ខេត្តព្រៃវែង ៖ ភ្លៀងមួយមេធំ និងនាំនូវខ្យល់កន្ត្រាក់មកជាមួយផងនោះ បានបោកបក់យ៉ាងខ្លាំងធ្វើឱ្យលំនៅឋានជិត៥០ខ្នង នៅក្នុងស្រុកចំនួន២នៃខេត្តព្រៃវែង ខ្លះដួលរលំខ្លះប៉ើងដំបូលនិងជញ្ជាំង ព្រមទាំងបានធ្វើឱ្យបុរសម្នាក់ ស្លាប់បាត់បង់ជីវិតដោយសារតែផ្ទះរលំសង្កត់លើ និង៦នាក់ផ្សេងទៀតបានរងរបួសធ្ងន់និងស្រាល…
ខេត្តព្រៃវែង ៖ ភ្លៀងមួយមេធំ និងនាំនូវខ្យល់កន្ត្រាក់មកជាមួយផងនោះ បានបោកបក់យ៉ាងខ្លាំងធ្វើឱ្យលំនៅឋានជិត៥០ខ្នង នៅក្នុងស្រុកចំនួន២នៃខេត្តព្រៃវែង ខ្លះដួលរលំខ្លះប៉ើងដំបូលនិងជញ្ជាំង ព្រមទាំងបានធ្វើឱ្យបុរសម្នាក់ ស្លាប់បាត់បង់ជីវិតដោយសារតែផ្ទះរលំសង្កត់លើ និង៦នាក់ផ្សេងទៀតបានរងរបួសធ្ងន់និងស្រាល ។
ហេតុការណ៍នេះ បានកើតឡើងកាលពីវេលាម៉ោង៦និង៤០នាទីល្ងាច ថ្ងៃទី២៨កញ្ញា ដោយមានភ្លៀងមួយមេយ៉ាងធំនាំមកលាយឡំជាមួយនិងខ្យល់កន្ត្រាក់យ៉ាងខ្លាំង គ្របដណ្តប់ទៅលើស្រុកចំនួន២នៃខេត្តព្រៃវែង គឺស្រុកកំពង់ត្របែក និងស្រុកពាមជរ ក្នុងនោះស្រុកកំពង់ត្របែកផ្ទះចំនួន៣ខ្នងដួលរលំខូចខាតទាំងស្រុង ស្រី្តម្នាក់រងរបួសបាក់ភ្លៅខាងស្តាំ ត្រូវបានក្រុមគ្រួសារនាំយកទៅសង្គ្រោះនៅមន្ទីរពេទ្យទាំងយប់ ។
ចំណែកនៅឯស្រុកពាមជរ ខ្យល់កន្ត្រាក់បានបោកបក់ទៅលើឃុំចំនួន៤ និងបានបណ្តាលឱ្យផ្ទះសម្បែងជាង៤០ខ្នងបានរលំបាក់ ប៉ើងដំបូលនិងរបើកជញ្ជាំង ជាមួយគ្នានោះបានបណ្តាលឱ្យបុរសម្នាក់ឈ្មោះ ងួន ជុន អាយុ៤៧ឆ្នាំ នៅភូមិរកាដុះ ឃុំក្រាំងត្រយ៉ង ស្លាប់បាត់បង់ជីវិតភ្លាមៗដោយត្រូវផ្ទះរលំសង្កត់ពីលើ និងមនុស្សក្មេងចាស់ប្រុសស្រីចំនួន៥នាក់ផ្សេងទៀត បានរងរបួសធ្ងន់និងស្រាលផងដែរ ។
