បន្ទាប់ពីការប្រារព្ធខួបលើកទី ៥០ របស់ខ្លួនកាលពីឆ្នាំមុន រថយន្ត Jaguar XJ ជិតនឹងទទួលបានការផ្លាស់ប្តូរសំខាន់ៗមួយចំនួន ។ ម៉ូដែលបច្ចុប្បន្នត្រូវបានដាក់លក់ជិតដប់ឆ្នាំហើយ ដូច្នេះម៉ូដែលថ្មីគឺនឹងត្រូវផ្លាស់ប្តូរច្រើនចំណុច។ តាមពិតម៉ូដែលបច្ចុប្បន្នបានបញ្ចប់ផលិតកម្មរួចហើយ ដើម្បីត្រួសត្រាយផ្លូវសម្រាប់ម៉ូដែលជំនាន់ក្រោយ។
សម្រាប់ម៉ូឌែលជំនាន់ក្រោយ Jaguar នឹងផ្លាស់ប្តូររថយន្តប្រណីតទៅជារថយន្តប្រើប្រាស់អគ្គិសនី ដែលអាចជាគូប្រជែងជាមួយនឹងរថយន្ត Tesla Model S។ ក្រុមហ៊ុនមិនបានបញ្ចេញរូបរាងរថយន្តជាផ្លូវការនោះទេ តែវេបសាយរបស់ប្រទេសរុស្ស៊ី Kolesa បានគូរចេញជារូបរាងរថយន្តនោះទៅតាមការប៉ាន់ស្មាន។
ការឌីហ្សាញរបស់រថយន្តថ្មីនេះ ខ្ចីយកមកពីរថយន្ត Jaguar នាពេលបច្ចុប្បន្ន ដោយមានបំពាក់ភ្លើងហ្វាខាងមុខប្រភេទ LED ស្តើងតូច ដែលមើលទៅកាន់តែកាច។ ដៃទ្វាររបស់វា គឺជាប្រភេទដៃទ្វារដែលអាចលូតចេញចូលបាន ដូចទៅនឹងដៃទ្វាររបស់ Range Rover Velar ខណៈដែលភ្លើងក្រោយរបស់វាជាប្រភេទភ្លើងបញ្ឈរ LED។
Jaguar នឹងផលិត XJ ដោយប្រើអគ្គិសនីជាលើកដំបូង។ ជាមួយនឹងពាក្យចចាមអារាមជាច្រើនបានលើកឡើងថាវានឹងមានម៉ូទ័រអេឡិចត្រិចចំនួន ៤ ដែលផលិតកម្លាំង ៨០០ សេះ រួមទាំងម៉ូទ័រអេឡិចត្រិចស៊េរីថ្មី XJ អាចមានថាមពលខ្លាំងជាងរថយន្ត Tesla Model S P100D និង Porsche Taycan ៕
ប្រភព ៖ carbuzz , កែសម្រួលដោយ ៖ សំណាង
ចែករំលែកព័តមាននេះ