ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យ២នាក់បានលួចរថយន្ត១គ្រឿងពីក្រុងសៀមរាបបានសម្រេច ដើម្បីយកទៅលក់ទៅប៉ោយប៉ែត ប៉ុន្តែសំណាងមិនល្អស្រាប់តែទៅបុកម៉ូតូ១គ្រឿងធ្វើឱ្យបុរសម្នាក់ស្លាប់ភ្លាមៗនៅកន្លែងកើតហេតុទាំងយប់ រួចក៏ចតរថយន្តទុកចោលនៅចំណុចផ្លូវក្រួសក្រហមទឹកដីភូមិខ្នាត ឃុំខ្នាត ស្រុកពួក ហើយរត់គេចខ្លួន…
ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យ២នាក់បានលួចរថយន្ត១គ្រឿងពីក្រុងសៀមរាបបានសម្រេច ដើម្បីយកទៅលក់ទៅប៉ោយប៉ែត ប៉ុន្តែសំណាងមិនល្អស្រាប់តែទៅបុកម៉ូតូ១គ្រឿងធ្វើឱ្យបុរសម្នាក់ស្លាប់ភ្លាមៗនៅកន្លែងកើតហេតុទាំងយប់ រួចក៏ចតរថយន្តទុកចោលនៅចំណុចផ្លូវក្រួសក្រហមទឹកដីភូមិខ្នាត ឃុំខ្នាត ស្រុកពួក ហើយរត់គេចខ្លួន តែក៏ត្រូវសមត្ថកិច្ចឃើញសង្ស័យឃាត់ខ្លួន រួចបញ្ជូនទៅអធិការស្រុកពួកទាំងយប់តែម្តង បង្កឱ្យភ្ញាក់ផ្អើលកាលពីម៉ោង១និង៣០នាទីរំលងអធ្រាតឈានចូលថ្ងៃទី៣០ ខែកញ្ញា ឆ្នាំ២០១៩ នៅចំណុចវត្តប្រាសាទ ស្ថិតក្នុងភូមិជ្រលង ឃុំខ្នាត ស្រុកពួក ខេត្តសៀមរាប ។
សេចក្តីរាយការណ៍បន្តថា ជនសង្ស័យទាំង២នាក់ ១- ឈ្មោះ លន់ ឡៃហេង អាយុ២៧ឆ្នាំ ភេទប្រុស មុខរបរជាងតោនឡាន ទីលំនៅបច្ចុប្បន្នភូមិជន្លង់ សង្កាត់សាលាកំរើក និង២- ឈ្មោះ ហួត រស្មី ភេទប្រុស អាយុ៣៧ឆ្នាំ ស្រុកកំណើតនៅខេត្តកំពង់ឆ្នាំង បច្ចុប្បន្នស្នាក់នៅតាមវត្ត និងតាមចិញ្ចឹមផ្លូវ ហើយអតីតកាល គឺធ្លាប់លួចជាច្រើនដងមកហើយ។
សេចក្តីរាយការណ៍បន្តទៀតថា ចំណែកម្ចាស់រថយន្តម៉ាកព្រូស ពណ៌ប្រផេះ ពាក់ស្លាកលេខ ភ្នំពេញ 2AY-819 5 ឈ្មោះ យូ ស្រ៊ុន ភេទប្រុស អាយុ២៥ឆ្នាំ រស់នៅក្រុងភ្នំពេញមកដើរលេងបុណ្យភ្ជុំបិណ្ឌក្នុងខេត្តសៀមរាប ហើយបានចតទុកចោលនៅមុខផ្ទះមិត្តភក្តិក៏ត្រូវចោរលួចបាត់។
រីឯជនរងគ្រោះដោយគ្រោះថ្នាក់ចរាចរណ៍ដែលជិះម៉ូតូម៉ាកសង់ C125 ឆ្នាំ២០១៧ ពាក់ស្លាកលេខ សៀមរាប 1AA-7091 មានឈ្មោះ សែង វេត ភេទប្រុស អាយុ៤០ឆ្នាំ មុខរបរជួសជុលរថយន្ត រស់នៅភូមិប្រឡាយ ឃុំខ្នាត ស្រុកពួក ខេត្តសៀមរាប បានស្លាប់។
