រាជធានីភ្នំពេញ ៖ រថយន្តកុងតឺន័រមួយគ្រឿងត្រូវបានយុវជនប្រុសស្រីមួយក្រុមជិះម៉ូតូជាច្រើនគ្រឿងដេញតាមពីក្រោយ និងវាយកម្ទេចរថយន្ត បណ្តាលឲ្យរងការខូចខាត បន្ទាប់ពីភាគីខាងយុវជនប្រុសស្រីមួយក្រុមនោះអះអាងថា ភាគីខាងរថយន្តកុងតឺន័របើកជ្រេពេញផ្លូវ និងយកកាំបិតរកកាប់ពួកគេទៀត ។ ចំណែកភាគីខាងរថយន្តកុងតឺន័របានអះអាងថា ពេលធ្វើដំណើរតាមផ្លូវក៏ជួបជាមួយភាគីខាងយុវជនប្រុសស្រីមួយក្រុមខាងលើ បន្ទាប់មកក៏ចុចស៊ីផ្លេ ស្រាប់តែត្រូវភាគីខាងយុវជនប្រុសស្រីមួយក្រុមនោះជេរ និងជិះម៉ូតូដេញតាមវាយរថយន្តតែម្តង ។
ហេតុការណ៍ខាងលើនេះបង្កឲ្យមានការភ្ញាក់ផ្អើលកាលពីវេលាម៉ោង១១និង៤០នាទីយប់ ថ្ងៃទី២៩ ខែកញ្ញា ឆ្នាំ២០១៩ ត្រង់ចំណុចរង្វង់មូលកាំភ្លើងកួចកាណុង ស្ថិតក្នុងសង្កាត់ស្រះចក ខណ្ឌដូនពេញ ។
ភាគីខាងយុវជនប្រុសស្រីមួយក្រុមខាងលើមិនត្រូវបានស្គាល់អត្តសញ្ញាណនោះទេ ។ ចំណែកភាគីខាងរថយន្តកុងតឺន័រមួយគ្រឿងខាងលើជិះគ្នា៣នាក់ ម៉ាកហ៊ីយ៉ាន់ដាយ ពណ៌បៃតង ពាក់ស្លាកលេខ ភ្នំពេញ៣A-៥១១៤ បើកបរដោយបុរសម្នាក់មិនស្គាល់អត្តសញ្ញាណ រីឯបុរស២នាក់ទៀតជាព្រូ ក៏មិនស្គាល់អត្តសញ្ញាណដែរ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរស៣នាក់ជិះក្នុងរថយន្តកុងតឺន័រមួយគ្រឿងធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង និងក្នុងល្បឿនយ៉ាងលឿន។ ស្របពេលនោះដែរ គេក៏ឃើញយុវជនប្រុសស្រីមួយក្រុមមានគ្នាជាង១០នាក់ជិះម៉ូតូ៧ទៅ៨គ្រឿងមិនចាំម៉ាក ប្រដាប់ដោយដុំថ្ម បានជិះដេញតាមពីក្រោយរថយន្តកុងតឺន័រខាងលើក្នុងល្បឿនយ៉ាងលឿន ។
តាមប្រភពដដែលបានបន្តថា លុះមកដល់ចំណុចកើតហេតុ យុវជនប្រុសស្រីមួយក្រុមនោះក៏បានយកដុំថ្មគប់បំបែកកញ្ចក់រថយន្តកុងតឺន័រខាងលើ និងវាយបំបែកចង្កៀងរថយន្តផ្នែកខាងមុខបណ្តាលឲ្យរងការខូចខាត រួចក៏បង្កឲ្យមានការភ្ញាក់ផ្អើលដល់ប្រជាពលរដ្ឋដែលធ្វើដំណើរឆ្លងកាត់កន្លែងកើតហេតុខាងលើរួមទាំងសមត្ថកិច្ចមូលដ្ឋានចុះមកធ្វើការអន្តរាគមន៍ភ្លាមៗផងដែរ។
