រាជធានីភ្នំពេញ ៖ ខណៈដែលព្រឹត្តិការណ៍ស៊ីហ្គេមនៅប្រទេសហ្វ៊ីលីពីនកាន់តែខិតជិតមកដល់ ម្ចាស់មេដាយមាសកីឡាអាស៊ីឆ្នាំ២០១៤ ស៊ន សៀវម៉ី ដែលគេស្គាល់ថាជាម្ចាស់មេដាយមាសស៊ីហ្គេមកាលពីឆ្នាំ២០១៧ នៅប្រទេសម៉ាឡេសុីផងនោះ បានអះអាងថា នាងនឹងប្រឹងប្រែងការពារមេដាយមាសរបស់ខ្លួននៅក្នុងឆ្នាំនេះឲ្យអស់លទ្ធភាព ។ នាងនិយាយថា មិនទាំងមានឱកាសជួបជុំបងប្អូនសាច់ញាតិក្នុងអំឡុងភ្ជុំកន្លងទៅនេះផង ដោយសារតែជាប់រវល់នឹងការហ្វឹកហាត់ ហើយមិនចង់ឡើងចុះខាតពេលវេលា ។
ស៊ន សៀវម៉ី អះអាងថា ទោះជាខកខានជួបជុំឪពុកម្តាយញាតិមិត្តបងប្អូនក្នុងឱកាស បុណ្យភ្ជុំបិណ្ឌប្រពៃណីជាតិឆ្នាំនេះ តែនាងនៅតែមានអារម្មណ៍សប្បាយចិត្តនៅពេលគិតដល់ការប្រកួតស៊ីហ្គេមខាងមុខ ។ នាងសប្បាយចិត្ត ក៏ព្រោះតែការលះបង់របស់នាង ធ្វើឡើង ដើម្បីមុខមាត់ប្រទេសជាតិ និងស្របតាមអាជីព ដែលនាងស្រឡាញ់ ។
នាងបានប្រាប់សារព័ត៌មានក្នុងស្រុកថា គ្មានអ្វីសប្បាយចិត្តជាងបានលះបង់ដើម្បីជាតិ និង អាជីពរបស់ខ្លួននោះទេ ជាពិសេសនៅពេលសម្លឹងមើលដល់លទ្ធផលនៃការប្រកួតដែលកាន់តែខិតជិតមកដល់ ។ សម្រាប់ការខកខានជួបជុំ គ្រួសារក្នុងថ្ងៃបុណ្យភ្ជុំបិណ្ឌមិនថ្វីនោះទេ ព្រោះម្តាយនិងគ្រួសាររបស់នាងបានទៅវត្តជុំគ្នារួចហើយ ។ មិនត្រឹមតែប៉ុណ្ណោះ ឪពុកម្ដាយរបស់នាងក៏បានលើកទឹកចិត្តនាងឲ្យខិតខំប្រឹងប្រែងទៀតផង ក្នុងការហ្វឹកហាត់នៅកូរ៉េនៅក្នុងពេល
នេះ ។
ការលើកឡើងរបស់នាង ស៊ន សៀវម៉ី នៅក្នុងវេទិកាជាតិលើកទី១ស្តីពីការប្រកាសកាលបរិច្ឆេទផ្លូវការនិងផ្សព្វផ្សាយពីស៊ីហ្គេមឆ្នាំ២០២៣ នៅក្នុងពេលនោះ ធ្វើឲ្យម្នាក់ៗកោតសរសើរពីការ លះបង់របស់នាងយ៉ាងខ្លាំង ។ នាងនិយាយថា ការអាក់ខានជួបជុំគ្រួសារនៅថ្ងៃបុណ្យភ្ជុំបិណ្ឌឆ្នាំនេះ គឺដើម្បីការពារកិត្តិយសក្នុងនាមជាម្ចាស់មេដាយមាសកីឡាអាស៊ីឆ្នាំ២០១៤ និងដើម្បីឲ្យការហ្វឹកហាត់ពង្រឹងសមត្ថភាពនៅប្រទេសកូរ៉េរយៈពេល២ខែរបស់នាងទទួលបានលទ្ធផល ។ នាងប្រឹងប្រែង ក៏ក្នុងបំណងការពារតំណែងជើងឯកដែលធ្លាប់បានទទួល សម្រាប់ការប្រកួតនៅក្នុងព្រឹត្តិករណ៍កីឡាស៊ីហ្គេមលើកទី៣០នៅប្រទេសហ្វ៊ីលីពីនដែលប្រព្រឹត្តទៅនាចុងឆ្នាំ២០១៩នេះ ។ ការហ្វឹកហាត់របស់នាងបានប្រព្រឹត្តទៅតាំងពីពាក់កណ្តាលខែកញ្ញា ដោយគ្រោងបញ្ចប់នៅពាក់កណ្តាលខែវិច្ឆិកា ឆ្នាំ ២០១៩ ។
