អ្នកប្រហែលជាធ្លាប់ឮ ឬអានពីមុនមកថា ប្រសិនបើអ្នកចង់ក្លាយជាសហគ្រិនដែលជោគជ័យ អ្នកត្រូវតែជឿជាក់លើផលិតផល ឬសេវាកម្មរបស់អ្នក មានសមត្ថភាពក្នុងការបង្កើតកញ្ចប់លក់ដែលទាក់ទាញ និងតែងតែស្វែងរកវិធីដែលធ្វើឲ្យផលិតផល ឬសេវារបស់អ្នកកាន់តែប្រសើរជាងមុនជាដើម ។
ប៉ុន្តែមិនថាអ្នករៀបចំគម្រោងបានល្អប៉ុណ្ណា ស្រាវជ្រាវច្រើនប៉ុណ្ណា ឬសាកសួរសហគ្រិនច្រើនរូបប៉ុណ្ណាទេ សហគ្រិនដែលមានបទពិសោធន៍នឹងប្រាប់អ្នកថា អ្នកត្រូវការការតស៊ូរឹងមាំទើបអាចជោគជ័យបាន ប្រៀបដូចជាស្មៅដែលតស៊ូដុះក្នុងចម្ការមិនថាមនុស្សប៉ុន្មាននាក់ព្យាយាមដកវាចោលជាដើម ។
តើមូលហេតុអ្វីបានជាសហគ្រិនត្រូវការគុណសម្បត្តិនេះ?
មិនមានសហគ្រិនណាដែលអាចជោគជ័យ និងរកប្រាក់ចំណូលបានស្តុកស្តម្ភក្នុងរយៈពេលមួយយប់ទេ ។ ព្រោះនៅក្រោយភាពជោគជ័យទាំងនោះគឺការអត់ធ្មត់ព្យាយាមអស់រយៈពេលជាច្រើនឆ្នាំ ។
ពេលដែលអ្នកក្លាយជាអ្នកដឹកនាំក្នុងអាជីវកម្មរបស់ខ្លួន អ្នកនឹងជួបប្រទះបញ្ហាជាច្រើន ។ មនុស្សដែលអ្នកធ្លាប់តែជឿជាក់អ្នកអាចនឹងក្បត់អ្នក ។ ធនាគារដែលសន្យាថានឹងជួយអ្នកអាចនឹងទុកអ្នកចោល ។ ហើយសមាជិកក្រុមរបស់អ្នកអាចចាកចេញពីអ្នកគ្រប់ពេល ។ ដោយហេតុដូច្នេះ អ្នកនឹងបរាជ័យប្រសិនបើអ្នកមិនមានចិត្តអត់ធ្មត់ និងរឹងមាំទេ ។ ហើយអ្នកកំពុងតែកុហកខ្លួនឯងហើយប្រសិនបើអ្នកគិតថាអ្នកនឹងមិនជួបឧបសគ្គនៅថ្ងៃមុខ និងមិនត្រៀមខ្លួនសម្រាប់វា ។
ជាពិសេសនៅពេលដែលក្តីសុបិនរបស់អ្នកកាន់តែធំ នោះអ្នកនឹងជួបឧបសគ្គកាន់តែធំដែរ ។ កត្តាសំខាន់ដែលអ្នកត្រូវតែចងចាំ គឺពេលខ្លះអ្នកត្រូវដើរមួយជំហានថយក្រោយដើម្បីដើរទៅមុខទៀតបាន ។ ដើម្បីធ្វើបានដូច្នេះ អ្នកមិនអាចគេចវេះនឹងការបរាជ័យឡើយ តែជំរុញខ្លួនឲ្យខិតខំបន្ត និងកាន់តែខ្លាំងឡើងទៅទៀត ៕ កែសម្រួលដោយ ៖ សុឃាក់
ចែករំលែកព័តមាននេះ