សហព័ន្ធអាល្លឺម៉ង់ ៖ ក្នុងជំនួបជាមួយថ្នាក់ដឹកនាំសាធារណណរដ្ឋសហព័ន្ធអាល្លឺម៉ង សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងអំពីសកម្មភាពរបស់ ក្រុមជនក្រៅច្បាប់មួយក្តាប់តូច ដែលប៉ុនប៉ងបង្កអសន្តិសុខ និងភាពវឹកវរតាមរយៈការបំផុសឲ្យមានចលនាបះបោរផ្តួលរំលំរាជរដ្ឋាភិបាលស្របច្បាប់ ក្នុងចេតនាទុច្ចរិតពិសពុល ឈានទៅបំផ្លិចបំផ្លាញសុខសន្តិភាពរបស់ប្រជាជននិងសង្គមជាតិ ដើម្បីបម្រើមហិច្ឆតារបស់ក្រុមខ្លួន ។
សម្តេចក្រឡាហោម បានបញ្ជាក់បែបនេះខណៈសម្តេចដឹកនាំគណៈប្រតិភូទៅកាន់សាធារណរដ្ឋសហព័ន្ធអាល្លឺម៉ង់ ចាប់ពីថ្ងៃទី២៤ខែកញ្ញា ដល់ថ្ងៃទី១ ខែតុលា ឆ្នាំ២០១៩ ។ យោងតាមសេចក្តីប្រកាសព័ត៌មានរបស់ក្រសួងមហាផ្ទៃបានឲ្យដឹងថា ដំណើរទស្សនកិច្ចរបស់គណៈប្រតិភូជាន់ខ្ពស់អន្តរក្រសួងចាប់ពីថ្ងៃទី២៤ ខែកញ្ញា ដល់ថ្ងៃទី១ ខែតុលា ឆ្នាំ២០១៩នៅសាធារណរដ្ឋសហព័ន្ធអាល្លឺម៉ង់ គឺតបតាមការអញ្ជើញជាផ្លូវការរបស់រដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ និងដោយទទួល បានការអនុញ្ញាតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
នៅក្នុងអំឡុងដំណើរទស្សនកិច្ចនេះគណៈប្រតិូភូអន្តរក្រសួងកម្ពុជា បានជួបពិភាក្សាការងារជាមួយថ្នាក់ដឹកនាំជាសមាជិកសភាសហព័ន្ធអាល្លឺម៉ង់ ព្រមទាំងបណ្តាក្រសួង ស្ថាប័នពាក់ព័ន្ធមួយចំនួនរបស់រដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ ដែលទទួលបានលទ្ធផលដូចតទៅ ៖
ភាគីទាំងពីរបានពិភាក្សាផ្លាស់ប្តូរយោបល់ លើការពង្រឹង និងលើកកម្ពស់ទំនាក់ទំនងកិច្ចសហ ប្រតិបត្តិការ និងការអភិវឌ្ឍក្នុងភាពជាដៃគូរវាងកម្ពុជា-អាល្លឺម៉ង់ និងកម្ពុជា-សហភាពអឺរ៉ុបដែលក្នុងនោះរួមមានបញ្ហាពាក់ព័ន្ធនឹងការស្វែងរកការគាំទ្រទៅលើកិច្ចការនយោបាយ ការផ្លាស់ប្តូរបទពិសោធន៍លើការងារលើកកម្ពស់សិទ្ធិមនុស្ស ការអភិវឌ្ឍលើវិស័យសំខាន់ៗនានា ដូចជាអប់រំ សុខាភិបាល ការគ្រប់គ្រងព្រៃឈើ និងការគ្រប់ គ្រងសន្តិសុខ សណ្តាប់ធ្នាប់សាធារណៈជាដើម ។
ទន្ទឹមនេះ ពាក់ព័ន្ធនឹងការងារថែរក្សាធនធានធម្មជាតិ និងបរិស្ថាន ភាគីកម្ពុជាបានសំណូមពរដល់ភាគីអាល្លឺម៉ង់ ពិនិត្យលទ្ធភាពទិញកាបូនពីកម្ពុជា ដែលនេះគឺជាយន្តការនិងជាការរួមចំ ណែកមួយដ៏មានសារៈសំខាន់ក្នុងការថែរក្សាឲ្យបានគង់វង្សនូវសម្បត្តិ និងធនធានធម្មជាតិរបស់ព្រះរាជាណាចក្រកម្ពុជា ។
