រាជធានីភ្នំពេញ ៖ រដ្ឋបាលជលផល នៃក្រសួងកសិកម្មបានធ្វើការបើករដូវនេសាទសម្រាប់ឆ្នាំ២០១៩-២០២០ កំណត់តាមទីតាំងដែលបានអនុញ្ញាត្តឲ្យធ្វើនេសាទ ។ នេះយោងតាមសេចក្ដីជូនដំណឹងរបស់រដ្ឋបាលជលផលស្ដីពីរដូវបើកនេសាទឆ្នាំ២០១៩-២០២០ នៅថ្ងៃទី២៦ ខែកញ្ញា ឆ្នាំ២០១៩…
រាជធានីភ្នំពេញ ៖ រដ្ឋបាលជលផល នៃក្រសួងកសិកម្មបានធ្វើការបើករដូវនេសាទសម្រាប់ឆ្នាំ២០១៩-២០២០ កំណត់តាមទីតាំងដែលបានអនុញ្ញាត្តឲ្យធ្វើនេសាទ ។ នេះយោងតាមសេចក្ដីជូនដំណឹងរបស់រដ្ឋបាលជលផលស្ដីពីរដូវបើកនេសាទឆ្នាំ២០១៩-២០២០ នៅថ្ងៃទី២៦ ខែកញ្ញា ឆ្នាំ២០១៩ ។
សេចក្តីជូនដំណឹងបានឲ្យដឹងថា ដែននេសាទដែលបានអនុញ្ញាត្តនោះរួមមាន ចាប់ពីថ្ងៃទី០១ ខែតុលា ដល់ថ្ងៃទី៣១ ខែឧសភា ចំពោះដែននេសាទទឹកសាបដែលស្ថិតនៅខាងជើងខ្សែស្របទន្លេចតុមុខ ដែលមានខេត្តទាំងអស់ជុំវិញបឹងទន្លេសាប និងបណ្តាខេត្តកំពង់ចាម ត្បូងឃ្មុំ ក្រចេះ រតនគិរីមណ្ឌលគិរី ព្រះវិហារ ប៉ៃលិន ឧត្តរមានជ័យ និងមួយផ្នែកក្នុងភូមិសាស្ត្ររាជធានីភ្នំពេញ ខេត្តកណ្តាល ដែលនៅប៉ែកខាងជើងទន្លេចតុមុខ ។
សេចក្ដីជូនដំណឹងបន្តថា ដោយឡែកខេត្តស្ទឹងត្រែងចាប់ពីថ្ងៃទី១ ខែតុលា ឆ្នាំ២០១៩ រហូតដល់ថ្ងៃទី១ ខែឧសភា ឆ្នាំ២០២០ ។ ហើយចាប់ពីថ្ងៃទី១ ខែវិច្ឆិកា ឆ្នាំ២០១៩ ដល់ថ្ងៃទី៣០ ខែមិថុនា ឆ្នាំ២០២០ ចំពោះដែននេសាទទឹកសាបដែលស្ថិតនៅខាងត្បូងខ្សែស្របទន្លេចតុមុខ រួមមាន ៖ ខេត្តព្រៃវែង តាកែវ កំពង់ស្ពឺ ស្វាយរៀង និងមួយផ្នែកក្នុងភូមិសាស្ត្ររាជធានីភ្នំពេញ ខេត្តកណ្តាលដែលនៅប៉ែកខាងត្បូងទន្លេចតុមុខ ។
សេចក្ដីជូនដំណឹងសង្កត់ធ្ងន់ថា នៅក្នុងរយៈពេលបើកនេសាទនេះប្រជាពលរដ្ឋអាចធ្វើអាជីវកម្មនេសាទដោយឧបករណ៍នេសាទជាលក្ខណៈគ្រួសារដែលអនុញ្ញាតនៅក្នុងដែននេសាទទឹកសាប ។ ក្រៅពីនេះការធ្វើនេសាទត្រូវមានលិខិតអនុញ្ញាតឱ្យធ្វើអាជីវកម្មនេសាទមានកាតព្វកិច្ចបង់ពន្ធ និងថ្លៃឈ្នួលនេសាទជូនរដ្ឋគោរពតាមបទបញ្ជាដែលមានចែងក្នុងលិខិតអនុញ្ញាតឱ្យធ្វើនេសាទ ។
ក្នុងឱកាសនោះដែររដ្ឋបាលជលផលក៏បានជូនដំណឹងដល់ប្រជាពលរដ្ឋដែលប្រកបរបរនេសាទ ដែលមានបំណងធ្វើនេសាទដោយប្រើប្រាស់ឧបករណ៍«ម៉ាញ់» នៅតាមដងទន្លេមេគង្គ និងដងទន្លេសាបក្នុងទីតាំងដែលបានអនុញ្ញាត ត្រូវមកចុះឈ្មោះ សុំលិខិតអនុញ្ញាតឱ្យធ្វើនេសាទ នៅតាមខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទពាក់ព័ន្ធ ដើម្បីបានប្រកបមុខរបរនេសាទ៕ កែសម្រួលដោយ ៖សុឃាក់
ចែករំលែកព័តមាននេះ