តាមប្រភពដដែលបានបន្តថា យុវជនប្រុសស្រីមួយក្រុមខាងលើក៏បានរៀបរាប់ប្រាប់អ្នកនៅកន្លែងកើតហេតុអោយដឹងថា មុនពេលកើតហេតុ រថយន្តកុងតឺន័របានធ្វើដំណើរតាមបណ្ដោយផ្លូវជាតិលេខ៥ ក្នុងទិសដៅពីជើងទៅត្បូង លុះមកដល់គីឡូលេខ៩ ស្រាប់តែរថយន្តកុងតឺន័រខាងលើបានបើកជ្រែពេញផ្លូវមិនព្រមអោយយានយន្តដែលធ្វើដំណើរស្របទិសគ្នាវ៉ាទៅមុននោះទេ ថែមទាំងបំរុងបើកកៀរ និងបានដកកាំបិតផ្គាក់មួយដើមរកកាប់ពួកគេថែមទៀតផង ទើបធ្វើឲ្យពួកគេ និងប្រជាពលរដ្ឋផ្សេងទៀតដែលធ្វើដំណើរស្របទិសគ្នាតាមបណ្ដោយផ្លូវជាតិលេខ៥ នាំគ្នាជិះដេញតាមពីក្រោយរថយន្តកុងតឺន័រខាងលើ និងបានវាយកម្ទេចរថយន្តកុងតឺន័រខាងលើតែម្តងទៅ។
តាមប្រភពដដែលបានបន្តទៀតថា ក្រោយពេលរៀបរាប់ប្រាប់អ្នកនៅជុំវិញកន្លែងកើតហេតុរួចមក យុវជនប្រុសស្រីមួយក្រុមខាងលើក៏បាននាំគ្នាជិះម៉ូតូគេចខ្លួនចេញពីកន្លែងកើតហេតុទៅបាត់ស្រមោល ខណៈពេលសមត្ថកិច្ចមូលដ្ឋានចុះមកធ្វើការអន្តរាគមន៍។
តាមសម្តីពីអ្នកបើកបររថយន្តកុងតីន័របានរៀបរាប់អោយដឹងថា នៅមុនពេលកើតហេតុ គាត់រួមទាំងព្រូចំនួនពីរនាក់ទៀត បានបើករថយន្តដឹកទូកុងតីន័រចេញមកពីខេត្តព្រះសីហនុ បំរុងយកទៅដាក់ក្នុងរោងចក្រមួយកន្លែងនៅម្តុំគីឡូលេខ៦។
តាមប្រភពដដែលបានបន្តថា ខណៈពេលពួកគាត់ធ្វើដំណើរមកដល់ចំណុចស្តុបកែងនឹងផ្លូវ៥៩៨ ក៏បានជួបជាមួយនឹងយុវជនប្រុសស្រីមួយក្រុមខាងលើ បន្ទាប់មកពួកគាត់ក៏បានចុចស៊ីផ្លេរថយន្ត ស្រាប់តែយុវជនប្រុសស្រីមួយក្រុមខាងលើនោះស្រែកជេរពួកគាត់ថា «ហ្អែងចុចស៊ីផ្លេរកម៉ែហ្អែងស្អី» និងបានជិះម៉ូតូយកដុំថ្មដេញគប់រថយន្តរបស់ពួកគាត់ពីក្រោយរហូត បណ្តាលឲ្យអោយពួកគាត់ភ័យស្លន់ស្លោក៏បើករថយន្តគេចរហូតដល់ចំណុចកើតហេតុខាងលើ ត្រូវបានយុវជនប្រុសស្រីមួយក្រុមនោះនាំគ្នាវាយកម្ទេចរថយន្តបណ្តាលឲ្យរងការខូចខាតតែម្ដង។
ក្រោយពេលកើតហេតុ សមត្ថកិច្ចក៏បានធ្វើការដកហូតកាំបិតផ្គាក់មួយដើមពីបុរសជាព្រូរថយន្តកុងតឺន័រ បន្ទាប់មកសមត្ថកិច្ចក៏បានធ្វើការណែនាំអប់រំដល់អ្នកបើកបររថយន្តកុងតឺន័រ រួចក៏ឲ្យអ្នកបើកបររថយន្តបន្តដំណើរទៅមុខទៀត និងយករថយន្តទៅជួសជុលដោយខ្លួនឯងឡើងវិញ ៕ (កែសម្រួលដោយ ៖ ធីតា)
ចែករំលែកព័តមាននេះ