បើតាមលោកអធិការដ្ឋាននគរបាលស្រុកពួកប្រាប់ឱ្យដឹងនៅម៉ោង៤និង៥០នាទីរសៀលថ្ងៃទី១ តុលានេះថា បន្ទាប់ពីមានសេចក្តីរាយការណ៍មក ទើបលោកឱ្យគ្រប់ប៉ុស្តិ៍ ចាំស្ទាក់តាមផ្លូវក៏មើលរថយន្ត១គ្រឿងម៉ាកព្រូស ដែលគេលួចចេញពីក្នុងក្រុង ហើយបើកបុកអ្នកជិះម៉ូតូស្លាប់ភ្លាមៗ រួចចតចោលរត់គេចខ្លួននោះ ខណៈនោះសមត្ថកិច្ចមូលដ្ឋាន សង្ស័យប្រហែលជាករណីគ្រោះថ្នាក់ចរាចរណ៍ ហើយទើបចតទុកនៅចំណុចផ្លូវក្រួសក្រហមទឹកដីភូមិខ្នាត ឃុំខ្នាត ។
លោកអធិការបន្តថា ក្រោយមកលោកក៏ឱ្យមន្ត្រីនគរបាលប៉ុស្តិ៍ខ្នាត ទៅដល់កន្លែងកើតហេតុខាងលើពិនិត្យឃើញថា រថយន្តម៉ាកព្រូស គឺមានស្នាមខូចផ្នែកខាងមុខ និងបែកកញ្ចក់ខាងមុខ និងមានម៉ូតូ១គ្រឿងទៀត ម៉ាកសង់ C125 ខូចខាតទាំងស្រុង ព្រមទាំងធ្វើការឃាត់ខ្លួនជនសង្ស័យ២នាក់នៅចំណុចវត្តប្រាសាទ ភូមិជ្រលង ឃុំខ្នាត ចម្ងាយពីកន្លែងចតរថយន្តជាង២គីឡូ រួចនាំយកមកធ្វើការសួរនាំនៅអធិការស្រុក ដើម្បីរៀបចំកសាងសំណុំរឿងបញ្ជូនបន្តទៅអធិការនគរបាលក្រុង ដើម្បីចាត់ការទៅតាមផ្លូវច្បាប់។
លោកអធិការបន្ថែមថា ក្រោយការស្រាវជ្រាវពីករណីខាងលើ គឺជនសង្ស័យទាំង២ នាក់ពិតជាលួចរថយន្ដពីចំណុចស្ពានវត្តដំណាក់ ព្រមទាំងបង្កគ្រោះថ្នាក់ចរាចរណ៍ដល់គេ នៅចំណុចខាងលិចស្នាក់ការគយប្រចាំខេត្ត ក្នុងសង្កាត់ទឹកវិល បណ្ដាលឱ្យស្លាប់មនុស្សម្នាក់មែន ។ លោកបញ្ជាក់ថា ករណីនេះ លោកបានប្រគល់ជនសង្ស័យទាំង២នាក់ និងរថយន្ត ព្រមទាំងម៉ូតូ ឱ្យទៅអធិការដ្ឋាននគរបាលក្រុងសៀមរាប ដើម្បីអនុវត្តតាមនីតិវិធីច្បាប់បន្តហើយ។
បើតាមប្រភពពីសមត្ថកិច្ចនគរបាលខេត្តសៀមរាបបានប្រាប់នៅរសៀលថ្ងៃទី១ តុលានេះថា ចំពោះជនសង្ស័យទាំង២នាក់ដែលលួចរថយន្ត និងបុកកមនុស្សស្លាប់នោះ កំពុងកសាងសំណុំរឿងបញ្ជូនទៅការិយាល័យនគរបាលព្រហ្មទណ្ឌកំរិតស្រាល ដើម្បីចាត់ការបន្ត ហើយរៀបចំកសាងសំណុំរឿងបញ្ជូនទៅតុលាការខេត្តចាត់ការតាមនីតិវិធីច្បាប់។
ចំណែករថយន្ត និងម៉ូតូជនរងគ្រោះ ត្រូវបានបញ្ជូនទៅការិយាល័យនគរបាលចរាចរណ៍ផ្លូវគោក ដើម្បីរក្សាទុកដោះស្រាយតាមផ្លូវច្បាប់ រីឯសពជនរងគ្រោះ ត្រូវបានប្រគល់ឱ្យក្រុមគ្រួសារយកទៅធ្វើបុណ្យរួចរាល់ហើយ។ (កែសម្រួលដោយ ៖ បុប្ផា)
ចែករំលែកព័តមាននេះ