជ្ញាធរមូលដ្ឋាន បាននិងកំពុងតែគិតគូររកដីសហគមន៍ភូមិចំការជ្រៃខាងជើង ក្នុងឃុំអន្លង់រាប ដើម្បីដោះស្រាយជូនពួកគាត់ផងដែរ ។
ក្រុមគ្រួសារអភ័ព្វខាងលើ បានអំពាវនាវរកសប្បុរសជនមេត្តាជួយពួកគាតផង់ ទោះជាគ្រឿងឧបភោគបរិភោគ សម្ភារប្រើប្រាស់ ឬជាថវិកាក៍ដោយ ដើម្បីជួយសម្រាលទុក្ខលំបាកបានខ្លះៗ ព្រោះរាល់ថ្ងៃជួបការលំបាកវេទនារកពាក្យថ្លែងពុំបានឡើយ ៕
ចែករំលែកព័តមាននេះ