ក្រោយពីកើតមានហេតុការណ៍ខ្យល់កន្ត្រាក់ វាយប្រហារទៅលើផ្ទះសម្បែងបែបនេះ នៅព្រឹកថ្ងៃបន្ទាប់ ខាងអាជ្ញាធរស្រុកទាំង២ រួមទាំងកម្លាំងសមត្ថកិច្ចផងដែរ បានចុះទៅជួយរុះរើរៀបចំផ្ទះសម្បែងឱ្យជនរងគ្រោះ និងបានកាប់ទាញដើមឈើធំៗដែលដួលរលំសង្កត់លើផ្ទះអ្នកស្រុក និងរលំកាត់លើផ្លូវដើម្បីសម្រួលកុំឱ្យមានការកកស្ទះចរាចរណ៍ ។ ចំណែកជនរងគ្រោះទាំងអស់ ក៏ត្រូវបាននាំយកទៅព្យាបាល នៅតាមមន្ទីរពេទ្យបង្អែកស្រុកផងដែរ ។
សាលាឃុំផ្ទះក្រោលគោនិងផលដំណាំមួយចំនួនរងការខូចខាតរបួស៥នាក់ដោយខ្យល់កន្ត្រាក់
ខេត្តកណ្តាល ៖ យោងតាមរបាយការណ៍របស់រដ្ឋបាលស្រុកលើកដែក បានបញ្ជាក់ឱ្យដឹងថា នៅយប់ថ្ងៃទី២៨ កញ្ញា មានភ្លៀងធ្លាក់១មេយ៉ាងខ្លាំង លាយឡំទៅដោយខ្យល់កន្ត្រាក់បោកបក់ជាខ្លាំងបណ្តាល្យប៉ះពាល់ដល់សាលាឃុំ និងផ្ទះចំនួន៦ខ្នង សាលាឃុំ១ខ្នង និងក្រោលគោ១រោងរងការខូចខាតបន្តបន្ទាប់ដោយខ្លះរបើកដំបូល ខ្លះរលំទាំងស្រុងរាបដល់ដី ។
ជាមួយនេះស្លាកសញ្ញាគណបក្សប្រជាជនកម្ពុជាដួលរលំ២កន្លែង(ដាច់ជើង១និងវៀច១) ។ របាយការណ៍បានបញ្ជាក់បន្ថែមថា គ្រោះធម្មជាតិនេះបានកើតឡើងនៅភូមិពាមរាំង ឃុំពាមរាំង ស្រុកលើកដែក ក្រៅពីផ្ទះសម្បែងមនុស្សចំនួន៥នាក់ក៏រងរបួសធ្ងន់ស្រាលផង ដែរ ។ ក្រៅពីនោះនៅមានផលដំណាំរបស់ប្រជាពលរដ្ឋជាច្រើនទៀត ដូចជា ចេក ស្វាយ ល្ហុង ។ល។ រងការខូចខាតផងដែរ ។
លោក ចាប ច័ន្ទវិទ្យា អភិបាលស្រុកលើកដែក បានឱ្យដឹងថា បន្ទាប់ពីទទួលបានព័ត៌មានពីករណីគ្រោះធម្មជាតិនេះភ្លាម លោកក៏បានចាត់ឱ្យអាជ្ញាធរនិងកម្លាំងសមត្ថកិច្ចមូលឋានចុះទៅជួយបងប្អូនប្រជាពលរដ្ឋទាំងយប់ និងឱ្យមន្ត្រីចុះពិនិត្យនិងធ្វើរបាយការណ៍លម្អិតដើម្បីត្រៀមនាំយកអំណោយទៅចែកជូនដល់ពលរដ្ឋរងគ្រោះទាំងនោះនៅពេលឆាប់ៗខាងមុខនេះ ។
ខ្យល់កន្ត្រាក់រំលំផ្ទះស្លាប់២របួស៧ ខណៈជួបជុំបងប្អូនថ្ងៃឆ្លងភ្ជុំបិណ្ឌ
ខេត្តស្វាយរៀង ៖ យ៉ាងហោចណាស់លំនៅឋាន២ខ្នងបានរលំបង្កឱ្យមនុស្ស២នាក់ស្លាប់ និង៧នាក់ផ្សេងទៀត បានរងរបួសធ្ងន់និងស្រាលដោយសារគ្រោះថ្នាក់ធម្មជាតិ ខណៈមានភ្លៀងមួយមេធំលាយឡំនិងខ្យល់កន្ត្រាក់បណ្តាលឲ្យរលំផ្ទះសង្កត់មនុស្សស្លាប់និងរបួសតែម្តង ។ ហេតុការណ៍ដ៏រន្ធត់នេះបានកើតឡើងនៅភូមិក្តីស្លា ឃុំស្វាយយា ស្រុកស្វាយជ្រំ ខេត្តស្វាយរៀងក្នុងថ្ងៃឆ្លងបុណ្យភ្ជុំ កាលពីវេលាម៉ោង៦និង៣០នាទីល្ងាចថ្ងៃទី២៨ កញ្ញា ។