ភាគីកម្ពុជាក៏បានសំណូមពរដល់ភាគីអាល្លឺម៉ង់ពិនិត្យលទ្ធភាពនិងសិក្សាបង្កើតទំនាក់ទំនងកិច្ចសហប្រតិបត្តិការផ្លូវការរវាងភាគីទាំងពីរលើការងារអាទិភាពជាក់ស្តែងមួយចំនួនដូចជា ការប្រយុទ្ធប្រឆាំងបទល្មើសឆ្លងដែនគ្រប់ប្រភេទ ការផ្លាស់ប្តូរទស្សនកិច្ច ការបណ្តុះបណ្តាលធនធាន មនុស្សលើវិស័យសន្តិសុខ និងការចែករំលែកបទពិសោធន៍កំណែទម្រង់វិមជ្ឈការ ។
ក្រៅពីជំនួបពិភាក្សាខាងលើនេះ គណៈប្រតិភូ ជាន់ខ្ពស់អន្តរក្រសួង បានអញ្ជើញធ្វើទស្សនកិច្ចសិក្សាអំពីប្រព័ន្ធរដ្ឋបាលសាធារណៈរបស់សាធារណរដ្ឋសហព័ន្ធអាល្លឺម៉ង់ ទាំងនៅថ្នាក់រដ្ឋសហព័ន្ធ ថ្នាក់ស្រុក និងថ្នាក់ឃុំ ដើម្បីស្វែងយល់អំពីការគ្រប់គ្រង ការរៀបចំ ការប្រព្រឹត្តទៅនៃឋានានុក្រមរដ្ឋបាលថ្នាក់ក្រោមជាតិ រចនាសម្ព័ន្ធ សិទ្ធិ តួនាទី និងភារកិច្ច ដែលថ្នាក់រដ្ឋបាលនីមួយៗទទួលខុសត្រូវ និងការផ្តល់សេវាសាធារណៈចាំបាច់នានា ដូចជាសេវាអប់រំ សុខាភិបាល ការគ្រប់គ្រងកាកសំណល់ និងការគ្រប់គ្រងព្រៃឈើធនធានធម្មជាតិ ។ល។
ទន្ទឹមនេះ សម្តេចក្រឡាហោម បានជម្រាបជូនអំពីសកម្មភាពរបស់ក្រុមជនក្រៅច្បាប់មួយក្តាប់តូច ដែលប៉ុនប៉ងបង្កអសន្តិសុខ និងភាពវឹកវរ តាមរយៈការបំផុសឲ្យមានចលនាបះបោរផ្តួលរំលំរាជរដ្ឋាភិបាលស្របច្បាប់ ក្នុងចេតនាទុច្ចរិតពិសពុលឈានទៅបំផ្លិចបំផ្លាញសុខសន្តិភាពរបស់ប្រជាជន និងសង្គមជាតិ ដើម្បីបម្រើមហិច្ឆតារបស់ក្រុមខ្លួន ។
នៅក្នុងឱកាសនៃដំណើរបំពេញទស្សនកិច្ចផ្លូវការនេះដែរ គណៈប្រតិភូជាន់ខ្ពស់អន្តរក្រសួង ក៏បានជួបសំណេះសំណាលជាមួយបងប្អូន ប្រជាពលរដ្ឋខ្មែររស់នៅសាធារណរដ្ឋសហព័ន្ធអាល្លឺម៉ង់ ។ សម្តេចក្រឡាហោម ស ខេង ប្រធានគណៈប្រតិភូ បានជម្រាបជូនអំពីសភាពការណ៍ទូទៅ និងដំណើរការអភិវឌ្ឍន៍ប្រទេសជាតិ ដែលមកដល់ពេលនេះ សម្រេចបានសមិទ្ធ ផលសេដ្ឋកិច្ច-សង្គមធំៗជាច្រើនគួរឲ្យកត់សម្គាល់ ក្រោមលក្ខខណ្ឌអំណោយផលនៃសន្តិភាពពេញបរិបូរណ៍ទូទាំងប្រទេស ។
សម្តេចក្រឡាហោម ក៏បានអំពាវនាវដល់បងប្អូនប្រជាពលរដ្ឋខ្មែរ ត្រូវចេះសាមគ្គីគ្នា និងរួមគ្នាថែរក្សាឲ្យបានគង់វង្សនូវសន្តិភាពដែលបានមកដោយលំបាក ដើម្បីធ្វើយ៉ាងណាបង្កលក្ខខណ្ឌអំណោយផលសម្រាប់ព្រះរាជាណាចក្រកម្ពុជា មានឱកាសបន្តការអភិវឌ្ឍ និងវឌ្ឍនភាពកាន់តែជឿនលឿនថែមទៀត ៕
ចែករំលែកព័តមាននេះ