ខេត្តមណ្ឌលគិរី ៖ យោងតាមរបាយការណ៍បូកសរុបរបស់មន្ត្រីដែនជម្រកសត្វព្រៃកែវសីមាថា មន្ត្រីឧទ្យានុរក្សបានសហការជាមួយនគរបាល និងកងរាជអាវុធហត្ថប្រចាំនៅដែនជម្រកសត្វព្រៃកែវសីមា បង្ក្រាបបទល្មើសធនធានធម្មជាតិបានចំនួន៦៦ករណី នៅក្នុងរយៈពេល៩ខែ ក្នុងឆ្នាំ២០១៩នេះដោយបានឃាត់ខ្លួនជនសង្ស័យចំនួន៣៤នាក់ ។
របាយការណ៍ដដែលបញ្ជាក់ថា ចំពោះវត្ថុតាងដែលបង្ក្រាបពីបទល្មើសក្នុងដែនជម្រកសត្វព្រៃកែវសីមាគឺមានរថយន្តមិនកែច្នៃ និងកែច្នៃ៣៩គ្រឿង, ម៉ូតូ៥៥គ្រឿង, រណារយន្ត១០០គ្រឿង និងឈើសរុប៩៣៦កំណាត់ ស្មើនឹងជិត៥០ម៉ែត្រគូប ។
ប៉ុន្តែសកម្មភាពកាប់រានព្រៃជាកម្មសិទ្ធិឯកជននៅតែបន្តកើតមានដែលមានទាំងការលួចដុតព្រៃ និងការដាំដំណាំពីពលរដ្ឋចំណាកស្រុក និងក្នុងមូលដ្ឋាន ហើយក៏នៅមានសកម្មភាពដឹកជញ្ជូនឈើតាមម៉ូតូ និងរថយន្តផងដែរ ដោយជនល្មើសភាគច្រើនប្រើគ្រឿងញៀនហើយតែងតដៃជាមួយសមត្ថកិច្ច ។
ជាការកត់សម្គាល់បទល្មើសធនធានធម្មជាតិបានកើតស្ទើរគ្រប់ទីកន្លែងក្នុងខេត្តមណ្ឌលគិរី ជាពិសេសគឺសកម្មភាពកាប់រុនរានដីព្រៃរដ្ឋធ្វើជាកម្មសិទ្ធិផ្ទាល់ខ្លួនពីសំណាក់ជនខិលខូច ដែលតែងឃុបឃិតគ្នា ៕
កែសម្រួលដោយ ៖ សំណាង
ចែករំលែកព័តមាននេះ