បើតាមសមត្ថកិច្ចបានឱ្យដឹងថា ផ្ទះរងគ្រោះចំនួន២ខ្នង ដែលរងការខូចខាតមាន ផ្ទះទី១-មានទំហំ៨មX៩មធ្វើអំពីឈើប្រក់ក្បឿង ជញ្ជាំងស័ង្ខសី រនាបក្តារ មានម្ចាស់ផ្ទះឈ្មោះ យួន រ៉ង់ ភេទប្រុស អាយុ៣២ឆ្នាំ ជាកសិករ(ផ្ទះខូចខាតស្ទើរទាំងស្រុង) បណ្តាលឱ្យសង្កត់មនុស្ស២នាក់ស្លាប់ និង៧នាក់ផ្សេងទៀតបានរងរបួសធ្ងន់ស្រាល គឺម្ចាស់ផ្ទះឈ្មោះ យួន រ៉ង ស្លាប់រីឯប្រពន្ធរបួសធ្ងន់) ។
សមត្ថកិច្ចបានបន្តថា ជនរងគ្រោះទី១-ឈ្មោះ ហែម សាក់ ភេទស្រី អាយុ៤១ឆ្នាំ ស្លាប់នៅកន្លែងកើតហេតុ ។ ២-ឈ្មោះ ហែម ធី ភេទស្រី អាយុ៣០ឆ្នាំ ជាប្រពន្ធម្ចាស់ផ្ទះឈ្មោះ យួនរ៉ង រងរបួសធ្ងន់ ។ ៣-ឈ្មោះ ហែម ឃ្លោក ភេទប្រុស អាយុ៣៨ឆ្នាំ របួសស្រាល ។ ៤-ឈ្មោះ ហែម ពែក ភេទស្រី អាយុ៣១ឆ្នាំ រងរបួសស្រាល ។ ៥-ឈ្មោះ វ៉ា សារឿន ភេទប្រុស អាយុ៦៦ឆ្នាំ រងរបួសស្រាល ។ ៦-ឈ្មោះ ហែម ចាន់ធឿន ភេទស្រី អាយុ៣៩ឆ្នាំរងរបួសស្រាល។ ៧-ឈ្មោះអ៊ុសេង ភេទស្រី អាយុ៦៣ឆ្នាំ រងរបួសស្រាល ។ ៨-ឈ្មោះ ចាន់ សាលីម ភេទស្រី អាយុ១៧ឆ្នាំ រងរបួសស្រាល ។
បច្ចុប្បន្នជនរងគ្រោះទាំង៨នាក់ត្រូវបានសមត្ថកិច្ចបញ្ជូនទៅសង្គ្រោះនិងព្យាបាលនៅមន្ទីរពេទ្យខេត្ត ស្វាយ រៀង ។ ចំណែកសពជនរងគ្រោះក្រុមគ្រួសារនិងអាជ្ញាធរបានរៀបចំធ្វើបុណ្យតាមប្រពៃណី ។ សូមបញ្ជាក់ក្រុមគ្រួសារបានមកជួបជុំឪពុកម្តាយពេលថ្ងៃឆ្លងភ្ជុំក៏ជួបគ្រោះតែម្តង ។
ប្រភពដដែលបានឱ្យដឹងទៀតថា ដោយឡែកផ្ទះទី២ធ្វើអំពីឈើប្រក់ហ្វ៊ីប្រូ ជញ្ជាំងស័ង្កសី រនាបឫស្សី ទំហំ៥មX៦ម ម្ចាស់ឈ្មោះឆាំ ចិន្តា ភេទប្រុស អាយុ៣៧ឆ្នាំ ជាកសិករ រលំខូចខាតស្ទើរទាំងស្រុង រីឯមនុស្សមិនមានគ្រោះថ្នាក់ទេ ៕
ចែករំលែកព័តមាននេះ