ខេត្តព្រះសីហនុ ៖ សេចក្តីរាយការណ៍បឋមបានឲ្យដឹងថា កាលពីវេលាម៉ោង៩ព្រឹក ថ្ងៃទី១ តុលា មានការភ្ញាក់ផ្អើលមួយ ដោយគេបានប្រទះឃើញសាកសពមនុស្សមួយកំណាត់ខ្លួន ស្ថិតក្នុងដីឡូត៍មួយ នៅភូមិអូរត្រេះ សង្កាត់លេខ៤ ក្រុងព្រះសីហនុ ។ ក្រោយពេលមានការភ្ញាក់ផ្អើល កម្លាំងជំនាញនៃអធិការដ្ឋាននគរបាលក្រុងព្រះសីហនុ បានទៅពិនិត្យនៅទីតាំងនោះឃើញថង់ពណ៌ខ្មៅរុំជិត ដែលក្នុងនោះមានភួយ៣ជាន់រុំសាកសពមួយកំណាត់ខ្លួនផ្នែកខាងលើ ។
ឆ្លងតាមការពិនិត្យ និងធ្វើកោសល្យវិច័យរបស់ការិយាល័យនគរបាលបចេ្ចកទេសវិទ្យាសាស្ដ្រនៃស្នងការដ្ឋាននគរបាលខេត្ដព្រះសីហនុ និងអង្គភាពពាក់ព័ន្ធបានរកឃើញថា សាកសព១កំណាត់ខ្លួននេះ ភេទប្រុស អាយុប្រហែលជាង៣០ឆ្នាំ ពាក់អាវយឺតដៃខ្លី ពណ៌ខ្មៅ មិនស្គាល់អត្ដសញ្ញាណ និងអាចជាជនជាតិចិន ។ សាកសពត្រូវបានកាត់១កំណាត់ត្រឹមចង្កេះឡើងលើ មានសា្នមរបួសចំនួន១៧កន្លែង លើខ្លួនសាកសពដោយសារវត្ថុរឹងមុតស្រួច ។
តាមការសន្និដ្ឋានជនរងគ្រោះនេះត្រូវគេធ្វើឃាតនៅកន្លែងផ្សេង ដោយបានកាត់ផ្ដាច់ខ្លួនជាពីរកំណាត់ ហើយបានរុំវេចខ្ចប់មួយកំណាត់ខ្លួនខាងលើ យកទៅប្លុងចោលនៅក្នុងដីឡូតិ៍នោះ ។ករណីនេះជាករណីឃាតកម្មគិតទុកជាមុន ដែលអាចបណ្ដាលមកពីគំនុំ ។ បំណែកសាកសពបានរក្សាទុកនៅមន្ទីរពេទ្យបង្អែកខេត្ដព្រះសីហនុ និងកំពុងស្វែងរកអត្ដសញ្ញាណ ព្រមទាំងសាច់ញាតិនៃសព ។ ចំណែក១កំណាត់ទៀតមិនដឹងគេប្លុងចោលនៅទីណាទេ ។
ករណីនេះកម្លាំងជំនាញនៃស្នងការដ្ឋាននគរបាលខេត្ដព្រះសីហនុ កំពុងស្រាវជ្រាវយ៉ាងយកចិត្ដទុកដាក់ដើម្បីរកជនល្មើស និងអ្នកពាក់ព័ន្ធ ៕
ចែករំលែកព័តមាននេះ