ខេត្តមណ្ឌលគិរី ៖ អាជ្ញាធរខេត្តបានរៀបចំពិធីបិទវគ្គបណ្តុះបណ្តាលស្តីពីការប្រើប្រាស់ ថែទាំនិងគ្រប់គ្រងអាវុធប្រភេទសេកាសេ(CKC )ដល់មន្ត្រីឧទ្យានុរក្សនៃមន្ទីរបរិស្ថានខេត្ត សរុបជាង១០០នាក់ ដែលប្រព្រឹត្តទៅនៅតំបន់ប្រតិបត្តិការសឹករងមណ្ឌលគិរី កាលពីព្រឹកថ្ងៃទី២៥ ខែកញ្ញា កន្លងទៅ ។
លោក ស្វាយ សំអ៊ាង អភិបាលខេត្ត និងលោក រ័ត្ន វីរៈ អនុរដ្ឋលេខាធិការក្រសួងបរិស្ថាន បានសម្តែងការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់សិក្ខាកាមឧទ្យានុរក្សទាំងអស់ ដែលបានខិតខំអស់ពីកម្លាំងកាយចិត្ត ស្តាប់ឱវាទ បទបញ្ជា និងវិន័យ ដើម្បីទទួលយកនូវការហ្វឹកហាត់ និងការបង្ហាត់បង្ហាញពីសំណាក់គ្រូបង្គោល ដែលឈានដល់សម្រេចបានជោគជ័យនូវការហ្វឹកហ្វឺននាថ្ងៃនេះ ។
ការរៀបចំវគ្គបណ្តុះបណ្តាលនាពេលនេះ គឺពិតជាបានផ្តល់នូវចំណេះដឹងផ្នែកគ្រប់គ្រង និងថែទាំអាវុធ ដែលស្របទៅនឹងច្បាប់ស្តីពីការគ្រប់គ្រងអាវុធ គ្រឿងផ្ទុះ និងគ្រាប់រំសេវ សម្រាប់ឱ្យមន្ត្រីឧទ្យានុរក្សរបស់ក្រសួងបរិស្ថាន យកទៅអនុវត្តឱ្យទទួលបានប្រសិទ្ធភាពក្នុងពេលចុះល្បាត និងក្នុងពេលបំពេញបេសកកម្មការពារធនធានធម្មជាតិ ។
មន្ត្រីឧទ្យានុរក្សទាំងអស់ ត្រូវបង្កើនការយកចិត្តទុកដាក់ប្រុងប្រយ័ត្នឱ្យបានខ្ជាប់ខ្ជួនគ្រប់វិនាទី ក្នុងការគ្រប់គ្រង ថែទាំ និងប្រើប្រាស់អាវុធសេកាសេ ដើម្បីបន្តចូលរួមចំណែកការពារនិងអភិរក្សធនធានធម្មជាតិសម្រាប់ទុកឱ្យកូនចៅជំនាន់ក្រោយបានឃើញ និងបានស្គាល់នូវធនធានធម្មជាតិ ជាពិសេសចូលរួមចំណែករក្សាបាននូវសន្តិសុខ សណ្តាប់ធ្នាប់សាធារណៈ សុវត្ថិភាពជូនប្រជាពលរដ្ឋ ព្រមទាំងកិច្ចការងារសង្គម និងមនុស្សធម៌ ។ លោកក៏បានផ្តាំផ្ញើដល់សិក្ខាកាមឧទ្យានុរក្សទាំងអស់ ត្រូវស្តាប់បទបញ្ជារបស់ថ្នាក់ដឹកនាំ សំដៅលើកកម្ពស់ការអនុវត្តច្បាប់ គោរពវិន័យ និងសេចក្តីថ្លៃថ្នូររបស់អ្នករាជការសាធារណៈ ។
តាមរបាយការណ៍របស់លោកវរសេនីយ៍ឯក តន់ ឆៃ មេបញ្ជាការរងតំបន់ប្រតិបត្តិការសឹករងមណ្ឌលគិរី បានឱ្យដឹងថា ក្រោយពីទទួលសំណើសុំគ្រូបង្គោលតាមរយៈលោកមេបញ្ជាការតំបន់ប្រតិបត្តិការសឹករងមណ្ឌលគិរី ពីមន្ទីរបរិស្ថានខេត្ត ការិយាល័យហ្វឺកហ្វឺនបានរៀបចំផែនការបណ្តុះបណ្តាលស្តីពីការប្រើប្រាស់ ថែទាំ និងគ្រប់គ្រងអាវុធដល់សិក្ខាកាម ដែលជាមន្ត្រីឧទ្យានុរក្សចំនួន១០៣នាក់(ស្រី២នាក់) មានគ្រូបង្គោលចំនួន៦នាក់ សិក្សារយៈពេល១០ថ្ងៃ ក្នុង១ថ្ងៃ សិក្សា៧ម៉ោង ។
លោកបន្ថែមថា ចំពោះមេរៀនផ្សេងៗដែលបានរៀនតាមផែនការ និងកាលវិភាគមានដូចជាច្បាប់ស្តីពីការគ្រប់គ្រងអាវុធគ្រឿងផ្ទុះ និងគ្រាប់់រំសេវ លក្ខណៈទូទៅ ការរៀបចំនិងដោះដាក់ការកែតម្រង់កាំភ្លើងសេកាសេ សិក្សាការបាញ់ និងកាយវិការបាញ់ និងការរៀបចំបាញ់មួយពេល ៕
ចែករំលែកព័តមាននេះ