ខេត្តស្ទឹងត្រែង ៖ ងាកមកតំបន់ទេសចរណ៍ខេត្តស្ទឹងត្រែងមាន៩កន្លែង ដែលមានសក្តានុពលទាក់ទាញភ្ញៀវទេសចរណ៍រហូតជិត៨ពាន់នាក់ត្រឹមរយៈពេល៣ថ្ងៃចុងក្រោយនៃពិធិបុណ្យភ្ជុំបិណ្ឌ ឆ្នាំ២០១៩។
ប្រធានមន្ទីរទេសចរណ៍ខេត្ត ស្ទឹងត្រែងលោក អ៊ន ប៉ោសឿន អោយដឹងថា ដោយសារខេត្តស្ទឹង ត្រែងមានតំបន់ទេសចរណ៍ដែលមានសក្តានុពលផ្នែកទេសចរណ៍ ហើយតំបន់នីមួយៗមានការអភិវឌ្ឍន៍ និងមានការច្នៃប្រឌិតបន្ថែមពីមួយឆ្នាំទើបកំណើរភ្ញៀវទេសចរណ៍មកកំសាន្តមានចំនួនច្រើន។
លោកបានបន្តថា នារដូវបុណ្យភ្ជុំបិណ្ឌរយៈពេល៣ថ្ងៃចុងក្រោយតំបន់ទេសចរណ៍ចំនួន៩កន្លែងទទួលភ្ញៀវជាតិបានចំនួន៧.៦៩៤នាក់ កើន៨ភាគរយ។ តំបន់ទេសចរណ៍ខាងលើរួម មានសហគមន៍ព្រះរំកិល, សហគមន៍អូរស្វាយ, សហគមន៍អូរឬស្សីកណ្ដាល, រមណីយដ្ឋានជួរវែង, រមណីយដ្ឋានភ្នំខៀវ, រមណីយដ្ឋាន បក្សីមេគង្គ, សហគមន៍កោះព្រះ, តំបន់ទេសចរណ៍សៀមប៉ាង និងសហគមន៍ភ្នំជម្រកសត្វ។
លោកបានបន្តទៀតថា ពិធីបុណ្យភ្ជុំបិណ្ឌនាឆ្នាំនេះ ភ្ញៀវទេសចរណ៍បានជួបជុំគ្រួសារមិត្តភក្តិនៅតាមតំបន់ទេសចរណ៍ផ្សេងៗគ្នាយ៉ាងសប្បាយរីករាយ ប្រកបដោយសន្តិសុខ រីឯតម្លៃចំណីអាហារលក់ដូរសមរម្យទៅតាមមុខម្ហូប ចំណែកសណ្ឋាគារ និងផ្ទះសំណាក់មិនត្រូវបានដំឡើងថ្លៃ នោះទេ៕ (កែសម្រួលដោយ ៖ ធីតា)
ចែករំលែកព័តមាននេះ