ជាមួយនឹងជំហរការពារតំណែងជើងឯក ដែលធ្លាប់ក្លាយជាម្ចាស់មេដាយមាសកីឡាស៊ី ហ្គេមឆ្នាំ២០១៧ នៅម៉ាឡេស៊ីនាងហាក់រំពឹងយ៉ាងខ្លាំងថា នាងមានសង្ឃឹមច្រើននៅពេលស្រមៃដល់សង្វៀនដែលខិតជិតដល់ ។ ស្រង់សម្ដីពីសារព័ត៌មានក្នុងស្រុកមួយ ដែលនាងលើកឡើងពាក់ព័ន្ធពីជំហរខាងលើ ស៑ន សៀវម៉ី និយាយថា «ខ្ញុំគិតថា វាមិនមែនជាសម្ពាធនោះទេ ប៉ុន្តែវាជាកត្តាជំរុញឲ្យយើងខិតខំកាន់តែខ្លាំង។ បើយើងរំពឹងកាន់តែខ្ពស់ ការខិតខំរបស់យើងក៏កាន់តែខ្លាំង ព្រោះបើយើងមិនខិតខំហាត់ គេអាចដណ្តើមយកមេដាយពីយើង» ។
នេះជាការបញ្ជាក់របស់កីឡាការិនី ស៊ន សៀវម៉ី ដែលបានបន្ថែមថា កម្រិតសមត្ថភាពរបស់នាងមិនមានការធ្លាក់ចុះទេបើធៀបនឹងលើកមុន ទោះបីនាងទើបជាសះស្បើយពីរបួសជង្គង់ដែលបានវះកាត់កន្លងមកក៏ដោយ ។
ស៊ន សៀវម៉ី និយាយថា ៖ «អាចនិយាយបានថា៥០លើ៥០ ព្រោះហ្វ៊ីលីពីនជាម្ចាស់ផ្ទះហើយភាគច្រើនខ្ញុំតែងតែជួបកីឡាការិនីហ្វ៊ីលីពីននៅវគ្គផ្តាច់ព្រ័ត្រ ។ បើតាមខ្ញុំ ហ្វ៊ីលីពីនជាម្ចាស់មេដាយមាស៧ទៅ៨ជំនាន់ក្នុងព្រឹត្តិការណ៍ស៊ីហ្គេម ។ បើនិយាយពីការប្រកួតដោយសមត្ថភាព គឺខ្ញុំរំពឹងច្រើន គ្រាន់តែយើងមិនដឹងថាការប្រកួតរបៀបម៉េច គេដាក់ពិន្ទុយ៉ាងណាយើងមិនទាន់ដឹង ព្រោះម្ចាស់ផ្ទះអាចមានសិទ្ធិកែប្រែ ។ ខ្ញុំគិតថា ឆ្នាំនេះខ្ញុំអាចជោគជ័យច្រើនព្រោះ ខ្ញុំមានការតាំងចិត្តខ្ពស់ក្នុងការប្រកួត» ។
កីឡាការិនីវ័យ២៤ឆ្នាំរូបនេះ បង្ហាញពីក្តីកង្វល់ខ្លះៗថា កីឡាការិនីម្ចាស់ផ្ទះនិងកីឡាការិនីវៀតណាម អាចជាឧបសគ្គក្នុងការប្រជែង ដណ្តើមមេដាយជូនជាតិនៅលើកនេះ ប៉ុន្តែនាងក៏មិនទាន់ចុះចាញ់ដែរ ។ អុីចឹងហើយ ទើបនាងប្រឹងប្រែងហ្វឹកហាត់ដោយមិនខ្លាចនឿយហត់។
គួរបញ្ជាក់ថា ក្រោយពីប្រឡូកក្នុងវិស័យ កីឡាតេក្វាន់ដូ(WTF) អស់រយៈពេលជិត១០ឆ្នាំ តាំងពីឆ្នាំ២០១០ កីឡាការិនី ស៑ន សៀវម៉ី ហាក់ជោគជ័យខ្លាំងលើវិថីមួយនេះ ។ នាងបានសាងស្នាដៃជាច្រើនជូនជាតិតាមរយៈការឈ្នះមេដាយមាសកីឡាអាស៊ីឆ្នាំ២០១៤នៅប្រទេសកូរ៉េ ដើម្បីផ្លាស់ប្តូរប្រវត្តិសាស្ត្រ៦៥ឆ្នាំនៃការចូលរួមប្រកួតកីឡាអាស៊ីរបស់កម្ពុជា ។ នៅឆ្នាំ២០១៦ សៀវម៉ី ជាកីឡាការិនីដំបូងគេដែលទទួលបានកៅអីពេញសិទ្ធិទៅចូលរួមប្រកួតកីឡាអូឡាំពិកនៅ្រទេសប្រេស៊ីល ក្រោយពីនាងដណ្តើមបានមេដាយមាសក្នុងការប្រកួតវគ្គជម្រុះអូឡាំពិកនៅប្រទេសកូរ៉េ ។ ក្រៅពីស្នាដៃជា ប្រវត្តិសាស្ត្រទាំងនេះ សៀវម៉ី បានកសាងភាពល្បីល្បាញជាច្រើននៅក្នុងព្រឹត្តិការណ៍ការណ៍សុីហ្គេម ៕ (កែសម្រួលដោយ ៖ បុប្ផា)
ចែករំលែកព័តមាននេះ