បានមកជាមនុស្សគួរធ្វើល្អឱ្យបានយ៉ាងតិច៥ប្រការ
ពាក្យថា មនុស្ស មកពី មន + ឧស្ស, មន ប្រែថា គំនិត ឬការគិត,…
ពាក្យថា មនុស្ស មកពី មន + ឧស្ស, មន ប្រែថា គំនិត ឬការគិត,…
ពាក្យថា មនុស្ស មកពី មន + ឧស្ស, មន ប្រែថា គំនិត ឬការគិត, ឧស្ស ប្រែថា ខ្ពស់ ឬប្រសើរ រួមគ្នាទាំងពីរស័ព្ទប្រែថា អ្នកមានគំនិតខ្ពស់ ឬជនអ្នកដឹងខុសត្រូវ ។ ដូច្នេះបានមកជាអត្តភាពជាមនុស្សមិនគួរប្រព្រឹត្តអំពើទុច្ចរិត ដូចជាសត្វដែលខ្វះបញ្ញានោះឡើយ គួរប្រព្រឹត្តតែអំពើល្អ អំពើសុចរិតយ៉ាងតិចបំផុតឲ្យបាន៥ប្រការគឺ កុំសម្លាប់ ឬវាយប្រហារគេ, កុំលួចឬឆក់ប្លន់ទ្រព្យគេ, កុំប្រព្រឹត្តខុសក្នុងកូន ប្រពន្ធ ឬប្តីគេ, កុំកុហកបោកប្រាស់គេ និងកុំសេពសុរា គ្រឿងញៀន ។
អំពើល្អទាំង៥ប្រការនេះ គឺជាគុណធម៌ជាន់ទាប ឬគុណខាងដើមរបស់មនុស្ស ដែលធ្វើឲ្យមនុស្សអាចបណ្ដុះគុណធម៌ខ្ពស់ឡើងតទៅទៀតបាន រហូតបានលុះមគ្គផលព្រះនិព្វានដែលជាគុណធម៌ដ៏វិសេសរបស់មនុស្ស ។ ម្យ៉ាងទៀត សុចរិតទាំង៥ប្រការនេះ នឹងហៅថា មនុស្សធម៌ក៏បាន តែតាមផ្លូវព្រះធម៌ ហៅថា សីល៥ បាលីថា បញ្ចសីល ។ ដោយអំណាចនៃសីលទាំង៥នេះ ជាធម៌ ដែលមនុស្សគ្រប់រូបត្រូវប្រព្រឹត្តជានិច្ច ទើបលោកហៅឈ្មោះមួយទៀតថា និច្ចសីល ។
សាធុជនណាមានធម៌ទាំង៥ប្រការនេះក្នុងសន្តានបរិបូណ៌ហើយ នរជននោះរមែងដល់នូវសេចក្តីស្ងប់ សេចក្តីសុខ និងនាំជីវិតឱ្យអស់ទៅនូវរឿងក្តៅក្រហាយ បន្សាត់បង់ទុក្ខកង្វល់ទាំងពួងទាំងឡាយចេញអំពីជីវិតទៅហោង ។ (ដោយសាន សារិន)
ចែករំលែកព័តមាននេះ